شخابيط عالحيطة.. تعالى شوفها واضحك

زوار المدونة الأعزاء.. مرحباً بكم من جديد..
أعتذر كثيراً عن إنقطاعي الفترة الماضية عن المدونة.. وذلك لظروف خارجة عن إرادتي.. فلديَّ إمتحانات بعد العيد .. وكذلك عندنا بالمنزل عمال محارة(بشطب شقتي عقبال عندكو) وطبعاً زي ما حضراتكم عارفين العمال محتاجين متابعة ودوشة وبما إني وحيد إخواتي البنات ووالدي متوفى ومافيش حد يتابع فكان لازم أندمج معاهم وأتابعهم.. أديني تابعتهم لدرجة إني سمعت مصطلحات غريبة جداً لأسماء العدد اللي بيشتغلوا بيها.. ودي صور العدد.. خلينا نشووووف..

دا طبعا معظمكم ممكن يكون عارفه.. إسمه مسطرين.. ومحدش يستظرف ويقوللي مسطرين ولا واحد و مسطرين ولا اتنين ومسطرين. ودا بيستخدم في شيل المونة(أسمنت مخلوط برمل بشوية مية) في بناء الجدران.. وكمان بيكسروا بيه الطوبة لو عاوزين نص قالب أو كنيزر ههههههه ودا معرفش يعني إيه!! بس هو جزء من الطوبة تقريباً ربع طوبة.
نشوف اللي بعده
دي بقا أسمها محارة بروى وطبعاً لما الراجل قال اسمها كنت فاكر عنده برد ومناخيره مكتومة ( فبينطق ال ميم باء زي بحبد بدل محمد) فكان بينادي عالصنايعي اللي معاه وبيقول له ناولني البروى فروحت وبقوله هما ليه سموها مروى يا عم سيد؟!! قالي إسمها بروى يا دكتور محمد ( وقال محمد بالميم مش بالباء) فعرفت انها إسمها بروي وضحكت طبعاً. والبروى بتستخدم في شيل المونة( اللي هيا سبق شرحها) وفردها علي الحائط وتسويتها وهو دا المقصود بـ التمحير .. معايا يا كبير؟!!؟
نشوف اللي بعده.. ودا مصطلح غريب جدا.. إسمه طالوووش هههههههه ودا اللي المساعد بتاع المحّار(صنايعي المحارة يعني) بيشيل عليه المونة من المكان اللي بيضرّبها (بيخلطها) فيه ويديها للصنايعي المحّار علشان يمحّر (يفرد المونة) على الحيطة. واستغربت ليه اسمه طالوووش!!.. وزي مانتو عارفينني اخترعتله نظرية هههههههه.. هو أنا بغلَب!!؟؟
والنظرية: إنه كان محطوط في مكان عالي ف الصنايعي ما طالوش فمن يومها سموه طالوووش هههههههههههه.
نشوف اللي بعدهدا بقا أكتر مصطلح ضحكني.. اسم العدة دي منجافرّرررة .. هههههههههه .. ودي بتساعد في تسوية المونة اللي على الحيطة لو فيها حتة عالية وحته واطية - ولا مؤاخذة -
وفكرني المصطلح دا طبعاً بكلمة صديقي الأنتيخ أسعد أبو عمر "دُق في المنجافرّررررة.. ومتبقاش عرّه" وطبعاً مكنتش فاهم معناها بس دلوقتي فهمته يسسس يسسس.
بكده انتهت المصطلحات العجيبة بتاع المحارة وأظن بان وأنا بشرحها اني كنت مُتابع جيد للعُمال ومش بعيد لو فشلنا فـ الطب ولا حاجة نشتغل ملاحظين عمال محارة هههههههههه.
نيجي بقا لموضوعنا..
طبعاً الصيام تاعب الناس وكل سنة وانتم طيبين ودا علشان حرارة الجو.. تعالوا نحاول نخفف أثر الصيام ونضحككم بشوية صور تماااام معظمهم حاجات كاتباها الناس عالحيطة ومن هنا جه إسم البوست.. شخابيط عالحيطة..
والصور التمااام دي إلتقطتهم بـ عدسة موبايلي.. أتمنى يعجبوكم.دا إسم كُنية جديد إنتشر.. أبو سجاير فرط.. ههههههههه
مع تحيات جمعية " دهبز نيكوتين.. في سنينك الطيــــن"
نشوف اللي بعده
طبعاً غُلُبنا وريقنا نشف من كتر ما قلنا "النظافة من الإيمان" فلما الذوق ما ينفعش يبقا البلطجة هي الخيار - مش الخضار لأ لأ أقصد الحل - الوحيد.وهودا العادي.. من شعب مصر.
طبعا بيبقا في كل مكان مناطق كدا بتكتظ بالناس بخاصة الأماكن اللي فيها شجر في الجامعات ودا أحد الأماكن دي .. بس.. في

تحذيررر وزي مانتم شايفين هههههههه الناس سمعت الكلام. ألا يتعوروا ولا حاجة هأ هأ هههههههه.
نشوف اللي بعده
أكمل الجملة التالية.
عدي المزلقان......
الاجابة: وخد بالك من القطر----> غلط
علشان تعرف الاجابة الصح بص يا ريس ههههههههه احنا شعب عبقري هههههههههههه.
نشوف اللي بعده الله الله على الفصاحة.. إيه يا واد الحلاوة دي يا ولة!!... المحل غير مفتوح لأنه مغلق.. إنفتحت طاااقة في دماغك يا عم انتا يا صاحب المحل.
نشوف اللي بعده
واحد طعِّم أوي من الشباب الفرافير كتب وطبعا زي مانتوا عارفين " إنّ كيدهُن عظيم"
فكان لازم واحدة (معاها شبشب أبو وردة) ترد
وفعلاً ردت ههههههههههههه
مهند برضو! يختااااااااااااااي -أنا بنوح وبلطم- يخربيت مهند اللي قارفنا فـ كل حتة.
وبرضو كاتبة كتكوا وكسة هههههههه اسمها جاتكوو وكسة.. واخد بالك ياللي فـ بالي؟؟ ههههههههههه
وبرضو عاوز أسأل هي الوكسة دي تفرق كتير عن ال نيلة؟؟
بس تعرفوا أكتر حاجة غايظاني ايه؟؟
إن البت كاتبة بـ صباع رووج ههههههه أنا خايف واحد صعيدي بس يفتكره فلاووولة ويلحسه ههههههههه
نيجي لـ بعد كدا..
بما اننا دكاترة نشوووف شوية حاجات للدكاترة
دا إعلان من قسم الرمد عندنا.. أياااااام ما كنا فـ رابعة ههههههه الراجل وصف المكان وبين قوسين قااااااال (يعني هنا) وعداه العيب وأزح..
يعمل ايه أكتر من كدا؟؟
تخيلوا بقا لما ييجي واحد زميل ليا يقوللي هنا فين!!
تعرفوا أنا عملت إيه؟؟ مردتش عليه طبعاً.. أصل لو رديت عليه هريحه.. أنا بصيتله من فوق لتحت ومشيت.
نيجي للي بعده
موقف طريف مع واحد صيقي إسمه محمد هاشم من بلبيس-شرقية
محمد غاوي يجيب ساعات حجم كبير يلبسها فـ ايده من الساعات الصيني أم 30 جنيه دي هههههه(شردت الواد) ههههه المهم دي صورة أضخم ساعة جابها لما شوفناها أنا ومحمد خضر-صديقي برضو ودا من شنبارة الميمونة مركز الزقازيق شرقية أيوووة سامعك ياللي بتتكلم إيوة بالظــــــبط هي شنبارة الميمونة اللي مش عالخريطة- كان لاااازم نعلّق
فقولتله يا محمد دي مش ساعة تتلبس فـ الإيد كان في ساعة زيها كدا لونها دهبي وكبيرة وبـ أوستيك برضو بس بتتعلق عالحيطة بيتهيألي هي دي ههههههه. حتى شوف الزرار بتاع الظبط بتاعها قد ايييييه!!
ضحك محمد هاشم ومعلقش وكانت من محمد خضر أكتر لقطة كوميدية عجبتني قال له ببراءة عادل إمام في مشهد الواد سيد الشغال وهو بيقول أنا اسمي مكتوب؟؟ قال له: محمد هيا الساعة دي فيها منبه وبتدن ؟ هههههههههههه وفجأة وجدوني على الأرض وماسك بطنى من الضحك هههههههههه.
دا موقف بينا كـ تلاته دكاترة ههههههههه
بس خسارة الطب معادش للبني آدمين بس
لا دا بقا للحيوانات طب بيطري
و عديناها ومتكلمناااش
بس طلع طب جديد..
طب إزااااز
حد سمع عنه؟؟
شوفوا الصورة دييا سلاااااام
دكتور خالد .. استشاري و أخصائي علاج حالات سرطان الزجاج بتاع العربيات.. بالحقن والأشعة وبدوون جراحة(قصدي بدون فك الإزاز).. لأ وإيييه العملية بتخلص فـ 20 دقيقة ومعااااك ضمااان مدى الحياة(ضماااااان ولا أعرفك ياباااا من بعد ما توريني عرض قفاك) .. والورشة(أاا أاا قصدي العيادة) بـ دقادوس مركز ميت غمر..
سبحان الله العلم في تطور
واللي اتكسر عاد بيتصلح هههههههههههههه.
نيجي بقا لشوية أسامي محلاااات
نشوف دا

يغتي كااااميلاااا يغتي
كاتي كا .. و .. ماني ما
لصاحبها الأخوان ميدو و ريكوهيثم..
يحظك يا ميدووو.. إسم المحل بتاعك فكرني بأغنية كاكي كاكي كاكي كاااا سامع الفرخة بتقول كا كاك كاك كاك كااااا ههههههههههه.
نشوف اللي بعده..
طبعاً كلنا عارفين الفجوة الإقتصادية اللي حصلت من ساعة ما الدهب -اللي كان محطوط في البنك المركزي قصاد الجنيه المصري- الدولة أخدته وبقوا يطبعوا فلوس من غير غطاء نقدي.. دا عمل فجوة اقتصادية كبيرة وكان في محاولة لإنقاذ ما يمكن إنقاذة بـ تعويم الجنيه المصري وبصراحة من ساعة ما حاولوا يعوِّموه غطس ما قبّش والسبب إن الورق لما بيتبل بيتقل ويغطس لكن عارفين لو كان الجنيه بلاستيك؟ يااااااااااااه كان عاااام وعددددددددددى ههههههههه.
المهم .. بسبب الفجوة الإقتصادية دي.. واللي عملت إزمة فـ الإقتصاد حاول بعض الناس يسدوا الفجوة لأ لأ مش بالعجوة.. بالإستثمار.. لأن لو سابوا فلوسهم ف البنوك بتقل قيمتها وهيبقا ليلهم من غير نهااار.. فأحسن حل الإستثمااار.. ف قالوا نستثمرها فـ ايييه؟!! قالك بسسسس في المحلات التجارية.. محدش معاه فلوس لأن كل الفلوس بتروح في شراء اللبس والأحذية وكدهوووّن هههههههههه فأخينا من شبرا حب يفتح محل أحذية قال يسميه اييييه!! بسسسس قال احنا بنشحت الرزق من ربنا.. هو دااااا.. نسميه... أرزاق.. دا اللي قالهولنا عن سبب تسمية المحل.. بس أنا شايف انه مش راضي وحقود وبيبص للمحل اللي عالناصية التانية علشان شغال أكتر منه فـ علشان كدا سمى محله .. أرزاااااق (بحقد ومن تحت الضرس).
ملحوظة: المحل دا فـ شبرا عند محطة الدوران دا لو راكب ميكروباااظ من المؤسسة وف وش سلم مترو روض الفرج وانت طالع..
وأي حد هيبلغ صاحب الامحل اني كتبت عنه عالنت هو حر يشررررب اللي هيحصلّه.
اللهم بلّغت.. هههههههههه.
وطبعاً الظاهرة بتاعت شحاتة الرزق دي انتشرت وما عادتش بس ف شبرا.. لأ دي انتشرت عالمياً .. في الزقازيق وأبوكبير وطنطا والمحلة وف المنزلة وللأسف وصلت لميت غمر ...في الشركة دي شركة الأرزاق بالله
وطبعاً علشان تصدقوا صدق كلامي.. ليييه سماها الأرزاق بالله؟؟
علشان يؤكد انه بيشحت الرزق من ربنا ومش كاتبها حقد ولا من تحت الضرس زي صاحبنا بتاع شبرا ههههههههههههه.
بكده نكون خلصنا شوية الصور اللي التقطتهم عدسة موبايلي. أتمنى تكون عجبتكم.
وانتظروا مواضيع فكاهية لاحقاً.
وفي نهاية الموضوع.. أطلب منكم الدعاء لي بالتوفيق في الامتحانات..
مع تمنياتي لكم بصوم مقبول وعيد سعيد إن شاء الله وكل عام وحضراتكم جميعاً بخير.
دمتم سالمين،
د.محمد الجوهري.