٢٨‏/٠٩‏/٢٠٠٨

حريقااااااا... حريقااااااا....حريقااااااا

قراء المدونة مرحباً بكم من جديد...
صراحة مش عارف بجد أقول إيه!!! خلصنا من حريق مجلس الشوري منذ أسابيع قليلة وأُفاجأ بعد الإفطار أمس بخبر نشوب حريق بمبنى المسرح القومي المصري بميدان العتبة الشهير بوسط القاهرة... رجّح مسؤولو الشرطة أن الحريق نشب نتيجةً لماس كهربائي أدي إلي إنفجار بأجهزة التكييف وإحتراقهااا فامتدت النيران لتحرق ديكورات المسرح وواجهته...نشب الحريق قبل الإفطار بدقائق معدودة ويرجح أصحاب خفة الظل واللذين سأخبركم عن آرائهم فيما بعد أن الحريق نشب قبل مدفع الإفطار بست دقائق وسبعة وثلاثون ثانية واثنين فيمتو وكأن الصول محمد المدفعجي ضرب المدفع قبل ميعادة لتصل القذيفة إلي مقر المسرح وتلتهمه النيران...وعلي الفور توجّه رجال الإطفاء في النقاط المجاورة إلي مقر الحااااااادث وياعيني مافطروش الا بعد العشااااء حيث أن إطفاء النيران استمر من السادسة وحتي الثامنة والنصف تقريباً لدرجة أن بعضهم ترك الباشبور للمارة ليقوموا بعمليات الإطفاء قائلين إياكش تولع ههههههههههههه فيما جائتنا أخبار بأن السيد المبجل خاااازوق إحم إحم عفواً حدث عطل فني في الكي بورد السيد/ فاروق حسني وزير الثقافة توجّه إلي مقر الحادث لمتابعة ما يجري بالمسرح بعد أن إلتهم لقمتين عالسريع كداااا يعبي بيهم التانك وأكد سعادة اللوز مساعد الوزير بتاع الحاجات دي اللي هو وزير الداخلية باين أن العمليه في النملية أقصد الحريق تحت السيطرة وكولووووو إيشطة بالصلاةُ علي النبي .. وأنهم تمكنوا من إخماد النيران قبل أن تمتد للبيوت المجاورة إذ أن البيوت متلاصقة لكون الحي شعبي إلي حدٍ ما كما أنه يجاور حي الموسكي الشهير والذي يحتوي علي ملابس العيد للشعب الغلباااااان فمش طالبة الصراحة الحريقة تمتد لهناك يعني... كما أشار سيادة اللوز لحاجة مهمة جداااااا جدااااااا محدش أخد باله منها خالص أن الحريق نشب قبل ما مدفع الإفطار يضرب ويعمل بوروروم بعشر دقايق وهناااا ينفي تماماً علاقة الصول محمد المدفعجي بالحادث وكماااااان بيوضح إن بداية الحريق نشب في الستااااااائر هههههههههههههه لا والنبي جبت التايهة هههههههه إتصدروا في الهيافة.. وبرضو أشاااااار إلي حته رهيبة أنه لا توجد خسائر في الأرواح ههههههههههه طبيعي يا هندزة البتاعة نشبت في البتاع قبل مدفع الفطار ببتاع عشر دقايق مين المجنون ابن المجنونة اللي مش هيفطر وهيكون قاعد في المسرح مثلاااا قبل الفطار بعشر دقايق .. عموما مشكور يا سيادة اللوز على الأخبااااااار الفظيعة دي..
وفي حته حلوة برضو بتوضح براعة قوات الإطفاء عندنا ... أوضح العميد نصر زكريا رئيس غرفة العمليات بالإدارة العامة للدفاع المدني والإطفاء بالقاهرة أن النيران امتدت بفعل الرياح إلى لوحتين إعلانيتين فى الدورين السادس والسابع فى العقار المواجه للمسرح وتم إطفاؤهما فى الحال قبل أن تمتد للشقق بالعقار... والله مية مية يا سيادة العميد أصل ما كانتش ناقصة وربنا ناس تتحرق عالعيد كدااا كل سنة وانت طيب يا باشا....
طبعاً هنقول قضاااااااااء وقدر ماشي يا جماعة قضاء وقدر بس مش غريب كل شوية ماس كهربائي يولع في مبني كبير وبعدين سعادة اللوز أشار إن مكانش في حد في المسرح طب أجهزة التكييف انفجرت ليه؟؟؟ إذا كانت أصلا مش شغااااالةّ!! ولا يمكن كانوا مشغلينها تهوي عالجن اللي بييجوا يبيتوا بالليل ولاااا مثلاً هيطفوها ليه بيدفعوا فلوس كهرباااااااا من جيوب أهاليهم ههههههههه دا برضووو كان تعليق أحد خفاف الظل اللي كلمتكم عنهم واللي فوجئت بيه بعد العشاء عامل كدا بالظبط

وبيقولي حريقاااااا .... حريقااااااا ... حريقااااااا مقلداً دور يونس شلبي في مسرحية مدرسة المشاغبين واللي كانت علي مسرح برضووو هههههههههه وأكمل قائلا أبويااااا اتحرق هيه أبويا اتحرق هيه واحد بيقولوا أبوك ماله؟؟ بيقوله أبويا راح النار هههههههههه
هذا هو الشعب المصري في أي وقت بيضحك .... شعب عجيب ....
خلينا نقول طبعاااا نااااااس هتفرح وتقولك إياكش تولع كمااااااان وكماااااان زي ما حصل في حريق مجلس الشورى بس أنا بقول يا جماعة بإيه هنستفيد من حريق يحصل؟؟ هل الوضع إتحسن؟؟ هل مشكلة إتحلت؟؟ لا طبعاً بل الفساد زاد ... خود عندك بقاااا تكاليف ترميم وإعادة هيكلة وبناااااء وفرش وستائر وتكييفات وخلاااافة وطبعاً نظرية بــــح بـــــح الإقتصادية التي إكتشفها وألفها نجيب الريحاني لزوم مصاريف الخروف ههههههههههههه غلابة العالم دي وداخلين علي عيد أهوووو وبداية مدارس مش لازم يعملولهم سبوبة علشان المصاريف دي ؟؟
يبقاااا بـــح بـــح ويا شعب بطل تتنـــح ههههههههههههههههه
ودا طبعاً نفس الكلام اللي قولته في حريق مجلس الشورى. مش هنستفيد من الحرايق دي شيء... وربنا يستر وما نسمعش حريق في مجمع محاكم الجيزة الساعة اتنين ظهراً ولا في محطة مترو رمسيس الساعة 9 صباحاً وبرضووو سيادة اللوز يقول حريق يشب مش عارف فين والسبب برضووووو ماس كهربائي وخسائر في الأرواح بالمئات وبرضووو هيقووول العملية في النملية ههههههه
سلّم يااااااارب سلّم.
تحياتي للجميع وعذراً للإطالة
دمتم سالمين.
تحـــــــــديث
أجزاء من ردود أعجبتني عالموضوع
semsema يقول...
البلد منورة الايام دي جااااااامد مش عارفة والله ايه النور الزايد ده
تعرف كل ما اسمع عن موضوع حريق جديد افتكر حريق القاهرة علي طول زماااااااان ايام الملك ايييييييه دنياااااا
انما ازاي ياراجل متجبش سيرة حريق سنترال ميت غمر الرئيسي وتوقف شبكة اتصالات يومها مش بقولك البلد نورها زاايد اليومين دوووول
منور والله يا حااااااج
ههههههههههه طبعاً يا سمسمة النور زايد زايد ومعمر القذافي كمااااااان ههههههههههههه
الملك مممممممم بسم الله الرحمن الرحيم علي بك الكبير ههههههههههههه كان راجل كبير وكوبرة
هيــــــــــه دونيااااااااااااااا
فعلاً إزااااااااي أنسي الحوار دااا!! بس خلااااص هنوّه أهووووو
عزيزي المواطن أضف إلي سلسلة الحرايق اللي كوووووول شوية بتحصل برضوووو مااااس كهربائي في سنترال 100 غمر الرئيسي أدي إلي حريقاااااااااا عظيمة في السننترال وبالتالي أدي إلي إنقطااااااااااع الحرارة فـ التليفوووووناااااااات لمدة يوووووووم كامل وطبعاً واحد زكي هيقولي النت كماااااااان قطع؟؟؟ مش هرد عليه علسان الضغط والسكر ههههههههههههههه.
طبعاً في الآخر سمسمة عاوزة تلبسني في شجرة قصدي تلبسني تهمة إني أنا السبب في حريق المسرح القومي بس بدهاااااااء الناس بتوع الغربية الحلوين دولا . بتقولي منوّر يا حـاج بعد ما وضّحت فوق إن سبب الحرايق دي نور زيادة يبقااااا لما أنوّر يبقا ليا علاقة بالحااااادث لهذاااا من على منبري هذا مممممم أقصد علي كيبوردي هذه أعلن أني ماليش دعوة بالحريقاااااا دي والله العظيم 3.
أما التعليق الأطرف
مهندس مصري يقول...
بيقولوا سبب الحريق في قناة الجزيرة
هو لحامات كان يقوم بها بعض العمال في الستارة الرئيسية للمسرح و ليس ماس كهربي
و ان نظام مكافحة الحريق الاتوماتيكي الذي تكلف مليون جنيه العام الماضي لم يعمل
:(

ههههههههههه دايماً قناة الحصيرة بتجيب الإنفراداااات ههههههههههههههه

لحاماااااااااااات في الستااااااااارة ههههههههههه ليه ستارة حديد؟؟ ههههههههههههه

بس والله مش بعيد شعبنا دا عجيب وقبل الفطااااااار توقّع أي شيء

ههههههههههههه نظام مكافحة حريق مين يا هندسة بسسسس

دي سبوبة واتوزعت وجابوا خرطومين و3حنفيات - جمع حنفي على فكرة- وقالوا إتكلف مليوووووون جنيه

ههههههههههه طبعاً دا احدي أمثلة نظاااااااام بــح بــح ههههههههههه

خالص تقديري لك يا هندسة.

تحديث تااااااني آآآآه ياااااااااني

جائني تعليق من الجميلة زهرة الجنة كالآتي
زهرة الجنة (زهرة سابقا) يقول...
أخر خبر بقي يا دكنور

قبضوا علي مدير خشبة المسرح وعامل الكهرباء بالمسرح

حيث أهمل الأول في اداء وظيفته وأخل بواجباتها

اما الثاني أهمل في صيانة الأموال العامة

شوفت بقي يا دكتور الماس برئ المرة دي وأخيرا لاقوا حد يقبضوا عليه ههههههههه

وطبعاً لأني مكنتش مصدق وللأسف ما كنتش متابع الجرايد فبعتتلي عالميل صور من جريدة المساء ومن محيط حيث تبين الآتي:

قرر المستشار محمد حلمى قنديل المحامى العام لنيابة وسط القاهرة حبس اثنين من العاملين بالمسرح القومى لمدة 15 يوما على ذمة التحقيقات. والإثنان هما باسم جرجس ميخائيل حنا مدير خشبة المسرح بالمسرح القومى, ومحمد بكرى مصطفى درويش مسئول الكهرباء، حيث نسبت اليهما النيابة انهما تسببا فى الحاق أضرار جسيمة فى أموال الجهة التى يعملان بها وكان ذلك ناشئا عن اهمالهما فى اداء وظائفهما واخلالهما فى اداء واجباتهما.

يعني قفشوا فعلاً الإتنين اللي أخلّوا بواجباتهم وسابوا الماس ينتشر ويترعرع لحد ما عمل عملته الوحشة وحرق الستارة اللي شبكت فـ خشبة المسرح. ظلمنااااااك يا ماااااااااس مطلعتش لوحدك دا في تواطؤ من نااااس معاااك. خلينا نكمل باقي الخبر من محيط

وكشفت التحقيقات التى أجرتها النيابة فى الحادث أن سبب الحريق يرجع إلى قيام ادارة المسرح باحضار مقاول لاصلاح بعض الاعطال فى ستارة المسرح، فقام العمال بعمل وصلة كهربائية من صندوق كهرباء بالمسرح وعقب انتهاء العمل لم يقم الفنى المختص بفصل الكهرباء عن المحول مخالفا بذلك التعليمات التى تلزم المسئول عن الكهرباء بفصل كافة التوصيلات الكهربائية فور انهاء مثل هذه الأعمال, حيث غادر محمد بكرى المكان رغم تحذير رؤسائه له من خطورة تركه لهذه التوصيلات وهو ما أدى إلى اندلاع شرار من هذه التوصيلات أسفر عن حدوث الحريق.

رغم تحذير رؤسائه له... إديلوا إدي ... خلااااص حذروه ومسمعش الكلام إدولوا علي حنطور عينوووو هههههههههه

الأفندي مستعجل عالفطار كان لسه 10 دقايق والمدفع يعمل بورورم فقالك بلا وصلات بلا بتاع وساب الوصلات العريانة عريانة طاب إستر عليهااا هههههههههههههه وطبعاً الماس ما صدّق وقام ماسك فـ الستارة وسمعوا صدي صوت يقول ولّعت يالاااا ولّعت هههههههههه

كما استمعت النيابة إلى أقوال شريف عبد اللطيف مدير عام المسرح القومى والذى شهد بأنه كان قد أعطى تعليماته لاصلاح أعطال بستارة المسرح وانه طالب باسم جرجس ميخائيل مدير خشبة المسرح لمتابعة إصلاحها.

أيوة يا سيدي ... كل واحد يقول يلا نفسي ... عارف أنا الليلة دي يثبت إن شغلة مية المية وإن الخطأ من اللي تحتيه.

من جانبه أكد فاروق حسنى وزيرالثقافة أن خسائر المسرح القومى من المعاينة الأولية عبارة عن احتراق الستارة وجزء بسيط من الخشبة الرئيسية للمسرح نتيجة سقوط "السوفيتة" عليه وهو الحامل الضخم الذي تعلق عليه أجهزة الإضاءة إضافة لبعض لوحات الجبس التي صنعت فى السبعينيات، نافيا ما تردد فى بعض الفضائيات عن تدمير قبة المسرح او تعرض أجزاء كبيرة منه للتدمير.
ووصف كل ما تردد بأنها معلومات عارية عن الصحة واشاعات تهدف الى الاثارة فقط.

طبعاً لازم يتلامض ويقوله كلمتين أومال يعني هيروح بعد ما إلتهم لقمتين عالسريع يعبّوا التنك ووقف بتاع ساعتين وفـ الآخر مش هيتكلم.. لازم يتكلم بقاااا ويقولك سوفتيه وبتاع سوفتيه مين والناس نايمين!! وقام واصفلك اللي اتردد من المعلومااااااات إنها عريااانة وبتعمل إثارة هههههههههههههه هيا رقااااصة يا عم الحاج !! قال عريانة قال آه مانت بتموت في كلمة عريانة زي ما كنت بتقول الحجاب عودة للوراء وعاوز تخليها عريااانة بقاااا.. فكر عاوز يتغطى ههههههه فكر العرايااااا لخازوووق -عفواً الكي بورد عملتها تااااني- لفاروق حسني.

وقال الوزير إن الحريق نشب جراء شرارة كهربائية من تابلوه الكهرباء بالمسرح وعندما حاول أحد العمال التعامل معها أنفجرت مما أدى لاشتعال الستارة الرئيسية لكن سيارات الأطفاء تواجدت وتعاملت مع الموقف عقب دقائق من نشوب الحريق إذ أن المسرح مزود بأحدث أجهزة الإنذارالمبكر التي تتصل اتوماتيكيا بأجهزة المطافىء فور نشوب اى حريق.

ومين يشهد للقرعااا!!! مانتا لازم تقول أحدث الأجهزة؛ علشان ما ينبشوش ورا السبوبة اللي إتـ بح بح ت. وسمعني سلام أحلف بسماها وبترابهاااا. وحلو حوار بتتصل توماتيكي بالمطافي دي ههههههههههههه إزاي يعني؟؟ مسجلين رسالة حريقااااا..حريقااااا...حريقاااا ولا ولّعت يالا ولّعت ولا نار نار نار أنا قلبي قايد نار هههههههههههههه

وأضاف أن أجهزة الأطفاء الذاتي المزود بها المسرح تعاملت فورا مع الحريق حتى قبل وصول سيارات الاطفاء وساعدت فى الحد من الخسائر وأنقذت المسرح بشكل فعال واستمرت حتى بعد وصول رجال الأطفاء وتعاملهم مع الحريق واحتواءه

أيوه قول قول.. كمّل .. إشجيني.. مش أجهزة متكلفة مليووون جنية وما عملتش حاجة لازم تقول ساعدت في عدم نشر البطيخ .. وتعمل فيلم علشان محدش يهيص ويقول وأجهزة الحريق اللي بمليوووووون جنيه عملت إيه!!

لا وشوف بقا اللذيذ يا عزيزي القاريء:

على صعيد متصل صرح الدكتور محمد سلطان رئيس الإدارة المركزية للاسعاف والطوارىء بوزارة الصحة والسكان بأن عدد المصابين فى حريق المسرح القومى بميدان العتبة ارتفع إلى ستة أشخاص. مؤكدا أنه لاتوجد أى وفيات وحالة جميع المصابين جيدة ومطمئنة . وأوضح أنه يوجد حاليا فى موقع الحادث نحو 19 سيارة إسعاف و 45 مسعفا ومساعد أخصائى إسعاف وخمسة أطباء تحسبا لأية ظروف طارئة .

ههههههههههههههه قالّك مافيش وفيات ومصابين بحالة جيدة ستة أفراد.. يقوم يجيبلك 19 عربية إسعاف،45 مسعِّف و5 أطباء ليه؟؟؟؟ كل دا ليه؟؟؟ , ,و على النقيض في الدويقة سابوهم تحت الصخور يموتوا مالهومش ثمن يا عم وتلاقي 5 أو 6 عربيات إسعاف أول عن آخر دا إن كانوا عبروهم أصلاً . بالذمة دي مش حاجة تخنق وتجنن!!!

ختاماً: نقلبها دندرة وبلاش نكد

أحب أقولكم كل سنة وانتم طيبين

ووداعاً يا رمضان أهلاً بالعيد.

وكل عام وأنتم بخير.

٢٦‏/٠٩‏/٢٠٠٨

أهو كداااااااا صح


أهو كدا الكلام ...
مسح د. أيمن البوست اللي في مدونته سباح في بحور الظلام
وطبعا كلمت أنا الصباغ ومسح برضوووووو بوسته اللي في مدونته خالو الصباغ زي ما وعدني ..
والاتنين غيروا الكلام لبوستات أروع
وأحمد ما خيبش ظني ودخل رد زي ما كنت متوقع منه عند أيمن هنا وأيمن تقبل كلامة ورد برد أروع عجبني جداً وبكده رجعوا الحمد لله كويسين في حق بعض وبالعند في الشيااااطين ههههههههههههههههه.
كل سنة وأنتم بألف خير
وبجد دي أخلاق المسلمين
وأخلاق مدونين محترمين زيكم إنتم الاتنين ..
وكداااااا أنا مبسووووووط وكل المدونين مبسوطين.. واللي مش عاجبه إياكش ياااااااارب يولّع بجاز وسخ
ههههههههههههههههههههه

تحياتي للجميع
د. محمد الجوهري



٢٥‏/٠٩‏/٢٠٠٨

يـا خـســــــــــــــــــارة يا إتنين مسلمين

تحديث
بحمد الله قام كل من د. أيمن و أحمد بك الصباغ بمسح موضوعاتهم كما أشرت في البوست التااالي وبناء عليه قمت بمنع التعليقات في هذا الموضوع لأنه خلاص اتقفل
تحياتي للجميع


بسم الله الرحمن الرحيم
قراء المدونة الأعزاء .. مرحباً بكم من جديد ..
بدايةً كل عام وأنتم بخير في شهر الخير .. واللي فيه الشياطين بتتسلسل بس برضووو النفس الأمّارة بالسوء لسه شغّالة... طبعاً أكبر مثال لكدة مشكلة أيمن القناوي (مدونة سباح في بحور الظلام) و أحمد الصباغ (مدونة خالو الصباغ)...
طبعاً بما إن أيمن من بلدي وزميل في كلية الطب بالزقازيق وتربطنا - أقصد كاااااانت تربطنا من وجهة نظر أيمن حالياً - صداقة عمرها أكثر من عشر سنوات ، وبما إن الصباغ صديق جميل إتعرفت عليه في عالم التدوين الرائع وحبيته بجد وإتقابلنا في حفل توقيع مدونات مصرية للجيب وكل ما بنزل القاهرة تقريباً بقابله؛ إذاً كان لازم أكون وسيط في حل الخلاف لأن الإتنين زي ما وضّحت أصدقاء درجة أولى بالنسبة لي. طبعاً الصباغ قديم عني في التدوين،و دخلت أنا العالم دا بعد منه، ودخل بعدنا أيمن؛ شاف أيمن مدونة الصباغ في مدونتي فعجبته وعجبه نظامها وعجبته دماغ أحمد الصباغ -دا زمااااااان طبعاً ههههه- فاتصل بيه عن طريق الإيميل والفيس بوك وغيرهم .. طبعاً دا في حد ذاته إعتبره الصباغ محاولة تقرب وتلزيق من أيمن وإنه من نوعية الناس بتوع أبوس إيدك تعالى زور مدونتي على حد قوله...
ملحوظة في البداية: أنا كاتب البوست دا علشان ما أجاملش حد وطبعاً الإتنين ملاحظين إني ما رديتش عالمهزلة اللي كل واحد فيهم عاملها علي مدونته واللي بتتعارض طبعاً مع أخلاق المدونين المحترمين اللي هما أكبر فئة مثقفة وفاهمة في البلد... لذلك أرجو من الإتنين أيمن والصباغ يقروا الموضوع للآخر...
طبعاً كل واحد بيحاول ينشر مدونته وبيفرح بتعليقات الناس علي موضوعاته ودا في حد ذاته مش عيب ولا غلط وأنا من الناس دي ، فمعنى ذلك لما أيمن كان زمان يقولك يا صباغ شوف الموضوع دا؛ يبقا مش مذنب ودا اللي بحاول أوضحهولك... و مش معنى إن الصباغ بيبعت عالفيس بوك أو أوف لاين للناس اللي عنده عالليست في الإيميل عن موضوع بوست جديد علي مدونته يبقا بيدلل عليه يا حاج أيمن...
كل واحد نفسه لما يكتب بوست الناس كلها تعرف إنه كتبه وتيجي تعلق عنده مش عيب...
خلينا ندخل في تفاصيل المشكلة...
بداية المشكلة البوست دا اللي الصباغ قال فيه إن منظمة المؤتمر الإسلامي الأمريكي عزمته عالإفطار وكان معاه نااااااس كتير مسلمين ومسيحيين وكان ضمن الناس دي واحد بيقول إنه بهائي...طبعا أنا لما قريت المسيحيين عادي لأني عارف الهدف من المؤتمر وهو ترسيخ مباديء الوحدة الوطنية داااا مع المسيحيين لكن لما ألاقي بهائي معزوم وبيقولك الوحدة الوطنية معايا لأااا طبعاً مافيش حاجة إسمها نعترف ببهائي في مصر دا رأيي وبناءً عليه دخلت من باب العلم بالشيء عاللينك بتاع مدونة الأفندي البهائي اللي حطها الصباغ اللي هو دا وأشوف إيه النظام
وبقلب في المدونة وصلت للينك دا ... طبعاً كان الصباغ سابقني ومعلّق التعليق دا
أحمد الصباغ wrote @ الخميس, 11 سبتمبر, 2008 at 11:27 م
شادى والله سعدت جدا بلقائك وبزيارة مدونتك
والحقيقة القضية مأثرة فيا كتير
لسه ما تصفحتش المدونة بالتفصيل لكن كلامك حقيقى اثر فيا
وخلانى حاسس ان فى علينا دور لازم نقوم بيه
تحياتى ليك
احمد الصباغ

وطبعاً دخلت قولت رأيي اللي هو دا
د. محمد الجوهري wrote @ السبت, 20 سبتمبر, 2008 at 3:21 م
هههههههههههههه
طبعا لازم يدرسوا يا اسلامي يا مسيحي
لأن دولا ديانتين سماويتين من الثلاثة
وسأرد علي من يقول هل عندك اتصال مباشر بالله -تعالى الله عما يصفون-
عزيزي-عفواً لست عزيز-
آخر المرسلين من قبل الله عز وجل للبشر حاملاً دعوة للدين هو محمد بن عبدالله بن عبد المطلب بن هاشم
وقد ذكر في الإنجيل أي في الديانة التي كانت تسبقه
لكن أسألك
أذكر بهاء الله- تعالى الله عما يصفون- الذي تدّعون أنه الله في القرآن -الدين الذي سبقكم-؟؟؟؟؟
كل نبي له معجزات أخصّه الله بها كلمني عن معجزات بهاء الله ؟؟؟؟
أنا لست بذيئاً فلم أأت هاهنا لأسب
بل جئت لأُعلمك شيئاًومن يبتغي غير الإسلام دينا فلن يُقبل منه
——————————————————–
وأنتم أحرار سيدي بهائي مصري-سيدي ليست بالمعني أقصد تفخيما-
لا تقرأوا القرآن …
فهو أكبر معجزة حدثت حتى الآن ولا يوجد كتاب يماثله
لأنه ليس كلام بشر كبهاؤكم بل هو كلام الله المنزل على عبده ونبيه محمد رسول الله ليكون رحمة للعالمين

بعدها فوجئت بأيمن دخل بعد مني وعلق كدا

د/ ايمن القناوى wrote @ السبت, 20 سبتمبر, 2008 at 10:03 م
كنت هتصدم فيك يا جوهرى زى متصدمت فى واحد من اللى قبلك كان عامل فيها زعيم الظاهر افتكر نفسه شخصيه اجتماعيه عاقله بس بعد رده ظهر فعلا انه عيل تافه وبيلعب عزموه على الفطار ومسحه مخه
وانت يابنى يابهائى زادكم الله ضلالا من افعالكم وادعو الله ان يهديكم بس ياريت متقولش من دين عند الله لان دينك من الخمارات والكباريهات ومن عند الشيطان لشويه ناس مغيبه تماما انت بلا ديانه واهل رجس

ودا طبعاً كان سبب الخلاف الرئيسي .. إتنين مسلمين في شهر رمضان بيتخانقوا ويشتموا بعض علشان واحد بهائي ... مهزلة بمعنى الكلمة... طبعاً بلوم عليك يا أيمن أسلوبك وتوجيهك الكلام للصباغ وشتيمتك ليه، لأن إنتا داخل مدونة واحد تعلق ليه هو .. ومالكش دعوة بتعليق حد قبل منك هو حر شايف إن ليه دور إيه اللي مزعلك؟!! هو مقالش إن ليه دور في نشر البهائية زي ما إنتا شايف لأ هو يقصد إننا مصريين وإن البهائي دا مهما كان مصري ولازم نقبلة مع إختلاف دينه دا رأيه هو حر فيه، ودا طبعاً بعارضك فيه يا صباغ ... دا مش دين .. لما يخترعوا ديانة من وحي خيال قطقوط كدا مسمي نفسه بهاء بتاعهم ويقولوا إنها ديانة سماوية وإن عندهم نصوص كلام ربنا-تعالى الله عما يصفون- يبقا لا مؤاخذة مالهمش إلا ضرب الجزم وقليل أوي أوي اللي الحكومة بتعمله معاهم ...
دا كان سبب الخلاف واللي بناءً عليه أيمن هاجم الصباغ في تعليقه عند البهائي بس برضو بلوم عليك يا أيمن أسلوبك في الهجوم علي الصباغ ما جايز بيتريق ويقصد يقول مثلا لينا دور في إننا نطلّع البلي الأزرق علي عيونكم وعيون أهاليكم ههههههههههه ...
وطبعا أنا معترض علي كلمة إن ليك دور معاهم وإنك مقصر يا صباغ لأن أنا ضدهم...
بس برضو تعليق أيمن الأولاني عند البهائي بيوضّح إنه ما قراش بوست الصباغ للآخر ..هو شاف كلمة بهائي في الفطار إتجنن والدليل على كده إنه بيقول في رده الأولاني إنهم عزموه على الفطار ومسحوا مخه..
يا أيمن عاوز أوضحلك للمرة الألف اللي عزم الصباغ مش البهائيين دي مؤسسه عاوزة تدعم مبادئ الإيخاء والوحدة الوطنية والكلام الحمصي دا.. فأنا شايف إنها كانت المفروض إنها تعزم مسلمين ومسيحيين وشكراً، أما البهائي دا مالوش إعتراف عندنا بدينه اللي إخترعوه دا .. طبعاً مش دي قضيتي حالياً أنا بس بوضّح سبب الخلاف...
بعدها دخلت علي مدونة البهائي لقيته ما ردش وكان الصباغ قصادي عالميل كلمني عن أيمن وقاللي هو بيشتم ليه؟؟ أنا كلمته دا؟؟ قولتله هشوف وهكلمه وهرد عليك... قام أحمد قاللي بص لو هتكلمه صحيح قوله أحمد الصباغ ما عادش ليه علاقة بيك وبيحذرك من دخول مدونته تاني قولتله ماشي ... يعني أحمد ما بعتنيش يا عم أيمن علشان أكلمك لأني واحد من أتباعه زي ما خيالك رسملك لأ أنا اللي جيت أكلمك لوحدي للأسف لأني متوقع إنك صديق ودا العادي جاي أحل مشكلة معاك... وطبعاً من حقك يا صباغ ماتشوفش واحد غلط فيك علي مدونتك... إتصلت بأيمن عالتليفون مش عالميل زي ما بيقول في البوست هنا
وكلمته عادي وفتحنا في سيرة مدونة البهائي ببص لقيت اللي قام نازل شتيمة عالصباغ فبقوله يا أيمن هو ميقصدش كدا قاللي متبقاش غبي وطالما هو مع البهائيين يبقى بالجزمة قولتله أنا معاك ضد البهائيين قام قاللي وهو ماهواش ضدهم يبقا ضدنا إحنا.. قولتله لأ طبعاً أحمد بس بيقول إنهم مصريين في الآخر ، المهم كان نقاش طويل وكالعادة أيمن ما تعرفش تاخد منه حق ولا باطل في الكلام فقولتله في نهاية المكالمة طالما إنك مصمم على موقفك مع الصباغ يا سيدي إنت حر بس هو بيقولك إنه ما عادش ليه علاقة بيك وبيحذرك من دخول مدونته تاني .. وطبعا دا حقه
أما إني قولتلك هيأذيك بأسلوب السخرية بتاعك داااا الي في البوست فدا محصلش يا عم أيمن ... كمان عاوز أوضحلك نقطة مهمة جدا جدا وغايبة عن فكر سيادتك العميق أنا مش من اللي يبغون الرضا من الصباغ أو غيره ويبيعوا أهاليهم علشان يرضى عنهم زي ما إنتا واهم كل علاقتي بالصباغ إنه مجرد صديق محترم ومدون زميل أما موضوع الرضا والكلام اللذيذ بتاعك دا فالصباغ نفسه عارف إني الحمد لله مش كده ومش بس معاه والله لأ مع الكل أنا مبقولش إلا اللي يُمليه عليّ ضميري وكمان موضوع الرضا والكلام دا فدا كان الصباغ قاله عنك في البوست بتاعه دا إنك من الألاضيش الملزّقين اللى كان بيقعدوا يبعتوله رسايل ويمسحوا جوخ والرسايل كلها عنده من نوعية الناس اللى تلف على المدونات ابوس ايديكم تعالو زوروا مدونتى
يبقا لما تحب تقلب الكلام دا علي حد ما تقلبوش عليا أنا لأن مش ذنبي إني حاولت أحل المشكلة ودايماً أنا كده آجي أحل مشاكل الناس أقع أنا في المشاكل ... وإنتا تزعل من ناحية إزاي صاحبي وعشرة عمر ويقف مع الصباغ ضدي!! والصباغ يزعل من الناحية التانية إزاي نبقا حبايب وأصحاب وهو عارف إن أيمن فاهم غلط وما يقفش معايا ضده!! بص بقا إنتا وهو : أنا بقول اللي يُمليه عليّ َ ضميري بعد كدا اللي عاوزني كصديق أهلا وسهلاً بيه واللي مش عاوزني بصراحة ما يشرفنيش بعد الكلام دا إن واحد ذو عقل مغلق بالطريقة دي يكون صديق أو إنه يزعل مني علشان ما وقفتش جنبه عالباطل...
خلوني أكمل الحكاية... أيمن بيقول إنه علّق عند الصباغ -لما شاف إنه كاتب عن واحد بهائي- التعليق دا
ايه ده بهااااااااائى .. معلش الكلمه تقيله على ودانى
وأتبعه بالتعليق دا
الاختلاف فى الرأى لا يفسد للود قضيه ياضباغ .. او انا مكانك مكنتش هروح العزومه دى لان فيها مرتدين مش اصحاب ديانات.. تقبل تحياتى
والتعليق دا في موضوع الإفطاروطبعا دا كله قبل ما يروح مدونة البهائي...
ولما راح مدونة البهائي كتب تعليقه السابق اللي هاجم فيه الصباغ....
أيمن بقا بيقول إنه طبعاً اتنرفز لما لاقي الصباغ مسح تعليقاته على مدونته وكاتبله الرد دا

صاحب التعليق الوسخ .. الرمه يحاسب احسن اعلم عليه..

طبعاً لو الحوار زي ما أيمن قال ودا تعليق الصباغ يبقا طبعا انت غلطان يا صباغ لأنك شتمته ودي مش أخلاق مسلم مدون وكمان برضو نعذرك لأنك إتشتمت على مدونة البهائي فلما شوفت تعليقه كنت أصلاً متضايق منه فكان دا رد فعلك الطبيعي ، بعدها دخل أيمن مدونة البهائي وكتب تعليق للبهائي مش للصباغ بيسأله إيه الفرق بين البهائية وعبدة الشيطان؟؟ قام الصباغ قال للبهائي أفندي كرد بعد أيمن

أحمد الصباغ wrote @ الأثنين, 22 سبتمبر, 2008 at 4:18 م
شادى
متهيألى تمسح التعليقات دى وتكبر دماغك

طبعاً في دي إنت غلطاااان يا صباغ هو ما وجهلكش كلام هو بيكلم البهائي إيه دخّلك؟؟ بس مش دا المهم عارفين ايه المهم يا أيمن إنت والصباغ؟!!؟؟
خليني أسألك سؤال إنت وهو ليه البهائي ما مسحش التعليقات مع إنها فيها بستفة ليه؟؟؟ ومع إن دا كان هيحل مشكلة كبيرة؟!!؟
هل ياتري لأنه جبِّلة وماعندوش دم؟؟ دا أكيد طبعاً بس خليني أقولكم ليه...
عارفين ليه ما مسحش التعليقات يا عم الصباغ إنت وأيمن ؟؟
علشان يخليكوا يا إتنين مسلمين أزكياء تحاربوا في بعض وهو ييجي يسقف ويقول لكم ولّعوا في بعض وانشروا البهائية أكتر وطبعاً يبان قدام الناس إنه مبيردش لأنه محترم وتعاليم دينه السماوية-ههأأو يا سماوية- بتقوله لا تحارب وإن كنت ستموت ههههههههه ويسيبكوا بقا تشتموا وتسبوا في بعض وتخسروا بعض.أظن كلامي منطقي!!؟

خليني أكمّل منك له ... دخل أيمن وعلّق بعد ما أحمد طلب من شادي أفندي البهائي يمسح التعليقات وهو ولااا سأل فيه وقام قال لأحمد
د/ ايمن القناوى wrote @ الأثنين, 22 سبتمبر, 2008 at 9:43 م
ههههههههههههه
شخص حقير والله زى ممسحتها من عندك ومن عندى صح بتدارى كلامك
وبعدين ايه هعلم عليك اللى انت كتبتها على مدونتك يا حضرت
هو انت بقه اللى بتعلم.. ولا انت ماشى بمطوه تعلم بيها على الناس
بص انا بنسحب من اى حوار مع امثالك لانى مش فاضى للمهزله دى

قام أحمد رد بدون توجيه أي سب أو شتيمة رد علي أيمن وقال

أحمد الصباغ wrote @ الثلاثاء, 23 سبتمبر, 2008 at 5:33 ص
شخص حقير والله زى ممسحتها من عندك ومن عندى صح بتدارى كلامك
انا شخص حقير ؟؟

دخلت أنا بالليل لقيت الردود علي مدونة البهائي رديت أنا قائلاً

د. محمد الجوهري wrote @ الثلاثاء, 23 سبتمبر, 2008 at 8:54 ص
أيمن
عيب أوي كداااااااا
بجدعيب يا أيمن
لايجوز أن تسب أي أحد مهما كاااااااان
بخاااااااااصة وإنك مش علي مدونتك
إعمل اللي انتا عاوزه علي مدونتك
ونصيحة من أخ
بطل بقااااااااا
في مثل بيقول ” كل واحد متعلق من عرقوبه”
سيب البهائي هو حر يعبد اللي يعبده مالكش دعوة بيه طالما ما غلطش فيك
وصراحة أنا شايف انك بدأت الغلط في أحمد الصباغ بدون وجه حق
هو حررررررر
يحب اللي يحبه يا عمدا مزعلك في ايه؟؟؟؟
هو شايف ان عليه دور هو قال هو ايه؟؟؟
لما الصباغ يقول أنا بساند نشر الدين البهائي علي مدونته ساعتها ليك الحق تعترض
وطبعا الصباغ مسلم بيتعامل بمبدأ ” لكم دينكم ولي دين”
لكن استحالة في يوم يقول أنا بدعو لنشر البهائية لأن دا طبعا دين غير دينه وهو وااااااثق انه مش سماوي لأن آخر الأديان السماوية هو الإسلام
دااااااا اللي أعرفه عن الصباااااااغ
وكفاية كدااااا بقا يا أيمن لأني تعبت من الحوار دااااااا
أنا آسف يا شادي بس أنا بوجه كلامي لاتنين مسلمين
——————————
أما عن ردي السابق
فدا كنت برد فيه علي كلامك أولا
وعلي بيلو أفندي اللذيذ
اللي بيقول عندك اتصال مباشر بالله-تعالي الله عما يصفون- علشان تقول ان البهائية دين مش سماوي؟؟
هرد تاني بأسلوبك لأن دا هو أسلوب الرد علي المجادلين مثله
هعكس السؤال وهسأله :
وهل عندك اتصال مباشر بالله-تعالي الله عما يصفون- علشان تقول ان البهائية دين سماوي؟؟؟
إثبت بالدليل القاااااااطع ههههه وابقا قابلني وأنا أثبت
هقولك حاجة ما تحاولش تثبت إن دينك علي صواب أمام دين راسخ قوي الأركان منذ ما يقارب من الألف وخمسمائة عام
بس خلاص

شوية وأيمن دخل عالميل فكلمته ودي كانت أول مرة نتكلم عالميل في الموضوع داااا مش زي ما هو قال إن الصباغ باعتني له عالميل علشان أكلمه وقولتله يا عم إنت مالك ومال الصباغ ؟؟ بتشتمه ليه عند البهائي؟؟ إنت حر تقول اللي إنت عاوزه للبهائي وهو برضو حر.. أُفاجأ بوابل من الشتائم القبيحة جداً توجه لي من قبل عم أيمن وقاللي انت بتجامله على قفا أهلي!! إيه التعليق دا؟؟ يقصد التعليق اللي بقوله فيه عيب عند البهائي...
يا عم أيمن أنا مش شايف إن في دا مجاملة للصباغ ..أنا بس بقولك إن أسلوبك غلط...
المهم شوية وعم أيمن قاللي: بص كبر دماغك ومالكش دعوة.. قولتله أنا ماليش دعوة إنت حر أنا قولتلك اللي عندي ... ثواني وقام شاتمني بشتيمة قذرة وقام قافل الميل وماشي..
مش هرد عليك يا أيمن ولا هقولك لسان المرء جزءٌ منه فإن كان حسناً فهو حسنٌ وإن كان قذراً فهو قذرٌ ... لا طبعاً مش مشكلة يا أيمن ربنا يسامحك...
بعد كدا قام أحمد بعد الفجر عمل البوست دا..
وطبعاً بعيب عليك يا صباغ الشتائم الكثيرة اللي فيه والألفاظ اللي لا يجوز أن يكتبها مدون محترم كالصباغ ..
بس يا عم أيمن لاحظت إنه قال في البوست إنه بعتلك إعتذار نص متر.. هو قال كدا في البوست .. طب ليه ما قبلتش إعتذارة يا أيمن؟؟
نكمل.. طبعاً أيمن ما سكتش عالبوست بتاع الصباغ ...مافيش خاااالص أكون أنا عند الله الأفضل في شهر زي دا لأاااا إزااااي!!؟؟ ... قام عامل البوست دا وطبعاً بألفاظ بقا ما يتوصاش ..
طبعاً بقولك تاااااااااني عيب يا أيمن وإنت كمان عيب أوي يا صباغ الألفاظ دي يا جماعة..
إنتم ناس قدوة لقراءكم علموهم إزاي يتكلموا بإحترام وإزاي في أسلوب متمدن محترم في الحوار.. مش همجية زي الجهلة ولا مؤاخذة..
قبل ما أختم كلامي: كلمة ليك يا أيمن بعيداً عن الموضوع بس متعلقه بيه
أنا عملتلك إيه علشان تزعل مني كدا؟؟... بص إنت قولت عن الصباغ بسخرية متمسحنيش من بلوجر وقولت الصباغ مالوش سلطة على حد وإن كلنا زيه... طبعا الصباغ عارف دا كويس لكن المشكلة إنك إنت اللي مش عارفه هقولك ليه... المنتدى اللي عملناه سوا ومعانا أسعد وغيرهم لبلدنا واللي لحد النهاردة أنا حاطط لسه الدعاية بتاعته علي السايد بار في مدونتي بالرغم من إنك إنت نفسك شيلتها أنا بقا ما شيلتهاش؛ مش أنا كنت ماسك مشرف قسمين فيه؟؟ طبعاً بعد المشكلة مع الصباغ شيلتني من الإشراف علي القسمين اللي أنا أصلا ماسكهم إختياري -بمزاجي يعني- علي فكرة مش هعيط ومش فارقة معايا كتير بس أنا بقولك إني لما دخلت المنتدى دا كان علشان متزعلش وطلعت منه وإنت زعلان عموماً إنت أكدتلي إنك بجد ما عندكش عزيز زي ما الناس فعلاً كانت بتقولّي وكنت بكذِّبهم وطبعاً نفس الكلام عملته معاك في فهرس المدونات المصرية اللي أنا أصلاً كنت معاك فيه أيام ما كان لسه فكرة وقولتلك إزاي تنشره والناس تعرفه بالكود اللي يخلي الناس يضيفوه لمدوناتهم واللي كان فكرتي لو تفتكر ومع ذلك شيلتني منه مع إني كنت تاني واحد وطبعااااا ما يهمنيش ولا فارق معايا .. وكمان شيلتني من مدونات صديقة عندك وبرضو متفرقش معايااااا...
أنا بس بوضحلك إنك كررت نفس الكلام اللي كنت بتنتقد الصباغ وبتقول إنه عمله بس للأسف نفذته علي واحد صاحبك عشرة عمر.
------------------------------------------------
ختاماً: يا أيمن ويا صباغ
أنا عمري ما كنت تابع لحد ولا بتودد لحد وأنا مبحبوش ولا من الأذيال يا عم أيمن .. أنا قولتلكم اللي عندي واللي يُمليه عليّ الضمير وربنا يعلم موضوعكم دا تعبني نفسياً قد إيه ... لكن هقولكم كلمة النهاية..
اللي بعد الكلام دا لسه معتبرني صديق أهلا بيه وعلى راسي من فوق...
واللي مش عاجبه آسف إني أقوله إني ما يشرفنيش بعد النهاردة إني أعرف واحد بالعقلية المغلقة والمتخلفة دي.
وأتمني إنكم إنتم الإتنين تعرفوا مين محمد الجوهري.وأتمني ما أخسركمش إنتم الإتنين إلا إذا كان فيكم حد ينطبق عليه كلامي.وساعتها مش هزعل عليه أوعدكم بدااا.
عذراً للإطاله بس كان لازم أوضّح الموضوع كله.
تحياتي للجميع
دمتم سالمين

٢١‏/٠٩‏/٢٠٠٨

ضيـف كــــــــــــريم ونــــــوّرنا

ضيـف كــــــــــــريم ونــــــوّرنا
شهـــــر بحـــــالة في ديــــارنا
أهـــلا بيـــك يـا شهـر الصــوم
وهـــل هــــــلالك يــا قمــــــرنا
*********
مــن إمــــــــــــــتى بنـحسبـــلك
وبالمليــــــــــــــــــــم نـــــرتبلك
وعـنينـا بتنـســـــى النــــــــــوم
مع قدومك وبـــالفوانيس ننورلك
*********
وعالسفــــــرة بنتجمـــــــــــــع
والضحكـــــة تعلــــى وتلعلــــع
بــــلاش البصل بـــــلاش التوم
أحســن في الصـلاة ببقا هفرقع
*********
يــا شهــــر الخــــير والبــركات
يــا نــور ومنـــوّر السمـــــاوات
ببركـــــاتك نقـــــوملك قــــــــوم
ونــــــزود رصـــــــيد حســــنات
*********
ناســــــيين ربنا الــرحــــــــــــيم
وإنه بحـــــــال عــــــباده عليــــم
ياريت عالزمـــــن نبطل لـــــــوم
وندعــي لرب إســــــــمه كريــــم
*********
قـــــــوم ســــــبَّح وقـــــــوم صلي
ولإســــــم رب كــــــــــريم عــــلّي
دا شـــــهر يعني تلاتين يــــــــــوم
بالـــــــذكر للســـــــــانك ســــــــلّي
*********
يا أحــــــــلى ما فــــــيك الصــــيام
وصـــــــــــلاة الفجـــــر والقـــــيام
ونشـــــــــــرب تمــــــــــر ولا دوم
مــــبارك وبعـــــــــــوده الأيـــــــام
*******
----------------------------------------
ملحوظة: القصيدة دي عملتها بعد ما خلصت اللي فاتت بسويعات بجد حاسس إني اتعلمت فيهم كتير جداً من أسلوب الرائع الراحل صلاح جاهين. أتمنى تعجبكم. وفي انتظار تعليقاتكم والتي تضفي عليّ إحساساً بالسعادة.
ملحوظة تانية معلش: طبعا كوووووووول قصيدة هنقول: القصائد دي بيُبذل فيها مجهود ذهني فظيع والله العظيم تلاتة. لذلك ومن هذا المنطلق-حلوة المنطلق دي- حقوق ملكيتها الفكرية محفوظة لمدونتي -يعني اللطش ممنوع يا اخواننا-.وأي حد يحب ينشرها يقول مصدرها أو يستأذن من صاحبها اللي هو أنااااا د. محمد الجوهري
دمتم سالمين.

١٧‏/٠٩‏/٢٠٠٨

حكـــــــــايـة إنســــــــان بســــــــــيط

فـــــــــــــاكر في يـــــوم إتلمينا حــــوالين جــــــــــدنا
وعـمــلنا دايـــــــرة وحـــاوطــناه بيـهـــــــــا كلـــــــنا
كــــــان الحـــــب مجــمعــنا وهـــــو قاعـــد وسطـــــنا
بصِّــلنا واحــــــــــــــــد واحــــــــــــــــــد وقــــال لــنا
عـــــــــاوز إيـــه منـــك لــه لهــــا مني أنــــــــــــا ؟؟
**********
قـــولنالـه يـــــلا يا جــــــــــدو إحكيلنا حــــــــدوتـــــة
بس تكــــون حلـــــــــوة ومتكــونشي ملتـــــــــــوتـــة
بصِّلنا وقال خلاص أحــكيلكم عن القطــــــة الزغنطوطة
بصـــت هــــناء لجـــــــــــــدو وهـــيا مـش مبســـوطة
وقالتله مش نــاقص إلا تحكيلنا عــــــــن فـطــــوطــــة
**********
طبطب علـيهــا وقــــــــــال لهـــا يـا بنتي حيـرتينـــــي
طـَب عـــــــــــــــــاوزه إيـــه بس قوليلـي دِلّــيني ؟؟؟؟
قـالتلـــه حــــــــــــــدوتـــــــة حلــــــــــــــوة تشـجيني
ولا انتـا بـس شــــــــــــــــــاطـــر تقـــــولــي جننتيني
قـــــال لــها هــــــــاحكيلك يــــا لمــاضة مــــــن عيني
**********
بـس اسـمــــــــــع وركِّـــز معــــايــا وبص فــي عـنيـا
أنــــا هـحـــــكـي حـــــــــدوتــــة مــش هــغـني أغـنية
طــــــرطأ ودانـك يـــــــــــــا واد إنتــــــا وهـيـــــــــــا
هحــــكيلكــم حكــــــــايــــة واحـــــــــــنا فـ الصـبحيــة
وبـعـــدهــا تـاكـلـوا مـن إيـــــد سِتُـكُم طبــــق المهلبيـة
**********
قــــولنـالـه يـــلا يـــا جـــــــــدو جـننتنـا جـنـــااااااااان
قـالّـنا طب إصحوا معــــــــــــــــايا وطرطأوا الـــــودان
وإنتي يا هـــــــــــناء صحصحي وارمـــــــي اللبــــــان
كـــان يـــــــامــا كـــــان ... كــان فــي إنــســــــــــان

مكـســــور غـلبـــــان ... كــــــل أملـه يعيش في أمـان
**********
إنـســــــــــــــــان طـــــيّب
ولــــــــــــربــــــه قُريّـــب
شـــــــــــاف ظـــــــــــــــــــــــــروف والله تـشّــــيـِب
مـــــا عُـــمـــــــــــره في يــــــــــوم علي شــيء عيِّب
بـجـــــــــــد بـجـــــــــــد... إنـســــــــــــــــــان طـيب
**********
دا كــــــــــــان إنـســـــان .. بـــدائـــــي قــــــديـــــــم
مــش أي بـدائــــــــي ... دا بـدائـــــــــي عـــــــــظيم
إتـعـلـم يـــــــزرع خُــضــــــــــــرة وبـرســـــــــــــــيم
وبـــــإيده الصـحــــــــــــــــرا ... بقـت نعــــــــــــــيم
بــــالذمـــــة دة ... مــــش يـبـقـــــــــــا عظــــــــيم؟؟
**********
ومــن زمــــــــــان .. صـــــنع حـضـــــــــــــــــــــارة
بـنى هـــــــــــــــــــــرم ... مـــــــــــن الحجـــــــــارة
وفـــي إســــكنـــدريـــة ... نـــوّر منــــــــــــــــــــارة
وقعــت مع الـــــــزلــزال ... مــا تقــــولشي غـارة !!
يــــا خســـــــــــــــــــــــــارة يـا خســــــــــــــــــــارة
**********
حَكَـــــــمُه نــــاس شُــــــــــــــــــــداد شُـــــــــــــــداد
زي قــــراقــــــــــــوش وزي فــــــــــــــــــــــــــــؤاد
ومـــــع كــــــــــــــل دا إصــــــــــــــــــــــــــراره زاد
مــــــــــــــــــــين يغـلبه في العــــــــــــــــــــــــــناد!!
مـش أي حـــــــــــــــد ... دا بـجـــــــــــــــــــــــد واد
**********
وعـالـفـســـــــــــــاد ثـــــــــــــــــــار وثــــــــــــــــار
وكــــــــوِّن جـــــــــــــــماعـــة الـضُـبـاط الأحـــــــرار
طبعاً جـمـــــــــــــــــــــــال صـــــــــاحــب القــــــــرار
حــــــــــــــاكــــــم قــــــوي نــــــــــــــور ونــــــــــار
حــــارب الـفـســــــــــــــاد والإســــــــــــــــــــــتعمـار
**********
شـاف الفـيـضــــــــــان بنالـنا ســــــــــــــــــــــــــــــد
عالميـة عـــــــــــــالــــــي ... ومـــــــا قــــده قــــــــد
حـجــــــــــــــــــــــــــز الفـيـضــــــــــان ... ورده رد
ومات جــمـــــــــــــــــــــــــــال ... مـــات الـجـســـــد
وســـــــــــــــاب ذكـــــــرى ... حـــــــاكـم أســــــــــد
**********
مســـــك الحُـكـــــم الســـــــــــــــــــــــــــــــــــــــادات
جــــــاب الـنــصـــــر ... دمّـــــــــــر إيـــــــــــــــلات
حـطّـــــم بــارلــيــــــف ... فــي ســــــت ســــاعـــات
ملِك أكتــــــــوبــــــــر ... ولـــه في السلام أروع آيات
ومـــات شــــــهيـد وأعــمــــاله إتحسبت من الصالحات
**********
ومســــــكـنا حـســــــــني فــي اتـنـيــن وتـمــــــــانيـن
وعيـشـــــــــــنــــا مـعـــــــــــــاه ســـنـيـن وســـنـيـن
كُـــنا عـــــــــــــايـشــــين وكُــــــــنا مـبســـــــــوطـين
لـيـه الـفـســـــــاد ظـهــر آخــــر خمس ست سنين ؟؟؟
لـيـه الـكـوســـة والســـــــــرقة فـي بــلـدنـــــا مقطعين
**********
لـيـه بـقــت الــحــــــــــــــــــالــة زي الـطــــــــين ؟؟؟
لا مـــــــؤاخذة يــا ريـــس ... إحـــنا بني آدمـــــــــين
والــرســــول الـكـــــريم قـــــــــال كـــلنا متـســـاوييـن
بـســـــــــألك الـحـــاشـيـة ليــــــــــــــــه عـالـييـن ؟؟؟
ليــــــــه دايسين على روس غـــلابة مطحـــــونين ؟؟؟
**********
مبلــــــــومـش عـليـك يــــــا ريـس دانــــــا بــدعـيـلك
وزي مـــا قــــال الشعـــــراوي بقـــــــول ربنا يـديــلك
وتقـــــــــدر تـخــــــلِّـد ذكــــــــــرى زي ســــابـقـينـك
وإلا مـــــــــن رب العبـــــــــــــــــــاد يــــــــــا ويـــلك
بـدعـيـلك مــــن قـلـبـي ربـنــــــا لـصــــوابـك يـهـديـك
**********
بـكـــــــــده خــلصـــــت حـــدوتة الإنـســـــان الجمـيـل
عــــــــارفـــين دا مـين يــــــــاولاد؟؟ دا ابـن الـنيـــــل
اللـــي شــاف الـعـــــز- قصـدي الخير- وشاف الـويل
و بـرضـــــــــو لسه صـــــامد ... أصــل أصله أصــيل
وأصله بـرضــو عارف ... تـــاريــخــــــــــه الطويـــل
**********
وتـــــــــــوتــــة تـــــــــــوتـــــة
خـلـصـــــــت الـحـــــــــــــدوتــة
يـــــــــارب تــكـــــون حــلـــــوة
ومتكـــونشـــي ملتـــــــــــوتــــة
ولا تكون قديمـة وعليها عنكبوتة
******

----------------------------

ملحوظة: القصيدة دي بكتب فيها من فترة كبيرة بس غيرت كتير في شكلها يعني مكانتشي واخدة شكل الحدوتة وعدلتها ... أتمني تعجبكم يااااارب .
ملحوظة زوغنطوطة كمان معلش: يا جماعة والله القصايد دي بيتبذل فيها مجهود ذهني كبير.. فياريت اللي يحب ينقلها ... ينسبها لصاحبها ... وحقوق الملكية الفكرية محفوظة للمدونة .. وكل عام وأنتم بخير .. وانتظروا القصيدة القادمة .. بخلص فيهااااا ...

دمتم سالمين
د. محمد الجوهري.

١٠‏/٠٩‏/٢٠٠٨

إلى متى سيظل هذا الفساد؟؟

قراء المدونة الأعزاء .. مرحباً بكم من جديد
أمسك بقلمي وأدعوه ليتحرك ولا أدري حقاً في أي موضوع سيتكلم
بداخل صدري كالبركان إن لم يزد ... أتساءل لِمَ كل هذا الفساد؟؟ فمن غرق طائرة إلي انفجار قطار إلي غرق عبّارة يحمل جميعها بشر مسالمون إلى ..إلي ..
أتساءل.. إلي متي سيظل هذا الشعب الجسور صامداً وصامتاً أمام تلك المحن؟؟ رأينا جميعاً حادثة الدويقة وكيف تتحول حياة أناسٌ بسطاء إلي ذكرى في ثوانٍ معدودة .. أناس لا يحلمون بقصور ، لا يحلمون بمليارات الدولارات، لا يحلمون بأفخم السيارات .. كل ما يحلمون به مجرد أربعة جدران تحيطهم و رغيف خبز يسد جوعهم ... تلك هي أحلام قاطني ذاك الحي بجوار المقطم والذي انهالت صخوره عليهم لتبيدهم بأحلامهم البسيطة... فماذا اقترفوا وما جنايتهم ؟!!؟؟ .. أعتقد جنايتهم أنهم ليسوا أغنياء ولا يملكون ثمن وحدات سكنية بمناطق راقية تؤمن لهم حياة كريمة بعيداً عن العشوائيات ... أسمع منذ صغري أن أجزاء من جبل المقطم تنهار وتهوي كل فترة فماذا فعلت حكومتنا؟؟ .. أين دور الوزارات المختلفة ؟؟ .. أين دور وزارة الداخلية مثلاً ؟؟ .. أتساءل .. هل عمل وزارة الداخلية فقط هو محاربة الإجرام؟؟ .. هل هذا الأمر ليس أكبر؟؟ .. ألا يستحق إهتماماً أكثر؟؟ .. أين دور وزارة التضامن الإجتماعي في توفير أماكن إقامة للناجين وأسرهم ؟؟
تخيل أنك جالس في منزلك وحدث لك هذا!! ونجوت .. ماذا سيكون شعورك ؟؟ .. سيقول من يقول أن هذا قدر الله .. نعم قدّر الله وما شاء فعل .. ولكن أأرواح الناس زهيدة لتلك الدرجة كي لا نحاول مساعدتهم وإخراج الأحياء منهم من تحت الأنقاض ؟؟ ... أليس لأمواتهم حُرمة وليس لهم الحق في الدفن مع أهليهم ؟؟ أم أن مكان الحادث اعتبرته الحكومة مقبرة جماعية لهم؟؟ .. أتساءل.. لماذا لا نرى تحركات لإزالة الأنقاض وإسعاف الجرحي والأحياء إن كان مازال فيهم أحياء بعد ذاك الوقت وانتشال جثث الضحايا لدفنها شرعياً !!؟؟ .. أليس لهم الحق في الدفن الشرعي؟؟ .. لماذا لا نري محاولات لإنقاذ الأحياء ؟؟.. أم تريدون أن يحسبوا جميعاً أموات فهي فرصة لتحجيم عدد السكان فقد اقتربنا من المائة مليون نسمة!!... أُريد أن أفهم لماذا لا تُزال الأنقاض والوقت يمُر ومن الممكن أن يكون حياً مؤكد سيموت من الجوع والعطش أو من الجرح .. تسعون ساعة ويزيد مرت وكل ما نراه تجمهر الناس ...

السؤال .. إلى متى سيظل ذاك الفساد؟؟ .. فكل يوم يتقدم الحال من سيء لأسوء .. فمنذ أيام شاهدنا جمياً حريق مجلس الشورى .. أُفاجأ بتعليقات الناس سعيدة لهذا الحدث!!... ما وجه استفادتنا من احتراق المبنى!!؟؟ .. هل زال الفساد!!؟؟ .. كلا بل سيزداد...
خود عندك تكاليف ترميم وإعادة هيكلة وبناء وتشطيبات وطبعاً السبوبة اللي لازم تطلع من وراء ظهر الحكومة وبح بح بقاااا علي رأي نجيب الريحاني وهو بيعمل ميزانية الخروف ...
ماذا إستفدنا غير تلك الخسائر!!؟؟ .. هل تلك التكاليف ليست كافية لبناء مســاكن لهؤلاء المحدودي الدخل في الدويقة؟؟

لا يا جوهري .. هذه نقرة وهذه نقرة أخرى ..

طب إزاي يا عم الحاج وضح كدا يمكن أفهم...
أتريد من أعضاء المجلس الموقرين المحترمين أصحاب الحصانات والمراكز أن ينامو-عفواً أن يجلسوا- في أماكن قليلة الفخامة؟؟ ... كــلا بل لا بد أن يكون من أفخم الأماكن وكأنه مول تجاري فاخر.. وهؤلاء المحدودي الدخل يموتوا ولا أحد يسأل عنهم فهم ليسوا أصحاب مراكز أو حصانات ... والناجون منهم يرمونهم في أي معسكر إيواء ومنهم من سيتعفف وسيقيم عند بعض أقاربه لحين ميسرة ... أتساءل .. إلي متى سيظل ذاك الفساد قائماً ؟؟

أنا لا تعنيني الأمور السياسية ولا أتكلم حالياً عنها، أتكلم الآن عن حياة الناس والتي من المفترض أن تكون الشغل الشاغل للحكومة .. أدعوك لتنظر حال الدول من حولك .. إذا حدث أمر كهذا بأمريكا مثلاً تقوم الدنيا ولا تقعد وبالرغم من أنه لن يكون حجم خسائر الأرواح بهذا العدد .. إنظر معي لإسرائيل حينما يسقط جندي منهم علي يد جماعات فلسطينية تقوم الدنيا ولا تقعد ويتوعدوا بالرد ويوقعوا في المقابل عشراً .. أتساءل لماذا في مصر حياة الناس زهيدة؟؟ أهذا بسبب كثرة عدد السكان؟؟ أم ماذا؟؟ .. أري تخاذلاً كبيراً من الحكومة تجاه تلك الأرواح...
فكل ما أراه في نشرات الأخبار بالتلفاز .. إستقبل السيد الرئيس إتصالا هاتفي من رئيس دولة الإمارات مثلاً أو.. أو.. أعرب فيها عن حزنه العميق لفقدان ضحايا حادث الدويقة.... حزنه العميق آه وبعدين؟!!؟
بس .. حزنه العميق وشكراً.
لا يا أخي متظلمهوش
أعرب فيها عن حزنه العميق ومواساته لأُسر الضحايا .. ههههههههههههههه
لا والله الناس دي تُشكر بجد .. كفاية انهم بيواسونا وغيرهم مش معبرنا ...
ختاماً أتساءل .. إلي متي سيظل هذا الفساد؟؟
في انتظار تعليقاتكم فربما يكون بها ما يريحني.
دمتم سالمين.

د. محمد الجوهري

٠٤‏/٠٩‏/٢٠٠٨

قصة شجرة التفاح


A long time ago, there was a huge apple tree
في قديم الزمان ... كان هناك شجرة تفاح ضخمة
A little boy loved to come and play around it everyday
و كان هناك طفل صغير يلعب حول هذه الشجرة كل يوم ..
He climbed to the treetop, ate the apples, took a nap under the shadow
كان يتسلق أغصان الشجرة ويأكل من ثمارها ... ثم يغفو قليلا لينام في ظلها ..
He loved the tree and the tree loved to play with him
كان يحب الشجرة وكانت الشجرة تحب أن تلعب معه
Time went by...the little boy had grown up
مر الزمن... وكبر الطفل
And he no longer played around the tree every day
ولم يعد يلعب حول الشجرة كل يوم
One day, the boy came back to the tree and he looked sad
في يوم من الأيام ... رجع الصبي وكان حزينا
"Come and play with me," the tree asked the boy
فقالت له الشجرة: تعال والعب معي
"I am no longer a kid, I won't play around trees any more"The boy replied
فأجابها الولد: لم أعد صغيرا لألعب حولك بعد الآن
"I want toys. I need money to buy them"
أنا أريد بعض اللعب وأحتاج بعض النقود لشرائها
Sorry, but I do not have money"the tree replied"
فأجابته الشجرة: أنا لا يوجد معي نقود
But you can pick all my apples and sell them.So, you will have money
.ولكن يمكنك أن تقطف كل التفاح الذي لدي وتبيعها
وبذلك تحصل على النقود
..The boy was so excited
.الولد كان سعيدا للغاية
He picked all the apples on the tree and left happily
فتسلق الشجرة وجمع كل ثمار التفاح التي عليها وغادر سعيدا
The boy never came back after he picked the apples
.لم يعد الولد بعد أن قطف الثمار ثانيةً
The tree was sad
.فأصبحت الشجرة حزينة
One day, the boy retrned after being a man
.وذات يوم عاد الولد بعد أن صار رجلا
And the tree was excited "Come and play with me" the tree said
كانت الشجرة في منتهى السعادة لعودته وقالت له: تعال والعب معي
I do not have time to play. I have to work for my family
ولكنه أجابها: لا يوجد وقت لدي للعب .. فقد أصبحت لي عائلة مسئولة مني.
We need a house for settling
ونحتاج لبيت يؤوينا
?Can you help me
هل يمكنك مساعدتي ؟
" Sorry"
آسفة
I do not have any house. But you can cut off my branchesTo build your house
فأنا ليس عندي بيت ولكن يمكنك أن تأخذ جميع أغصاني لتبني بها بيتا لك...
" So the man took all the branches of the tree and left happily
فأخذ الرجل كل الأغصان وغادر وهو سعيد
The tree was glad to see him happy but the man never came back since then
.كانت الشجرة مسرورة لرؤيته سعيدا ... لكن الرجل لم يعد لها من حينها.
The tree was again lonely and sad
فأصبحت الشجرة وحيدة و حزينة مرة أخرى
One hot summer day
,وفي يوم حار من ايام الصيف
The man returned and the tree was delighted
.عاد الرجل .. وكانت الشجرة في منتهى السعادة
Come and play with me!" the tree said"
فقالت له الشجرة: تعال والعب معي
"I am getting old. I want to go sailing away to relax myself
فقال لها الرجل لقد تقدمت في السن... وأريد أن أبحر لأي مكان لأرتاح
Can you give me a boat?",Said the man"
فقال لها الرجل: هل يمكنك إعطائي مركبا.
"Use my trunk to build your boat You can sail far away and be happy"
فأجابته: خذ جذعي لبناء مركبا وبعدها يمكنك أن تبحر به بعيداوتكون سعيدا
" So the man cut the tree trunk to make a boat"
فقطع الرجل جذع الشجرة وصنع مركبا
He went sailing and never returned for a long time
فسافر مبحرا ولم يعد لمدة طويلة
Finally, the man returned after many years
أخيرا عاد الرجل بعد عدة سنوات.

the tree looked with a ray of hope and said
You must remembered me and came to play with me don't you
فنظرت الشجرة بعين ممتلئة بالأمل وقالت " لابد أنك تذكرتني وجئت لتلعب معي أليس كذلك؟ ".

I'm sick,tired, have no power to play with you anymore and have nothing , can you help me?" Replied the old man
فرد العجوز : " لقد أصبحت مريضاًً ، متعباً، ولم يعد لدي القدرة علي اللعب الآن وليس معي أي شيء، هل بإمكانك مساعدتي؟".
"Sorry, my boy. But I do not have anything for you anymore"
ولكن الشجرة قالت له : " آسفة يا بني .. لم يعد عندي أي شئ أعطيه لك"
No more apples nor trunk for you to climb on, I really don't have anything for you to help with" ,The tree said
وقالت له: لم يعد لدي التفاح ولا الجذع لتتسلقه، وصدقني ليس عندي ما أساعدك به.

No problem, I do not have any teeth to gnaw and I am too old to climb rightnow" ,The man replied
قال لها: لا عليك لم يعد عندي أي أسنان لأقضمها بها، ولقد صرت عجوزاً ولا أستطيع التسلق.

The only thing left is my dying roots,"The tree said with tears
قالت وهي تبكي : " كل ما تبقى لدي جذور ميتة".
I do not need more, just a place to rest
فأجابها: كل ما أحتاجه الآن هو مكان لأستريح فيه
I am tired after all these years" the man replied
.فأنا متعب بعد كل هذه السنين
"Good! Old tree roots are the best place to lean on and rest
فأجابته: جذور الشجرة العجوز هي أنسب مكان لك لتتكيء عليه وترتاح.
Come, come sit down with me and rest
تعال .. تعال واجلس معي لتستريح
The old man sat down and the tree was glad and smiled with tears
جلس العجوز ... كانت الشجرة سعيدة ... تبسمت والدموع تملأعينيها
At the end : Do you know who is this tree?...This is your parent
That always provides you with tenderness and safty
وفي النهاية ، هل تعرف من هي هذه الشجرة ؟... إنها أبويك ...
اللذين لطالما أمدوك بالحنان والأمان.
Please narrate this story to all your friends and your relatives
رجاءً أن تقص هذه القصة على أصدقائك وأقاربك

Finally: I hope you
"Love your Parents"
"حــــب والــــديــــك"
------------------------------------
ملحوظة:
لقد قرأت هذه القصه منذ فترة فقمت بنقلها وإعادة صياغتها وترجمتها بأسلوبي الخاص ولكن لم أجد لها مؤلف فقلت لابد أن أنوه أنها ليست من تاأليفي ولكن من رؤيتي وتعديلي وساهمت في ترجمة جزء كبير منها.... أتمني أن تنال إعجابكم ..
وفي انتظار تعليقاتكم.
دمتم سالمين.
وكل عام وأنتم بخير.