صورة تذكارية لصاحب الجلالة الزعيم محمد الجوهري حاملا تاج الصباغ الماسيملك ميت غمر والسودان والكونغو الدكتاتورية وزيمبابوي وأنجولا وتنزانيا
قراء مدونتي الكرام أنا سعيد جدا سعيد خالص سعيد بغبااااااء سعيد بدرجة تغيظ
جالي تاج من أحمد الصباغ خال المخاليل مش عارف ياربي أعيط ولا أزعرط في ناس لسه فاكراني لا مش ممكن هههههههههه طبعا بما ان دا أول تاج يجيلي فلازم أحبشله شوية اجابات متينة ولا ايه؟؟والآن مع التاج:
1
هل توافق على حزف خانة الديانة من البطاقة الشخصية ؟
طبعا لأ يا عم الحاج الديانه مسلم ولن اتزعزع عن موقفي ومش هنمسحها أبدا . وبعدين نمسحها ليه ؟؟ دي حاجه غريبه جدا ههههه قال نمسحها قال.
2
ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
3
هل تعتقد بوجود إضطهاد للمسيحين فى مصر ؟
هههههههههههه حلوه دي . اضطهاد مين يا عم. أنا قاعد في بلد فيها حوالي خمس بيوت مسيحيين والبلد كلها مسلمين أهل البلد بيعاملوهم أحسن ما بيعاملوا بعض علي فكره ممكن من لهجتي يبان اني بفرق لكن والله لا المسلمين والمسيحيين في مصر طول عمرهم كيان واحد ومحدش يقدر يهزه والاسلام اللي أمر بكده " لكــــم دينكم ولي دين" وبعدين الدين لله والوطن للجميع دا عن المسيحيين بس أنا بكره اليهود . لكن من ناحية في اضطهاد ليهم في مصر لا أظن بل علي العكس الحكومة مدياهم حقهم كويس جدا وبخاصة أمن الدولة هههههههه يعني ما فيش أي اضطهاد اطلاقا لأن مافيش عداء أصلا واللي بيحاول يزرع العداء بينا هو اللي زرع العداء بين المسلمين السنة والشيعة في العراق وفي فلسطين لحد ما دمروا بعض وهو بيمدهم بالأسلحه ويقعد يتفرج لحد ما يموتوا بعض ويدخل بقا يموت الباقي من المقاومة فيهم أظن مفهوم لكن اللي بيحاول يزرع العداء دا في مصر هيفشل مش لأننا أقوياء لا لأننا فاهمينه أظن واضح؟؟!!؟؟ وعاش الهلال يحتضن الصليب برغم اختلاف الدين الا أن ربنا جميعا واحد ومصرنا ستظل واحدة............ سقفة كبيرة للجوهري شكرا شكرا يا شعبي العزيز ههههههههههههههه .
4
من هو الشخص الذى تختارة لرئاسة مصر ؟
ماليش دعوة يا عم بس زمان كنت بقول كمال الجنزوري دلوقتي ماليش دعوة أهم حاجه يبقا واحد بيحب البلد دي وعايزها تعلي أنا والله بحب الرئيس مبارك وبجد أنا ضد كل اللي ضده لأنه والله كويس بس احنا اللي مابيعجبناش العجب احنا 80 مليون ازاي مطلوب من الريس ان كلنا نكون أغنياء واحنا قاعدين ؟؟؟!!؟؟ لازم نشتغل "ان السماء لاتمطر ذهبا ولا فضة" هيطلعلي واحد يقولي حوار قناة السويس والـ 50 دولار لكل فرد مش هرد عليه لأن دماغي بتوجعني من المواويل دي وفي الآخر لاحل ولا جديد يبقا السكوت أحسن حاجة واللي مش عاجبه عنده البحر المتوسط في شمال خريطة مصر هههههههههه ولو مالح يقضيها من البحر الأحمر اللي في الشرق ملوحته أقل شوية مش عاجبه عنده النيل في النص ومن الشمال لحـــــــــــــــد السودان واللي مش عاجبه بعد كده ربنا يتولاه بقا هنعملوا ايه.
5
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟
والله أنا مبحبش أفترض حاجة مش هعملها لكن نفترض ودااا فرض اني عملت حزب الجوهري مثلا- مثلا يعني - ونجحت في الانتخابات هلم الناس وأشوف الأحق فيهم واللي أفكاره بناءة وفعلا عايز يطور البلد دي وأحطه ويا يكون حزب شغال بجد يا قلته أحسن مش ناقصة وش. من ناحية المسلمين والأقباط هوافق ان أي حد مصري عنده أفكار بناءة يدخل سواء كان مسلم أيا كان اخوان ولا لأ أو مسيحي لكـــــــ خلي بالك ــــــن مش هخليه يفرض سيطرة ويحاول يخلي سياسة الاخوان أو الأقباط هي اللي تسود دا حزب يعمل من أجل مصر مش من أجل الاخوان أو الاقباط يارب يوصل مفهومي للناس. طبعا دا لووووووو.
6
فى رأيك الشخصى .. ما هى أفضل مدونة على بلوجر قمت بزيارتها ؟
كأفكار بتعجبني مدونة أدهم الشهابي الواد ده بحبه جدا دماغه بتعجبني
كظرافه وخفة دم يبقا طبعا الزعيم أشرف صاحب مدونة أخف دم ما أعرفوش لكن حبيت مدونته
كأنوثة وبنت متمردة وصاحبة أفكار لذيذة لميس خاطر صاحبة مدونة سحاب
من ناحية الشعر في د. محمود فرج وفي محمود سليمان أبو العزم
وفي طبعا غيرهم كتيررررررر ما أعرفهمش أو ما اخدش بالي منهم وفي ناس ممتازة زيك يا صباغ مش ناسيهم بس أنا بقول الأفضل - ودي وجهات نظر- بالنسبة لي .
7
للذكور فقط : أيهما تفضل كزوجة .. إمراءه عاملة ، أم ربة منزل ؟
للإناث فقط : هل توافقين على الزواج من رجل مطلق ؟
للإناث فقط : هل توافقين على الزواج من رجل مطلق ؟
الحمد لله أنا رجل ... ذكر يعني ههههه كده هستنفي السؤال التاني شوفتوا الذكاء ههههههه من الناحية دي أنا أفضل وأتمني ربة منزل أيا كانت مؤهلاتها لكن لو حابه تشتغل لا مانع لكن في مواعيد للعمل وشرط أساسي لايطغي عملها علي حقوقي كزوج وحقوقها تجاه الأولاد ان شاء الله . بس خلاص.
8
اذا تزوجت وأنجبت ولدين وبنتين .. أى الأسماء تحب أن تسمى ؟
ان شاء الله يعني
هسميهم يا سيدي
هسميهم يا سيدي
Osama - Dina
Ragy - Ramaj
ولو جبت بنت كمان هسميها
Meral
بس كده هنعوز مجهود خرافي ههههههههههههههههههه.
9
هل تعتقد أن توريث الحكم فى مصر . . سيتم فعلا أم لا ؟
هذا في علم الغيب لكن لا أظن مش عارف ليه حاسس ان التمانين مليون الا 200 ألف هيضايقوا وهيعملوا بلاوي عالموضوع ده لكن الله أعلي وأعلم.
10
فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟
ههههههههههههههه الكباااااااااااري وبخاصة كوبري سته أكتوبر اللي بحبه بغباء وبدرجة تغيظ دا عن أفضل الانجازات.
أسوء عمل غربلة الراجل بتاع بورسعيد وماليش دعوة الحكومة وربنا ايـــــــــــشـشـشـشـــطة وزي الفل.
ودا كان التاج بتاع أحمد أفندي الصباغ اللي اتدبست فيه وعقبال ما تدبسوا زيي وكل سنه وانتوا بردانين .
