٠٧‏/١٢‏/٢٠٠٨

العيد فرحة ... مااااء

قراء المدونة الأعزاء... مرحباً بكم من جديد
كل عام وأنتم بخير
فها هي وقفة عيد الأضحى المبارك - الوقفة بتاعته أدام الله عزه - حيث يقف المسلمون من مشارق الأرض ومغاربها بجبل عرفات ملبين النداء داعين لله أن يعتق رقابهم من النار.
وها هو عيد الأضحى المبارك - برضوالعيد بتاعه أدام الله عزه لتااااني مرة - حيث نحتفل بفداء سيدنا إسمـــاعيل - عليه السلام - -بكبش عظيم - بما قدّره الله لنا من الرزق من الأنعام أسوةً بالمصطفى - صلى الله عليه وسلم - فذاك هو العيد الحق ... العيد الكبير... حقاً كبير المقام , كبير الفرحة ...
فكل عام وأنتم بخير...
طبعاً أنا كنت عملت قصيدة خروفية عظيمة في البوست السابق ولمن لم يقرأها ويريد أن يقرأها
الضغط هنا
ياريت تقولولي رأيكم في محاولتي لممارسه الجزارة في الصورة اللي فوق وتصاميمي الفوتوشوبية. مستني تعليقاتكم.


ذاك -العيد يعني- خير ختــــــــام إلى أن نلتقي بعد إمتحان البــــــاطــــنة في 8-1
إلى أن نلتقى رجاءً منكم جميعاً أن تدعوا لي بالتوفيق في الإمتحانات القادمة..آمين
خالص تقديري ... وكل سنة وأنتم كايند - طيبين يعني -


والسلام عليكم ورحمة الله وبركاته.

٢٣‏/١١‏/٢٠٠٨

الكابتن جوهري..عاد إليكم من جديد

قراء المدونة الأحباء... وحشتوني جداَ والله العظيم...
عاملين إيه وعايشين إزاي من غيري؟!!
أود في البداية أن أقدم شكر خاص أي سبيشيال ثانكس لشعبي العظيم - شعب ميت غمر والسودان والكونغوالدكتاتورية وزيمبابوي وأنجولا وتنزانيا - وذلك للمظاهرات الحاشدة التي قاموا بها في غيابي مطالبين بعودتي لدرجة أن الحكومة لم تستطع السيطرة على الموقف فاستعانت بقوة دولية من الولايات المتحدة فأرسل مستر أوباما باراك لي فاكساَ قال فيه:
عد لحكم وطنك.. الشعب محتاجلك يا كبير... وقالها بالإنجليزي طبعاَ.. من الشمال لليمين.. قال: عد لحكم وطنك يا بيج نياهاهاهاهاااا
بعتله رد بالإنجليزي طبعاََ ومن الشمال لليمين برضو علشان ميستقلش بينا.. قلت فيهَ:
والله يا أوباما ياخويا الحياة مشاغل والإمتحانات بقا إنتا سيد العارفين لسة انتا ناجح أهو ياخويا صباح وقر.. بس أوعــــــــــــــدك ... سنعود بعد قليل...
وطبعاَ بما إن العيد الكبير قرّب وكل سنة وحضراتكم طيبين فأنا لسه فاصل النت علشان لســـه إمتحان البـــــــاطنة في 8-1-2009 وعليكوا خير بس قلت لازم أدخل أهني شعبي الحبيب وزمايلي المـــــدونين وأنــــا وانتا ورقصني ياجدع -عفواَ الكي بورد بتهيس- طبعاَ لازم أهنيكم بالعيد الكبير ... البيج يعني .. كل سنة وانتم بألف خير ..
وبالمناسبة السعيدة دي
عملتلكم قصيدة عامية من صنع إيديا وحياة عنيا
يارب تعجبكم...
ملحوظة فلحوسة: أنا مرجعتش بشكل فعلي أنا لسه فاصل النت وهرجع بعد الباطنة بإذن الله أنا بس داخل أهنيكم بالعيد-كل عام وأنتم بخير- أول واحد يهنيكم أهو عدو الجمايل جملاية جملاية ودعواتكم بقا ليا بالتوفيق في الإمتحانات علشان أرجع لكم فايق.

والآن مع القصيدة

معــــــــــــــــــدي لقـــــــــيته قـــــــــــاعد
شـــــــــــايل الـهـــم ومتـــضـــــــــــــــايق
عـــــن بــــــاقي إخـــــــــواته بـــــــــــاعد
مــش لاقــــي حــــــــــد يســـــــــــــــــاعد
*********
قــــاعدين بيأكلوه ناقــــــص يجيبوله جاتوه
وهـــــــــــو للـــهم دايـــــــــــــــــــــــــــق
عــــــارف انه الوداع وهييجوا ويخــــونوه
وفـ نــــــــــومه تملي يحلم إنهـــــــم دبحـوه
*********
والدمـعـــــة فــــــي عينه حـــــــــــــــــايرة
نفسه.. يـــــــرجع من تــــــاني رايـــــــــق
يعمــــــــــــــــل وإخـــــــــــواته دايـــــــرة
والعصــــــافير فـــــــــــوقة طــــــــــــــايرة
*********
وبيـــــرجع بالسنين لــمـا كــــــان حـــــــمل
كـــــان وســـــط اصحـــــابه عـــــــــــــايق
وعالنجـيل يتـنـطـط مـــش حـاسـس بالمـــلل
لكـــــــــن نهايته قربت وبيسأل إيـه العمل!!
*********
إتخيل يــــــــوم العيد والنـــــــــاس فرحانين
نَفَسُه إتكــتم ... مــش طـــــــــــــــــــايـــق
مش قــــادر حتى يمأمأ... والناس مزأططين
وعم الجزار بيكبر وساننله ساطور وسكاكين
*********
صعبــان علــــيا يــا غـــالي والله كنت أصيل
لابس فـــــــروة ومتشيك لايــق والله لايــــق
متــــزعلش يا خــــــروفنا دا ربنا الجـــــــليل
إختــــارك إنتــا وبس وفــــدا بك إسمـــــاعيل
*********
فجـــــــــــــــــــــأة إبتـــسم وضحــــــكـــــلي
وقــــــــــــــــــاللي دانت فـــــــــــــاااااايق!!!
مـاتشــــــــــوف حــــــــــــد بــــــدالــــــــــي
أنــــــــا عـــــــــايز أربــــــي عيــــــــالي!!!


أتمنى تكون القصيدة عجبتكم ... ومنتظر تعليقاتكم اللي هتابعها من عالموبايل..
كل عام وأنت بخير وعيد أضحى مبارك أعاده الله عليكم بالخير واليمن والبركات
أشوفكم على خير إن ربنا أحيانا
خالص التقدير
دمتم سالمين
د. محمد الجوهري
ملك ميت غمر والسودان والكونغو الدكتاتورية وزيمبابوي وأنجولا وتنزانيا
.

١٠‏/١٠‏/٢٠٠٨

وداعـــــاً .. إلى أن نلتقي

قراء المدونة الأعزاء
زي ما هو واضح من عنوان البوست والصورة ... إني هغيب لفترة لا يعلمها إلا الله .. وذلك لظروف إمتحاناتي القهرية ... وإني لابد أن أذاكر وبجد علشان نخلص من السنادي على خير ... بكل صدق هتوحشوني .. هتوحشوني كتير أوي.
بجد حبيت التدوين وحبيتكم كووووووووولكم ...
بحب العالم ده وبحب اللي فيه ... أكيد هرجعلكم
ولو حتي مت بروحي هبقا معاكم لأني بجد بحبكم.
طبعاً كنت المفروض أجااااوب علي تاجين من نهال هانم(فري كيلر) في البوست ده
بس أوعدك يا نهاااال هرد عليهم لما أرجع بالمرة يكونوا إتنسوا ونااااااموا وأنا أجعلهم يُبعثوا من جديد هههههههههههههههه ....
هتوحشوني كتير أوي أوي
أنا عارف إني مش هقدر أبعد عنكم كتير... بس أنا هفصل النت ودا إختياري لأني بجد حاسس إني مش عارف أبعد فهفصل النت علشان أقدر أبعد شوية بسسسسس أخلص الإمتحانات وأرجع جري ههههههههههههه .
رجاء خاص لكل من أحبوا محمد الجوهري وكلمات محمد الجوهري ومدونة محمد الجوهري :
إدعولي كتير بالتوفيق في الإمتحاناااااااات ...
إدعولي دايماً: ربنا يسترها معاك يا جوهري ويوفقك في إمتحاناتك .. ما تقولوووو مش سامع أنا.... آمين.. ومتنساش ولك مثله ... يعني هتدعيلي ربنا يسترها معايا هيسترها معاك إنت كمااان ..
بجد هتوحشوني.. بحبكم كوووووولكم.
أنا برضو هدخل عالميل من الموبايل بين الفينة والفينة ههههههههههههههه اللي هوحشوا ممكن يبقا يقابلني عالميل بين الفيناااات...
ملحوظة: لهواة الربح المجاني من الإنترنت بساعة واحدة في اليــوم(30 دولار أمريكي أو أكثر حسب شغلك) مجرّب وأكيد
إشتركوا في هذا الجروب مع د. ياسر أسامة الجوهري إبن عمي وقولوا إنكم تبعي ههههههههههه هو معاه التفاصيل
خالص تقديري
د. محمد الجوهري

٠٧‏/١٠‏/٢٠٠٨

ملتقي مدوني الشرقية للمرة الأولي في التاريخ

زوار المدونة الأعزاء... مرحباً بكم من جديد...
كم أنا سعيد... أكتب إليكم اليوم عن يوم من أجمل الأيام التي قضيتها في حياتي...
كنا قد رتبنا كما في
البوست السابق لملتقي مدوني الشرقية الأول، وذلك لأنها كانت فكرة مسيطرة عليّ منذ فترة وقد كنت بحاجة لمن يشجعني، فتعرفت على أسماء جمعة صاحبة مدونة بنت الشمس ، والتي شجعتني كثيراً علي تنفيذ الفكرة لأنها أيضاً كانت تفكر فيها وجاءت لتعرضها عليّ ، فكرنا في اللقاء فكان لابد من مكان نلتقي فيه، ذهبت لقصر الثقافة بالزقازيق علي أساس ان من إسمه هو مكاااان لكل ماهو متعلق بالثقافة وطبعاً المدونين من أكبر الفئات المثقفة في البلد وقابلت المدير المسئول وقاللي بالنَّص" لازم تجيبلي تصريح أمن دولة " هههههههههه تصريح أمن دولة مين يا حاج بعيد الشر طبعاً شكرت الراجل بخاصة وإنه وضّح إن الحزب الوطني نفسه لما بيستضيفوا ليه حفلات أو مؤتمرات لازم تصريح هههههههههههه طاب الحزب الوطني هيجيبلك التصريح في ثواني إنما احنا غلابة يا عم الحاج ههههههههههه فكان لازم وقفة... طبعا مش هنأمم قصر الثقافة زي ما عمل جمال عبد الناصر لا لا لا قولنا نشوف مكان غيره ... قعدت ألووووف وألووووف وألوووووف رحت نادي الربيع قاللي أسعار سياحية وحجز القاعة بمبلغ وقدره وطبعاً مافيش فلوس ... وأخيراً كلمت أحمد مهنى صاحب مدونة مزاج وأحد القائمين علي مشروع مدونات مصرية للجيب. هو كان معايا عالميل من زماااان بس قولتله إننا بننظم للقاء مدوني الشرقية وإنه أول المدعوّين وإن من ضمن أهداف الملتقي تفعيل دور سلسة مدونات مصرية للجيب في نشر المدونين في مصر ، طبعاً لقيت من أحمد مهنى إبتهاج وترحيب كبير وقولتله إننا عاوزين الكتاب يبقا متوافر عندنا في الشرقية لأن في ناس كتير تتمنى تشترية بس مبينزلوش القاهرة كتير...اتفقت مع أحمد إنه هيوفر لينا عدد كبير من إصدارات السلسلة... وصّلني أحمد مهنى بإسلام جاويش- الشهير بإسلام ديو- ، صاحب مدونة إصحي يا مصر قاللي إنه من الزقازيق وكلمه عن الحوار يمكن يفيدك ... إتكلمنا عن الحوار لقيته يخراااااابي شاب زي العثل ههههههه المهم إتكلمنا عن اني بنظم لملتقى مدوني الشرقية وناقص المكان ... قاللي خلاص دي علياااا... تاني يوم إتصل بيا كنا يوم 28 رمضان وقاللي خلاص حجزنا النادي الإجتماعي الخاص بالعاملين بشركة مطاحن شرق الدلتا ... قولتله أكيد قال أكيد ... بصراحة إحنا كنا منظمين يوم 5/10 بالذااااات لأنه أولا فاصل بين عيدين: ثالث يوم عيد الفطر المبارك ، ويوم السادس من أكتوبر(عيد نصر أكتوبر) فطبعاً لما يبقا دا في النص يبقا يوم سمباتيك هههههههههه ... وثانياً إن في ناس كتير زمايلنا مدونين في الفرقة الخامسة طب الزقازيق وراهم إمتحان في نفس اليوم فقولنا يطلعوا من الإمتحان يتغدّوا وييجوا ... عزمنا الجميل أحمد الصباغ صاحب مدونة خالو.. أحمد الصباغ ، وطبعاً لبى النداء وحضر مع أحمد مهنى صاحب مدونة مزاج ، وعزمنا آبي هانم بتنجاني صاحبة مدونة كوكب آبي وللأسف ما حضرتش لظروف تعب أحد خرفان كوكبها تقريباًً هههههههه... وعملت البوست السابق وعملت جروب الفيس بوك وكلفت د. نهال جمال صاحبة مدونة Free Killer واللي ما إتأخرتش علينا في الدعاوي وعزمت تقريباً كووووووول الشراقوة هيا وأسماء جمعة صاحبة مدونة بنت الشمس اللي برضو عزمت ناس كتير جداً جداً وكانت معايا من أول خطوة لآآآآخر خطوة هيا وإسلام جاويش (وشهرته إسلام ديو) صاحب مدونة إصحي يا مصر.
وجه يوم اللقاء يوم الأحد 5/10/2008
قابلت أسماء جمعة (بنت الشمس) وذهبنا وإلتقينا بإسلام ديو(إصحي يا مصر) وذهبنا لمقر اللقاء الساعة 2.30 تقريباً ودي صورة مقر اللقاء اللي المفروض كنا هنعمل فيه الملتقى
وأول ما وصلنا كانت الكاااااارثة والتي جعلتني مخنووووق طوال اليوم ... وجدنا النادي مغلق... فقلت لإسلام إيه دا!! دا مقفول!! ... إتصل بالراجل اللي حجز ليه المكان وجد تليفونه ربما يكون محروقاً أو مسروقاً أو مغلق ... طبعاً قعدت أبص ليه وهو أبدى لامبالاة عجيبة وقعد يضحك .. شوية وبقوله هنعمل إيه قاللي أهم حاجة منظرنا قدام ضيوفنا من المحافظات التانية زي مهنى والصباغ قولتله قول لنفسك ... كانت معانا أسماء جمعة (بنت الشمس) واللي طلع عليها عفريت إسمه هروّح يابنتي طاب هنحلها هنفكر المهم أخدت الموبايل بتاعي وصورتني وأنا في حالة من اللامبالاة عجيبة لدرجة إن كووووول اللي داخل واللي خارج مدخل المبني يبصلنا ويستغرب وآآآدي صورتي أنا مزبهل
شوفتوني وأنا مزبهل هههههههههه أجنن مش كدا هههههههههه .
شوية ولقينا مهنى بيتصل بيقول أنا عديت منيا القمح ... يعني قدامه بتاع نووووص ساعة ... إسلام قاللي هنعمل إيه؟؟؟ ناخدهم في أي كافيه وخلاص؟؟ قولتله منين هتجيب كافيه وتفضيه؟؟؟ بص عالمصرية بلازا لما ييجوا روح لهم وأنا وأسماء هنقابل الناس ونعتذر لهم ونبعتهم على هناك ليكم ... طلع إسلام طبع ورق من فوق من السايبر كتب فيه تم تغيير مكان ملتقي مدوني الشرقية الأول إلي حديقة المصرية بلازا وذلك لظروف خارجة وكتب أرقام موبايلاتنا للي يحب يتصل وشوية ومهنى اتصل وقال وصلنا، قمنا بعتنا له إسلام ديو وفضلت أنا وأسماء جمعة بتاع ساعة إلا ربع لحد الساعة 3.45 مافيش حد جه خاااااالص . قعدنا نقول ياااااارب ما حد ييجي ههههه بدل الخيبة دي ههههههههههه شوية وجت د. نهال جمال (فري كيلر) وجابت الخير معاها وبدأت الناس تهل تهل وكل ما حد يهل نفهمه الليلة . وكل ما نكون أربعة نشحنهم في تاكسي للمصرية بلازا هههههههههههههه حلوة نشحنهم دي ههههههههههههههه وجه أستاذنا الفاضل أ.د. إيهاب إبراهيم صاحب مدونة
فليعد للدين مجده وسلمت عليه وإعتذرت له عن الفصل البايخ ده وقولتله إننا غيرنا المكان للمصرية بلازا وإننا هنحصله بس مستنيين الناس اللي هتيجي ... وتقبل الموضوع بصدر رحب كما تعودنا منه ... بعتذرلك للمرة العاشرة يا دكتور إيهاب .... وتقريباً د. إيهاب ما عرفش يوصل لينا تحديداً فين بالظبط في المصرية بلازا فمشي من غير ما يحضر اللقاء... وكذلك خبيب إتصل بي علي الموبايل ونفس الحوار حصل... أنا آسف جداً يا جماعة.. بجد آسف جداً...
أرسلت أسماء جمعة (بنت الشمس) ود. نهال جمال (فري كيلر) والمهندسة حبيبة صاحبة مدونة قصاقيص حبيبة وغيرهم إلي المصرية بلازا ووقفنا أنا ود.محمد رضا صاحب مدونة شخصية عامة والمهندس علاء محمود صاحب مدونة عجبي وجاء كثيرون أرسلناهم إلي مقر المصرية بلازا... حتى كانت الساعة 4.40 م تقريباً ، فقولنا ما بدهاااش بقااااا اللي ييجي أدينا معلقين له الورق وهو أصلا اللي إتأخر... وخدنا تكاسي (جمع تاكسي على فكرة) وذهبنا إلي المصرية بلازا لأجد لميس خاطر صاحبة مدونة زوايا السحاب أمام بوابة المصرية بلازا منوراها ودخلنا سوا أنا وهيا وعلاء محمود .. ووجدنا القوم في إنتظارنا .. وإليكم الصور
من اليسار لليمين: د. محمد رضا (شخصية عامة) واللي بيألف كتاب حالياً وجاري التصييت عنه قريباً ، إسلام ديو (إصحي يا مصر)، الجميل م.علاء محمود (عجبي)،أنااااا(كل يوم في جديد) والنضارة بتلمع أصلها لسة جديدة هههههههههه ، أحمد فهمي (رومانسي)، أحمد إبراهيم والشهرة أحمد هيما (تشي) واللي بجد علي الرغم من حداثة سنه إلا إني لاحظت إنه متابع جيد للمدونين والأحداث، والأخير أيمن جاهين هو مش مدون أو كان مدوّن من زمااااااان على حد قوله ... هو ضيف نورنا وألقي قصيدة رائعة لدرجة إني إزبهليت ومهنى لاحظ دا جداً وكنت أنا والصباغ سُعداء بلقاؤه.
ودولا من اليمين لليسار نفس الكلام في الصورة اللي فاتت لحد د. محمد رضا وبعده في د. راجي رجب صاحب مدونة
قد قلت ما عندي وبعده الجميل أحمد سلامة صاحب مدونة مستر كوفي-كوفي واللي بجد سعدت بيه وللأسف ما لحقتش أتعرف عليه كويس بس أكيد هقابلك تاني يا أحمد وهتعرف عليك أكتر..
ودولا نفس الكلام بس عن قرب من اليمين د. محمد رضا (
شخصية عامة) ، د. راجي رجب ( قد قلت ما عندي ) ،الجميل أحمد سلامة (مستر كوفي كوفي).

ودا الجميل م.عــــــلاء محمــــــــــود صــاحب مدونة وعجبي!! هو من 100 غمر معانا ، على فكرة كان في غمراوية كتير في اللقاء زيي أنا وعلاء وفري كيلر وراجي رجب وغيرهم....
ودي صورة للجميل أحمد الصباغ صاحب مدونة
خالو أحمد الصباغ اللي عاليمين واللي علي اليسار دا يبقا الجميل أحمد سلامة صاحب مدونة مستر كوفي كوفي. ودي برضو صورة لجانب من الملتقي من اليمين د.راجي رجب (قد قلت ما عندي) و أحمد سلامة (مستر كوفي كوفي) ود. أحمد شاكر (ميديسن بريك) و د.رامي سعيد (حينما تكلمت..قلت) والباشا الكبير أحمد مهنى (مزاااااج) وأحمد الصباغ ( خالو الصباغ ) واللي ما أعرفش كان بيحكي إنه ضرب مين بالشالوت هههههههه.
ودي أسماء جمعة صاحبة مدونة بنت الشمس واللي تعبت معانا كتير وكانت من المنظمين للملتقى وقامت بجزء كبير من الدعاوي. وهيا وم.حبيبة صاحبة مدونة قصاقيص حبيبة واللي بيمثلوا الوفد الـ أبوكااااابيري ههههههههههههه واللي كان ليه دور فعّال في الملتقى... وطبعا دا أحمد الصباغ (خالووو أحمد الصباغ) بياخد صورة تذكارية مع أسماء جمعة (بنت الشمس).
وحصل أطرف موقف في الملتقى من كابتن عبد الرحمن إبن ملكة اللقاء في خفة الظل محاسن صابر صاحبة مدونة عاوزة أتطلّق و.. أموت وأعرف و.. إيه يا محاسن؟!! ههههههه طبعاً بيرو(عبدالرحمن يعني) كان محصور(مزنوق يعني) ههههههههههه فقالك أديها ميه تديك طراوة هههههه وفي أقوال أخرى على لسان والدته : إنه وقع في المية فبنطلونه اتبل وعلشان عنده عقده من النظافة قام قلع البنطلون علشان مامته تغيرلو ههههههه بجد سعدت بلقاءك كثيراً يا محاسن وأتمني نشوفك تاااااااني وتاااااالت وعااااشر ياااااارب على خير. وطبعاً لااااااازم عبد الرحمن معاكي وعلى فكرة متخافيش علي سمعة الواد عندي ليه عروسة لوووز متقلقيش ههههههههه. وطبعاً اللي في النص ولابسه بمبي دي د.نهال جمال(فري كيلر) وبجوارها لميس خاطر(زوايا السحاب) واللي وضحت إنها متوقفة عن التدوين حالياً بقالها مدة كبيرة لإصابة جهاز الكمبيوتر بتاعها بالشلل وجاري شراء لاتوب والعودة للتدوين إدعوا معايا وقولوا آمين... ومن اليسار م. حبيبة صاحبة مدونة قصاقيص حبيبة واللي سعدنا بها كثيراً بجد صاحبة خفة ظل وروح عالية جداً..وبجوارها ملكة الشعر في اللقاء سمرإمام (بنت موت أو كرانيش) واللي ألقت قصيدة ممتازة عن بابا نويل أمتعتنا بيها كثيراً كثيرا.. نتمني نشوفك تاااااااني وتااااالت يا سمر.
ودي صورة تذكارية لينا من اليمين: لميس خاطر (زوايا السحاب)، بسمة مسلم( مدونة همسات شاعرة ) ، د.نهال جمال ( فري كيلر) ، حبيب قلبي أحمد الصباغ (خالو أحمد الصباغ) ، وأنااااااااا د.محمد الجوهري (كل يوم في جديد) .بسسسس
ودي صورة لـ لميس خاطر صاحبة مدونة (زوايا السحاب).سعدنا بلقاءك ونتمني عودتك سريعاً للتدوين يا لــومـــا.


ودي برضو صــــــــــــــــــــورة لـ م.حبيبة ولميس خـــاطر ونهـــــــــال(فري كيلر).
ودي آخر صورة جماعية قبل الإنصراف بوقت قصير من اليمين: بالأسفل: علاء محمود (وعجبي!! ) أحمد فهمي (رومانسي) إسلام جاويش وشهرته إسلام ديو (إصحي يا مصر) ، بالأعلى: محمد رضا (شخصية عامة)، أناااا محمد الجوهري (كل يوم في جديد) ، أحمد شاكر (ميديسن بريك) ، أحمد الصبااااااااغ (خالو أحمد الصباغ) ، نهال جمال( فري كيلر) ، لميس خاطر (زوايا السحاب).

--------------------------------------
وبكده خلص اللقاء ... بعتذر إنه مكانش بالشكل اللي المفروض يكون عليه بس الحمد لله قدرنا نعمل حاجة كبداية كويسة وإن شاء الله المرااات الجايو هيبقا أجمل من كده بكتيررر.. طبعاً أنا مشيت بعد اللقاء ما خلص وفضا إسلام ديو مع مهنى والصباغ ووراهم المصرية بلازا كاملة والصباغ طبعاً ما بيعتقش شاف التمثال عجبوا قالك أتصور معاه
شوفوا جماله وهو ماسك الرمح بيسنده مع التمثال هههههههههههه عثل يا صباغ ههههههههههه.
-------------------------------------

في اللقاء مهنى أحضر معاه 100 نسخة من سلسلة مدونات مصرية للجيب الإصدار الثاني :(مصر في قطعة جاتوه) و20 نسخة من الإصدار الأول (مشروع وطن) وطبعاً معظم الحاضرين قاموا بشراء نُسخ لهم.


ملحوظة هااامة جداً: بالتعاون مع فريق عمل مدونات مصرية للجيب سيتم إن شاء الله توفير جميع الإصدارات الحالية والقادمة إن شاء الله بمكتبات في الزقازيق سأعلن عنها قريباً علي جروب الفيس بوك الخاص برابطة مدوني الشرقية وسأُحدث هذا البوست وأكتب فيه عنوان المكتبات لمن يرغب في شراء نسخ من سلسلة مدونات مصرية للجيب.


ملحوظة هامة: دا يا جماعة لينك جروب الفيس بوك ياريت كل مدوني الشرقية يشتركوا معانا علشاااان هيبقا عليه كووول تفاصيل الإجتماعات القادمة وكووول ما يخص مدوني الشرقية اللينك أهوووو
http://www.new.facebook.com/group.php?gid=41379941604



ياريت يا جماعة كل واحد يعمل كوبي للكود اللي في المربع دا ويضيفوا لمدونته



-------------------------------------
ودي قائمة بأسماء الناس اللي حضرت الملتقى ومدوناتهم :

أحمد الصبااااااااغ - مدونة خالو أحمد الصباغ
أحمد مهنى – مدونة مزاج
أسماء جمعة – مدونة بنت الشمس
ألاء عامر - مدونة أحرار ولــكن
إسلام ديو – مدونة إصحى يا مصر
محمد الجوهرى – كل يوم فى جديد
نهــــــال جمـــــــال – فرى كيلر
نسمة الوكيل - مدونة بذرة أمل
حـبيبة - مدونة قصاقيص حبيبة
محاسن صابر – عايزة اتطلق و
رضوى عادل – قلب ينبض لله
عــــــلاء محمود – عايش ولكن
لميس خاطر – مدونة زوايا السحاب
غادة وروفيدة – مدونة غادة وروفيدا
نور – مدونة كلمات الصمت
رامى سعيد – مدونة حينما تكلمت قولت
احمد شاكر – مدونة ميديسن بريك
احمد سلامة – مدونة مستر كوفيه
راجى رجب – مدونة قد قلت ما عندى
احمد فهمى – مدونة رومانسى
احمد ابراهيم – تشى
محمد رضا – شخصية عامة
سمر إمام – مدونة كرانيش
بسمة مسلم – مدونة همسات شاعرة
رغداء عبد المجيد
سمر – مدونة واحدة شبهى



يااااااارب ما أكونش نسيت حد ولو نسيت والله مش مقصود

لو نسيت حد ياريت يعلق ويقول أنا كنت موجود وأنا هضيفه

-------------------------------------

أتمنى أكون قدرت أعمل تغطية عن ملتقى مدوني الشرقية الأول... أقابلكم إن شاء الله على الجروب


خالص تقديري
وكل عام وأنتم بخير.

٠١‏/١٠‏/٢٠٠٨

كولوووو ييجي ياخد العيدية

زوار المدونة الكرام... مرحبا بكم من جديد..
إنقضي شهر رمضاااان المبارك... اللهم أسأل أن تُعتق فيه رقابنا من النار... وجاء العيد... اللهم أسأل أن يكون سعيداً علي أمة محمد أجمعين...
حقاً هذا العيد مكافأة من الله تعالي لعباده الصائمين... فلا يشعر بلذّة الفطر إلا الصائم ... كما أنه لايشعر بلذّة نعيم الجنة إلا من تعب ليؤدي فروض الله حق تأدية... اللهم إجمعنا مع رسولنا الكريم في جنات تجري من تحتها الأنهار في مقعد صدق عند مليك مقتدر...

الله أكبر ...الله أكبر ...الله أكبر... لا إله إلا الله...الله أكبر ... الله أكبر ... ولله الحمد... الله أكبر كبيرا... والحمد لله كثيرا... وسبحان الله بكرةً وأصيلا...لا إله إلا الله ...وحده ...صدق وعده ... ونصر عبده... وأعز جنده وهزم الأحزاب وحده ... لا إله إلا الله... ولا نعبد إلا إياه ... مخلصين له الدين ولو كره الكافرون... اللهم صلِ على سيدنا محمد... وعلي آل سيدنا محمد... وعلي أصحاب سيدنا محمد ... وعلي أزواج سيدنا محمد... وعلي ذرية سيدنا محمد وسلم تسليماً كثيرا...
كل عام وأنتم جميعاً بخير...

ودلوقتي طبعاً كل واحد مستني مني العيدية... اللي كاتبها في عنوان البوست... وأنا عند وعدي... هنتقابل وهدي العيدية للي هييجي بسسس والغايب.... مالوش نايب ههههههههههه

هنتقابل فين يا عم الحاج؟؟؟ هنتقابل في ....

ملتقي مدوني الشرقية للمرة الأولى في التاريخ
.
..


ودا فين وإمتا يا عم جوهري؟؟؟

المكان: مقر النادي الإجتماعي الخاااص بشركة مطاحن شرق الدلتا أمام مقر الوفد بشـــــارع مدير الأمن - ميدان القومية - الزقازيق - محافظة الشرقية
وللناس اللي من خارج الشرقية تركب من ميدان المحطة -اللي بتنزل فيه من سيارة الأجرة بتاع القاهرة- تاكسي وتقوله شارع مدير الأمن وهنااااك تفضل ماشي علطول علطول لحد ماتلاقي عمارة هههههههه قصدي لحد ماتلاقي النادي الإجتماعي... دي وصفة هايلة أظن سهلة؟؟ ههههههههههههه
الزمان: يوم الأحد الموافق 5/10/2008 السااااااااااااااعة الرابعة مساءً ودا مهم جداً الرااااابعة مسااااااااءً مش متأخر عن كده ودا علشان اللي من خارج الشـــــــــــرقية يكونوا في بيوتهم قبل العشاء إن شاء الله .

الحدث: إجتماع مدوني الشرقية للمرة الأولى وليس الإجتماع مقتصر على مدوني الشرقية بل هي دعوة عامة لجميع المدونين المصريين. وسيكون من الحضور خالو الصباغ ، أحمد مهنا لمناقشة دور سلسلة مدوناااات مصرية للجيب في نشر المدونين وتفعيل دورهم في المجتمع ووعدتنا آبي هانم بتنجاني بالحضور إن شاء الله. وغيرهم الكثير إن شاء الله.

المفاجأة: لمن كان يحلم بإقتناء إصدارات سلسلة مدونات مصرية للجيب سيكون في اللقاء الإصدارين الأول: مشروع وطن والثاني: مصر في قطعة جاتوه لمن يرغب في الإقتنااااااااااء هذا إلي جانب العيدية بتاعتي هههههههههههه وإبقوا قابلوني هههههههههه وخودوها هههههه.

هي دعوة عامة : فرجاء من كل السادة المدونين من يعرف صديقة مدون شرقاوي بخاصة أو غير شرقاوي عامة أن يدعوه للحضور لأن في اللقاء حاجات موفجأة آه والنيعمة هههههههههههههههههه موعدنا الأحد القادم 5/10/2008 في النااااااادي الإجتماااعي بشارع مدير الأمن السااااااااااااعة 4 مساءً .

ودا جروب الفيس بوك اللي هيبقا فيه كوووووووول التفاصيل إن شاء الله.
http://www.new.facebook.com/group.php?gid=41379941604

وللإتصال تليفونياً في حالة تعذر الوصول لمقر النادي :
محمد الجوهري 0119236623
إســلام جاويش 0122267535
خالص تقديري وكل عام وأنتم بخير.
كان نفسي البوست يكون دمه خفيف شوية بس معلش بقاااا العيد والقرايب وبتاع ونازل أفطر يعني... ألّه.. ما أفطرش مثلاً ههههههههههه
أراكم قريباً في الملتقى . وفي إنتظار تعليقاتكم . وتابعوا البوست لأنه سيتم تحديثة كل فترة أو عمل بوست جديد مدعم بالصور.
عيد سعيد عليكم جميعا
وكل عام وأنتم بخير

٢٨‏/٠٩‏/٢٠٠٨

حريقااااااا... حريقااااااا....حريقااااااا

قراء المدونة مرحباً بكم من جديد...
صراحة مش عارف بجد أقول إيه!!! خلصنا من حريق مجلس الشوري منذ أسابيع قليلة وأُفاجأ بعد الإفطار أمس بخبر نشوب حريق بمبنى المسرح القومي المصري بميدان العتبة الشهير بوسط القاهرة... رجّح مسؤولو الشرطة أن الحريق نشب نتيجةً لماس كهربائي أدي إلي إنفجار بأجهزة التكييف وإحتراقهااا فامتدت النيران لتحرق ديكورات المسرح وواجهته...نشب الحريق قبل الإفطار بدقائق معدودة ويرجح أصحاب خفة الظل واللذين سأخبركم عن آرائهم فيما بعد أن الحريق نشب قبل مدفع الإفطار بست دقائق وسبعة وثلاثون ثانية واثنين فيمتو وكأن الصول محمد المدفعجي ضرب المدفع قبل ميعادة لتصل القذيفة إلي مقر المسرح وتلتهمه النيران...وعلي الفور توجّه رجال الإطفاء في النقاط المجاورة إلي مقر الحااااااادث وياعيني مافطروش الا بعد العشااااء حيث أن إطفاء النيران استمر من السادسة وحتي الثامنة والنصف تقريباً لدرجة أن بعضهم ترك الباشبور للمارة ليقوموا بعمليات الإطفاء قائلين إياكش تولع ههههههههههههه فيما جائتنا أخبار بأن السيد المبجل خاااازوق إحم إحم عفواً حدث عطل فني في الكي بورد السيد/ فاروق حسني وزير الثقافة توجّه إلي مقر الحادث لمتابعة ما يجري بالمسرح بعد أن إلتهم لقمتين عالسريع كداااا يعبي بيهم التانك وأكد سعادة اللوز مساعد الوزير بتاع الحاجات دي اللي هو وزير الداخلية باين أن العمليه في النملية أقصد الحريق تحت السيطرة وكولووووو إيشطة بالصلاةُ علي النبي .. وأنهم تمكنوا من إخماد النيران قبل أن تمتد للبيوت المجاورة إذ أن البيوت متلاصقة لكون الحي شعبي إلي حدٍ ما كما أنه يجاور حي الموسكي الشهير والذي يحتوي علي ملابس العيد للشعب الغلباااااان فمش طالبة الصراحة الحريقة تمتد لهناك يعني... كما أشار سيادة اللوز لحاجة مهمة جداااااا جدااااااا محدش أخد باله منها خالص أن الحريق نشب قبل ما مدفع الإفطار يضرب ويعمل بوروروم بعشر دقايق وهناااا ينفي تماماً علاقة الصول محمد المدفعجي بالحادث وكماااااان بيوضح إن بداية الحريق نشب في الستااااااائر هههههههههههههه لا والنبي جبت التايهة هههههههه إتصدروا في الهيافة.. وبرضو أشاااااار إلي حته رهيبة أنه لا توجد خسائر في الأرواح ههههههههههه طبيعي يا هندزة البتاعة نشبت في البتاع قبل مدفع الفطار ببتاع عشر دقايق مين المجنون ابن المجنونة اللي مش هيفطر وهيكون قاعد في المسرح مثلاااا قبل الفطار بعشر دقايق .. عموما مشكور يا سيادة اللوز على الأخبااااااار الفظيعة دي..
وفي حته حلوة برضو بتوضح براعة قوات الإطفاء عندنا ... أوضح العميد نصر زكريا رئيس غرفة العمليات بالإدارة العامة للدفاع المدني والإطفاء بالقاهرة أن النيران امتدت بفعل الرياح إلى لوحتين إعلانيتين فى الدورين السادس والسابع فى العقار المواجه للمسرح وتم إطفاؤهما فى الحال قبل أن تمتد للشقق بالعقار... والله مية مية يا سيادة العميد أصل ما كانتش ناقصة وربنا ناس تتحرق عالعيد كدااا كل سنة وانت طيب يا باشا....
طبعاً هنقول قضاااااااااء وقدر ماشي يا جماعة قضاء وقدر بس مش غريب كل شوية ماس كهربائي يولع في مبني كبير وبعدين سعادة اللوز أشار إن مكانش في حد في المسرح طب أجهزة التكييف انفجرت ليه؟؟؟ إذا كانت أصلا مش شغااااالةّ!! ولا يمكن كانوا مشغلينها تهوي عالجن اللي بييجوا يبيتوا بالليل ولاااا مثلاً هيطفوها ليه بيدفعوا فلوس كهرباااااااا من جيوب أهاليهم ههههههههه دا برضووو كان تعليق أحد خفاف الظل اللي كلمتكم عنهم واللي فوجئت بيه بعد العشاء عامل كدا بالظبط

وبيقولي حريقاااااا .... حريقااااااا ... حريقااااااا مقلداً دور يونس شلبي في مسرحية مدرسة المشاغبين واللي كانت علي مسرح برضووو هههههههههه وأكمل قائلا أبويااااا اتحرق هيه أبويا اتحرق هيه واحد بيقولوا أبوك ماله؟؟ بيقوله أبويا راح النار هههههههههه
هذا هو الشعب المصري في أي وقت بيضحك .... شعب عجيب ....
خلينا نقول طبعاااا نااااااس هتفرح وتقولك إياكش تولع كمااااااان وكماااااان زي ما حصل في حريق مجلس الشورى بس أنا بقول يا جماعة بإيه هنستفيد من حريق يحصل؟؟ هل الوضع إتحسن؟؟ هل مشكلة إتحلت؟؟ لا طبعاً بل الفساد زاد ... خود عندك بقاااا تكاليف ترميم وإعادة هيكلة وبناااااء وفرش وستائر وتكييفات وخلاااافة وطبعاً نظرية بــــح بـــــح الإقتصادية التي إكتشفها وألفها نجيب الريحاني لزوم مصاريف الخروف ههههههههههههه غلابة العالم دي وداخلين علي عيد أهوووو وبداية مدارس مش لازم يعملولهم سبوبة علشان المصاريف دي ؟؟
يبقاااا بـــح بـــح ويا شعب بطل تتنـــح ههههههههههههههههه
ودا طبعاً نفس الكلام اللي قولته في حريق مجلس الشورى. مش هنستفيد من الحرايق دي شيء... وربنا يستر وما نسمعش حريق في مجمع محاكم الجيزة الساعة اتنين ظهراً ولا في محطة مترو رمسيس الساعة 9 صباحاً وبرضووو سيادة اللوز يقول حريق يشب مش عارف فين والسبب برضووووو ماس كهربائي وخسائر في الأرواح بالمئات وبرضووو هيقووول العملية في النملية ههههههه
سلّم يااااااارب سلّم.
تحياتي للجميع وعذراً للإطالة
دمتم سالمين.
تحـــــــــديث
أجزاء من ردود أعجبتني عالموضوع
semsema يقول...
البلد منورة الايام دي جااااااامد مش عارفة والله ايه النور الزايد ده
تعرف كل ما اسمع عن موضوع حريق جديد افتكر حريق القاهرة علي طول زماااااااان ايام الملك ايييييييه دنياااااا
انما ازاي ياراجل متجبش سيرة حريق سنترال ميت غمر الرئيسي وتوقف شبكة اتصالات يومها مش بقولك البلد نورها زاايد اليومين دوووول
منور والله يا حااااااج
ههههههههههه طبعاً يا سمسمة النور زايد زايد ومعمر القذافي كمااااااان ههههههههههههه
الملك مممممممم بسم الله الرحمن الرحيم علي بك الكبير ههههههههههههه كان راجل كبير وكوبرة
هيــــــــــه دونيااااااااااااااا
فعلاً إزااااااااي أنسي الحوار دااا!! بس خلااااص هنوّه أهووووو
عزيزي المواطن أضف إلي سلسلة الحرايق اللي كوووووول شوية بتحصل برضوووو مااااس كهربائي في سنترال 100 غمر الرئيسي أدي إلي حريقاااااااااا عظيمة في السننترال وبالتالي أدي إلي إنقطااااااااااع الحرارة فـ التليفوووووناااااااات لمدة يوووووووم كامل وطبعاً واحد زكي هيقولي النت كماااااااان قطع؟؟؟ مش هرد عليه علسان الضغط والسكر ههههههههههههههه.
طبعاً في الآخر سمسمة عاوزة تلبسني في شجرة قصدي تلبسني تهمة إني أنا السبب في حريق المسرح القومي بس بدهاااااااء الناس بتوع الغربية الحلوين دولا . بتقولي منوّر يا حـاج بعد ما وضّحت فوق إن سبب الحرايق دي نور زيادة يبقااااا لما أنوّر يبقا ليا علاقة بالحااااادث لهذاااا من على منبري هذا مممممم أقصد علي كيبوردي هذه أعلن أني ماليش دعوة بالحريقاااااا دي والله العظيم 3.
أما التعليق الأطرف
مهندس مصري يقول...
بيقولوا سبب الحريق في قناة الجزيرة
هو لحامات كان يقوم بها بعض العمال في الستارة الرئيسية للمسرح و ليس ماس كهربي
و ان نظام مكافحة الحريق الاتوماتيكي الذي تكلف مليون جنيه العام الماضي لم يعمل
:(

ههههههههههه دايماً قناة الحصيرة بتجيب الإنفراداااات ههههههههههههههه

لحاماااااااااااات في الستااااااااارة ههههههههههه ليه ستارة حديد؟؟ ههههههههههههه

بس والله مش بعيد شعبنا دا عجيب وقبل الفطااااااار توقّع أي شيء

ههههههههههههه نظام مكافحة حريق مين يا هندسة بسسسس

دي سبوبة واتوزعت وجابوا خرطومين و3حنفيات - جمع حنفي على فكرة- وقالوا إتكلف مليوووووون جنيه

ههههههههههه طبعاً دا احدي أمثلة نظاااااااام بــح بــح ههههههههههه

خالص تقديري لك يا هندسة.

تحديث تااااااني آآآآه ياااااااااني

جائني تعليق من الجميلة زهرة الجنة كالآتي
زهرة الجنة (زهرة سابقا) يقول...
أخر خبر بقي يا دكنور

قبضوا علي مدير خشبة المسرح وعامل الكهرباء بالمسرح

حيث أهمل الأول في اداء وظيفته وأخل بواجباتها

اما الثاني أهمل في صيانة الأموال العامة

شوفت بقي يا دكتور الماس برئ المرة دي وأخيرا لاقوا حد يقبضوا عليه ههههههههه

وطبعاً لأني مكنتش مصدق وللأسف ما كنتش متابع الجرايد فبعتتلي عالميل صور من جريدة المساء ومن محيط حيث تبين الآتي:

قرر المستشار محمد حلمى قنديل المحامى العام لنيابة وسط القاهرة حبس اثنين من العاملين بالمسرح القومى لمدة 15 يوما على ذمة التحقيقات. والإثنان هما باسم جرجس ميخائيل حنا مدير خشبة المسرح بالمسرح القومى, ومحمد بكرى مصطفى درويش مسئول الكهرباء، حيث نسبت اليهما النيابة انهما تسببا فى الحاق أضرار جسيمة فى أموال الجهة التى يعملان بها وكان ذلك ناشئا عن اهمالهما فى اداء وظائفهما واخلالهما فى اداء واجباتهما.

يعني قفشوا فعلاً الإتنين اللي أخلّوا بواجباتهم وسابوا الماس ينتشر ويترعرع لحد ما عمل عملته الوحشة وحرق الستارة اللي شبكت فـ خشبة المسرح. ظلمنااااااك يا ماااااااااس مطلعتش لوحدك دا في تواطؤ من نااااس معاااك. خلينا نكمل باقي الخبر من محيط

وكشفت التحقيقات التى أجرتها النيابة فى الحادث أن سبب الحريق يرجع إلى قيام ادارة المسرح باحضار مقاول لاصلاح بعض الاعطال فى ستارة المسرح، فقام العمال بعمل وصلة كهربائية من صندوق كهرباء بالمسرح وعقب انتهاء العمل لم يقم الفنى المختص بفصل الكهرباء عن المحول مخالفا بذلك التعليمات التى تلزم المسئول عن الكهرباء بفصل كافة التوصيلات الكهربائية فور انهاء مثل هذه الأعمال, حيث غادر محمد بكرى المكان رغم تحذير رؤسائه له من خطورة تركه لهذه التوصيلات وهو ما أدى إلى اندلاع شرار من هذه التوصيلات أسفر عن حدوث الحريق.

رغم تحذير رؤسائه له... إديلوا إدي ... خلااااص حذروه ومسمعش الكلام إدولوا علي حنطور عينوووو هههههههههه

الأفندي مستعجل عالفطار كان لسه 10 دقايق والمدفع يعمل بورورم فقالك بلا وصلات بلا بتاع وساب الوصلات العريانة عريانة طاب إستر عليهااا هههههههههههههه وطبعاً الماس ما صدّق وقام ماسك فـ الستارة وسمعوا صدي صوت يقول ولّعت يالاااا ولّعت هههههههههه

كما استمعت النيابة إلى أقوال شريف عبد اللطيف مدير عام المسرح القومى والذى شهد بأنه كان قد أعطى تعليماته لاصلاح أعطال بستارة المسرح وانه طالب باسم جرجس ميخائيل مدير خشبة المسرح لمتابعة إصلاحها.

أيوة يا سيدي ... كل واحد يقول يلا نفسي ... عارف أنا الليلة دي يثبت إن شغلة مية المية وإن الخطأ من اللي تحتيه.

من جانبه أكد فاروق حسنى وزيرالثقافة أن خسائر المسرح القومى من المعاينة الأولية عبارة عن احتراق الستارة وجزء بسيط من الخشبة الرئيسية للمسرح نتيجة سقوط "السوفيتة" عليه وهو الحامل الضخم الذي تعلق عليه أجهزة الإضاءة إضافة لبعض لوحات الجبس التي صنعت فى السبعينيات، نافيا ما تردد فى بعض الفضائيات عن تدمير قبة المسرح او تعرض أجزاء كبيرة منه للتدمير.
ووصف كل ما تردد بأنها معلومات عارية عن الصحة واشاعات تهدف الى الاثارة فقط.

طبعاً لازم يتلامض ويقوله كلمتين أومال يعني هيروح بعد ما إلتهم لقمتين عالسريع يعبّوا التنك ووقف بتاع ساعتين وفـ الآخر مش هيتكلم.. لازم يتكلم بقاااا ويقولك سوفتيه وبتاع سوفتيه مين والناس نايمين!! وقام واصفلك اللي اتردد من المعلومااااااات إنها عريااانة وبتعمل إثارة هههههههههههههه هيا رقااااصة يا عم الحاج !! قال عريانة قال آه مانت بتموت في كلمة عريانة زي ما كنت بتقول الحجاب عودة للوراء وعاوز تخليها عريااانة بقاااا.. فكر عاوز يتغطى ههههههه فكر العرايااااا لخازوووق -عفواً الكي بورد عملتها تااااني- لفاروق حسني.

وقال الوزير إن الحريق نشب جراء شرارة كهربائية من تابلوه الكهرباء بالمسرح وعندما حاول أحد العمال التعامل معها أنفجرت مما أدى لاشتعال الستارة الرئيسية لكن سيارات الأطفاء تواجدت وتعاملت مع الموقف عقب دقائق من نشوب الحريق إذ أن المسرح مزود بأحدث أجهزة الإنذارالمبكر التي تتصل اتوماتيكيا بأجهزة المطافىء فور نشوب اى حريق.

ومين يشهد للقرعااا!!! مانتا لازم تقول أحدث الأجهزة؛ علشان ما ينبشوش ورا السبوبة اللي إتـ بح بح ت. وسمعني سلام أحلف بسماها وبترابهاااا. وحلو حوار بتتصل توماتيكي بالمطافي دي ههههههههههههه إزاي يعني؟؟ مسجلين رسالة حريقااااا..حريقااااا...حريقاااا ولا ولّعت يالا ولّعت ولا نار نار نار أنا قلبي قايد نار هههههههههههههه

وأضاف أن أجهزة الأطفاء الذاتي المزود بها المسرح تعاملت فورا مع الحريق حتى قبل وصول سيارات الاطفاء وساعدت فى الحد من الخسائر وأنقذت المسرح بشكل فعال واستمرت حتى بعد وصول رجال الأطفاء وتعاملهم مع الحريق واحتواءه

أيوه قول قول.. كمّل .. إشجيني.. مش أجهزة متكلفة مليووون جنية وما عملتش حاجة لازم تقول ساعدت في عدم نشر البطيخ .. وتعمل فيلم علشان محدش يهيص ويقول وأجهزة الحريق اللي بمليوووووون جنيه عملت إيه!!

لا وشوف بقا اللذيذ يا عزيزي القاريء:

على صعيد متصل صرح الدكتور محمد سلطان رئيس الإدارة المركزية للاسعاف والطوارىء بوزارة الصحة والسكان بأن عدد المصابين فى حريق المسرح القومى بميدان العتبة ارتفع إلى ستة أشخاص. مؤكدا أنه لاتوجد أى وفيات وحالة جميع المصابين جيدة ومطمئنة . وأوضح أنه يوجد حاليا فى موقع الحادث نحو 19 سيارة إسعاف و 45 مسعفا ومساعد أخصائى إسعاف وخمسة أطباء تحسبا لأية ظروف طارئة .

ههههههههههههههه قالّك مافيش وفيات ومصابين بحالة جيدة ستة أفراد.. يقوم يجيبلك 19 عربية إسعاف،45 مسعِّف و5 أطباء ليه؟؟؟؟ كل دا ليه؟؟؟ , ,و على النقيض في الدويقة سابوهم تحت الصخور يموتوا مالهومش ثمن يا عم وتلاقي 5 أو 6 عربيات إسعاف أول عن آخر دا إن كانوا عبروهم أصلاً . بالذمة دي مش حاجة تخنق وتجنن!!!

ختاماً: نقلبها دندرة وبلاش نكد

أحب أقولكم كل سنة وانتم طيبين

ووداعاً يا رمضان أهلاً بالعيد.

وكل عام وأنتم بخير.

٢٦‏/٠٩‏/٢٠٠٨

أهو كداااااااا صح


أهو كدا الكلام ...
مسح د. أيمن البوست اللي في مدونته سباح في بحور الظلام
وطبعا كلمت أنا الصباغ ومسح برضوووووو بوسته اللي في مدونته خالو الصباغ زي ما وعدني ..
والاتنين غيروا الكلام لبوستات أروع
وأحمد ما خيبش ظني ودخل رد زي ما كنت متوقع منه عند أيمن هنا وأيمن تقبل كلامة ورد برد أروع عجبني جداً وبكده رجعوا الحمد لله كويسين في حق بعض وبالعند في الشيااااطين ههههههههههههههههه.
كل سنة وأنتم بألف خير
وبجد دي أخلاق المسلمين
وأخلاق مدونين محترمين زيكم إنتم الاتنين ..
وكداااااا أنا مبسووووووط وكل المدونين مبسوطين.. واللي مش عاجبه إياكش ياااااااارب يولّع بجاز وسخ
ههههههههههههههههههههه

تحياتي للجميع
د. محمد الجوهري



٢٥‏/٠٩‏/٢٠٠٨

يـا خـســــــــــــــــــارة يا إتنين مسلمين

تحديث
بحمد الله قام كل من د. أيمن و أحمد بك الصباغ بمسح موضوعاتهم كما أشرت في البوست التااالي وبناء عليه قمت بمنع التعليقات في هذا الموضوع لأنه خلاص اتقفل
تحياتي للجميع


بسم الله الرحمن الرحيم
قراء المدونة الأعزاء .. مرحباً بكم من جديد ..
بدايةً كل عام وأنتم بخير في شهر الخير .. واللي فيه الشياطين بتتسلسل بس برضووو النفس الأمّارة بالسوء لسه شغّالة... طبعاً أكبر مثال لكدة مشكلة أيمن القناوي (مدونة سباح في بحور الظلام) و أحمد الصباغ (مدونة خالو الصباغ)...
طبعاً بما إن أيمن من بلدي وزميل في كلية الطب بالزقازيق وتربطنا - أقصد كاااااانت تربطنا من وجهة نظر أيمن حالياً - صداقة عمرها أكثر من عشر سنوات ، وبما إن الصباغ صديق جميل إتعرفت عليه في عالم التدوين الرائع وحبيته بجد وإتقابلنا في حفل توقيع مدونات مصرية للجيب وكل ما بنزل القاهرة تقريباً بقابله؛ إذاً كان لازم أكون وسيط في حل الخلاف لأن الإتنين زي ما وضّحت أصدقاء درجة أولى بالنسبة لي. طبعاً الصباغ قديم عني في التدوين،و دخلت أنا العالم دا بعد منه، ودخل بعدنا أيمن؛ شاف أيمن مدونة الصباغ في مدونتي فعجبته وعجبه نظامها وعجبته دماغ أحمد الصباغ -دا زمااااااان طبعاً ههههه- فاتصل بيه عن طريق الإيميل والفيس بوك وغيرهم .. طبعاً دا في حد ذاته إعتبره الصباغ محاولة تقرب وتلزيق من أيمن وإنه من نوعية الناس بتوع أبوس إيدك تعالى زور مدونتي على حد قوله...
ملحوظة في البداية: أنا كاتب البوست دا علشان ما أجاملش حد وطبعاً الإتنين ملاحظين إني ما رديتش عالمهزلة اللي كل واحد فيهم عاملها علي مدونته واللي بتتعارض طبعاً مع أخلاق المدونين المحترمين اللي هما أكبر فئة مثقفة وفاهمة في البلد... لذلك أرجو من الإتنين أيمن والصباغ يقروا الموضوع للآخر...
طبعاً كل واحد بيحاول ينشر مدونته وبيفرح بتعليقات الناس علي موضوعاته ودا في حد ذاته مش عيب ولا غلط وأنا من الناس دي ، فمعنى ذلك لما أيمن كان زمان يقولك يا صباغ شوف الموضوع دا؛ يبقا مش مذنب ودا اللي بحاول أوضحهولك... و مش معنى إن الصباغ بيبعت عالفيس بوك أو أوف لاين للناس اللي عنده عالليست في الإيميل عن موضوع بوست جديد علي مدونته يبقا بيدلل عليه يا حاج أيمن...
كل واحد نفسه لما يكتب بوست الناس كلها تعرف إنه كتبه وتيجي تعلق عنده مش عيب...
خلينا ندخل في تفاصيل المشكلة...
بداية المشكلة البوست دا اللي الصباغ قال فيه إن منظمة المؤتمر الإسلامي الأمريكي عزمته عالإفطار وكان معاه نااااااس كتير مسلمين ومسيحيين وكان ضمن الناس دي واحد بيقول إنه بهائي...طبعا أنا لما قريت المسيحيين عادي لأني عارف الهدف من المؤتمر وهو ترسيخ مباديء الوحدة الوطنية داااا مع المسيحيين لكن لما ألاقي بهائي معزوم وبيقولك الوحدة الوطنية معايا لأااا طبعاً مافيش حاجة إسمها نعترف ببهائي في مصر دا رأيي وبناءً عليه دخلت من باب العلم بالشيء عاللينك بتاع مدونة الأفندي البهائي اللي حطها الصباغ اللي هو دا وأشوف إيه النظام
وبقلب في المدونة وصلت للينك دا ... طبعاً كان الصباغ سابقني ومعلّق التعليق دا
أحمد الصباغ wrote @ الخميس, 11 سبتمبر, 2008 at 11:27 م
شادى والله سعدت جدا بلقائك وبزيارة مدونتك
والحقيقة القضية مأثرة فيا كتير
لسه ما تصفحتش المدونة بالتفصيل لكن كلامك حقيقى اثر فيا
وخلانى حاسس ان فى علينا دور لازم نقوم بيه
تحياتى ليك
احمد الصباغ

وطبعاً دخلت قولت رأيي اللي هو دا
د. محمد الجوهري wrote @ السبت, 20 سبتمبر, 2008 at 3:21 م
هههههههههههههه
طبعا لازم يدرسوا يا اسلامي يا مسيحي
لأن دولا ديانتين سماويتين من الثلاثة
وسأرد علي من يقول هل عندك اتصال مباشر بالله -تعالى الله عما يصفون-
عزيزي-عفواً لست عزيز-
آخر المرسلين من قبل الله عز وجل للبشر حاملاً دعوة للدين هو محمد بن عبدالله بن عبد المطلب بن هاشم
وقد ذكر في الإنجيل أي في الديانة التي كانت تسبقه
لكن أسألك
أذكر بهاء الله- تعالى الله عما يصفون- الذي تدّعون أنه الله في القرآن -الدين الذي سبقكم-؟؟؟؟؟
كل نبي له معجزات أخصّه الله بها كلمني عن معجزات بهاء الله ؟؟؟؟
أنا لست بذيئاً فلم أأت هاهنا لأسب
بل جئت لأُعلمك شيئاًومن يبتغي غير الإسلام دينا فلن يُقبل منه
——————————————————–
وأنتم أحرار سيدي بهائي مصري-سيدي ليست بالمعني أقصد تفخيما-
لا تقرأوا القرآن …
فهو أكبر معجزة حدثت حتى الآن ولا يوجد كتاب يماثله
لأنه ليس كلام بشر كبهاؤكم بل هو كلام الله المنزل على عبده ونبيه محمد رسول الله ليكون رحمة للعالمين

بعدها فوجئت بأيمن دخل بعد مني وعلق كدا

د/ ايمن القناوى wrote @ السبت, 20 سبتمبر, 2008 at 10:03 م
كنت هتصدم فيك يا جوهرى زى متصدمت فى واحد من اللى قبلك كان عامل فيها زعيم الظاهر افتكر نفسه شخصيه اجتماعيه عاقله بس بعد رده ظهر فعلا انه عيل تافه وبيلعب عزموه على الفطار ومسحه مخه
وانت يابنى يابهائى زادكم الله ضلالا من افعالكم وادعو الله ان يهديكم بس ياريت متقولش من دين عند الله لان دينك من الخمارات والكباريهات ومن عند الشيطان لشويه ناس مغيبه تماما انت بلا ديانه واهل رجس

ودا طبعاً كان سبب الخلاف الرئيسي .. إتنين مسلمين في شهر رمضان بيتخانقوا ويشتموا بعض علشان واحد بهائي ... مهزلة بمعنى الكلمة... طبعاً بلوم عليك يا أيمن أسلوبك وتوجيهك الكلام للصباغ وشتيمتك ليه، لأن إنتا داخل مدونة واحد تعلق ليه هو .. ومالكش دعوة بتعليق حد قبل منك هو حر شايف إن ليه دور إيه اللي مزعلك؟!! هو مقالش إن ليه دور في نشر البهائية زي ما إنتا شايف لأ هو يقصد إننا مصريين وإن البهائي دا مهما كان مصري ولازم نقبلة مع إختلاف دينه دا رأيه هو حر فيه، ودا طبعاً بعارضك فيه يا صباغ ... دا مش دين .. لما يخترعوا ديانة من وحي خيال قطقوط كدا مسمي نفسه بهاء بتاعهم ويقولوا إنها ديانة سماوية وإن عندهم نصوص كلام ربنا-تعالى الله عما يصفون- يبقا لا مؤاخذة مالهمش إلا ضرب الجزم وقليل أوي أوي اللي الحكومة بتعمله معاهم ...
دا كان سبب الخلاف واللي بناءً عليه أيمن هاجم الصباغ في تعليقه عند البهائي بس برضو بلوم عليك يا أيمن أسلوبك في الهجوم علي الصباغ ما جايز بيتريق ويقصد يقول مثلا لينا دور في إننا نطلّع البلي الأزرق علي عيونكم وعيون أهاليكم ههههههههههه ...
وطبعا أنا معترض علي كلمة إن ليك دور معاهم وإنك مقصر يا صباغ لأن أنا ضدهم...
بس برضو تعليق أيمن الأولاني عند البهائي بيوضّح إنه ما قراش بوست الصباغ للآخر ..هو شاف كلمة بهائي في الفطار إتجنن والدليل على كده إنه بيقول في رده الأولاني إنهم عزموه على الفطار ومسحوا مخه..
يا أيمن عاوز أوضحلك للمرة الألف اللي عزم الصباغ مش البهائيين دي مؤسسه عاوزة تدعم مبادئ الإيخاء والوحدة الوطنية والكلام الحمصي دا.. فأنا شايف إنها كانت المفروض إنها تعزم مسلمين ومسيحيين وشكراً، أما البهائي دا مالوش إعتراف عندنا بدينه اللي إخترعوه دا .. طبعاً مش دي قضيتي حالياً أنا بس بوضّح سبب الخلاف...
بعدها دخلت علي مدونة البهائي لقيته ما ردش وكان الصباغ قصادي عالميل كلمني عن أيمن وقاللي هو بيشتم ليه؟؟ أنا كلمته دا؟؟ قولتله هشوف وهكلمه وهرد عليك... قام أحمد قاللي بص لو هتكلمه صحيح قوله أحمد الصباغ ما عادش ليه علاقة بيك وبيحذرك من دخول مدونته تاني قولتله ماشي ... يعني أحمد ما بعتنيش يا عم أيمن علشان أكلمك لأني واحد من أتباعه زي ما خيالك رسملك لأ أنا اللي جيت أكلمك لوحدي للأسف لأني متوقع إنك صديق ودا العادي جاي أحل مشكلة معاك... وطبعاً من حقك يا صباغ ماتشوفش واحد غلط فيك علي مدونتك... إتصلت بأيمن عالتليفون مش عالميل زي ما بيقول في البوست هنا
وكلمته عادي وفتحنا في سيرة مدونة البهائي ببص لقيت اللي قام نازل شتيمة عالصباغ فبقوله يا أيمن هو ميقصدش كدا قاللي متبقاش غبي وطالما هو مع البهائيين يبقى بالجزمة قولتله أنا معاك ضد البهائيين قام قاللي وهو ماهواش ضدهم يبقا ضدنا إحنا.. قولتله لأ طبعاً أحمد بس بيقول إنهم مصريين في الآخر ، المهم كان نقاش طويل وكالعادة أيمن ما تعرفش تاخد منه حق ولا باطل في الكلام فقولتله في نهاية المكالمة طالما إنك مصمم على موقفك مع الصباغ يا سيدي إنت حر بس هو بيقولك إنه ما عادش ليه علاقة بيك وبيحذرك من دخول مدونته تاني .. وطبعا دا حقه
أما إني قولتلك هيأذيك بأسلوب السخرية بتاعك داااا الي في البوست فدا محصلش يا عم أيمن ... كمان عاوز أوضحلك نقطة مهمة جدا جدا وغايبة عن فكر سيادتك العميق أنا مش من اللي يبغون الرضا من الصباغ أو غيره ويبيعوا أهاليهم علشان يرضى عنهم زي ما إنتا واهم كل علاقتي بالصباغ إنه مجرد صديق محترم ومدون زميل أما موضوع الرضا والكلام اللذيذ بتاعك دا فالصباغ نفسه عارف إني الحمد لله مش كده ومش بس معاه والله لأ مع الكل أنا مبقولش إلا اللي يُمليه عليّ ضميري وكمان موضوع الرضا والكلام دا فدا كان الصباغ قاله عنك في البوست بتاعه دا إنك من الألاضيش الملزّقين اللى كان بيقعدوا يبعتوله رسايل ويمسحوا جوخ والرسايل كلها عنده من نوعية الناس اللى تلف على المدونات ابوس ايديكم تعالو زوروا مدونتى
يبقا لما تحب تقلب الكلام دا علي حد ما تقلبوش عليا أنا لأن مش ذنبي إني حاولت أحل المشكلة ودايماً أنا كده آجي أحل مشاكل الناس أقع أنا في المشاكل ... وإنتا تزعل من ناحية إزاي صاحبي وعشرة عمر ويقف مع الصباغ ضدي!! والصباغ يزعل من الناحية التانية إزاي نبقا حبايب وأصحاب وهو عارف إن أيمن فاهم غلط وما يقفش معايا ضده!! بص بقا إنتا وهو : أنا بقول اللي يُمليه عليّ َ ضميري بعد كدا اللي عاوزني كصديق أهلا وسهلاً بيه واللي مش عاوزني بصراحة ما يشرفنيش بعد الكلام دا إن واحد ذو عقل مغلق بالطريقة دي يكون صديق أو إنه يزعل مني علشان ما وقفتش جنبه عالباطل...
خلوني أكمل الحكاية... أيمن بيقول إنه علّق عند الصباغ -لما شاف إنه كاتب عن واحد بهائي- التعليق دا
ايه ده بهااااااااائى .. معلش الكلمه تقيله على ودانى
وأتبعه بالتعليق دا
الاختلاف فى الرأى لا يفسد للود قضيه ياضباغ .. او انا مكانك مكنتش هروح العزومه دى لان فيها مرتدين مش اصحاب ديانات.. تقبل تحياتى
والتعليق دا في موضوع الإفطاروطبعا دا كله قبل ما يروح مدونة البهائي...
ولما راح مدونة البهائي كتب تعليقه السابق اللي هاجم فيه الصباغ....
أيمن بقا بيقول إنه طبعاً اتنرفز لما لاقي الصباغ مسح تعليقاته على مدونته وكاتبله الرد دا

صاحب التعليق الوسخ .. الرمه يحاسب احسن اعلم عليه..

طبعاً لو الحوار زي ما أيمن قال ودا تعليق الصباغ يبقا طبعا انت غلطان يا صباغ لأنك شتمته ودي مش أخلاق مسلم مدون وكمان برضو نعذرك لأنك إتشتمت على مدونة البهائي فلما شوفت تعليقه كنت أصلاً متضايق منه فكان دا رد فعلك الطبيعي ، بعدها دخل أيمن مدونة البهائي وكتب تعليق للبهائي مش للصباغ بيسأله إيه الفرق بين البهائية وعبدة الشيطان؟؟ قام الصباغ قال للبهائي أفندي كرد بعد أيمن

أحمد الصباغ wrote @ الأثنين, 22 سبتمبر, 2008 at 4:18 م
شادى
متهيألى تمسح التعليقات دى وتكبر دماغك

طبعاً في دي إنت غلطاااان يا صباغ هو ما وجهلكش كلام هو بيكلم البهائي إيه دخّلك؟؟ بس مش دا المهم عارفين ايه المهم يا أيمن إنت والصباغ؟!!؟؟
خليني أسألك سؤال إنت وهو ليه البهائي ما مسحش التعليقات مع إنها فيها بستفة ليه؟؟؟ ومع إن دا كان هيحل مشكلة كبيرة؟!!؟
هل ياتري لأنه جبِّلة وماعندوش دم؟؟ دا أكيد طبعاً بس خليني أقولكم ليه...
عارفين ليه ما مسحش التعليقات يا عم الصباغ إنت وأيمن ؟؟
علشان يخليكوا يا إتنين مسلمين أزكياء تحاربوا في بعض وهو ييجي يسقف ويقول لكم ولّعوا في بعض وانشروا البهائية أكتر وطبعاً يبان قدام الناس إنه مبيردش لأنه محترم وتعاليم دينه السماوية-ههأأو يا سماوية- بتقوله لا تحارب وإن كنت ستموت ههههههههه ويسيبكوا بقا تشتموا وتسبوا في بعض وتخسروا بعض.أظن كلامي منطقي!!؟

خليني أكمّل منك له ... دخل أيمن وعلّق بعد ما أحمد طلب من شادي أفندي البهائي يمسح التعليقات وهو ولااا سأل فيه وقام قال لأحمد
د/ ايمن القناوى wrote @ الأثنين, 22 سبتمبر, 2008 at 9:43 م
ههههههههههههه
شخص حقير والله زى ممسحتها من عندك ومن عندى صح بتدارى كلامك
وبعدين ايه هعلم عليك اللى انت كتبتها على مدونتك يا حضرت
هو انت بقه اللى بتعلم.. ولا انت ماشى بمطوه تعلم بيها على الناس
بص انا بنسحب من اى حوار مع امثالك لانى مش فاضى للمهزله دى

قام أحمد رد بدون توجيه أي سب أو شتيمة رد علي أيمن وقال

أحمد الصباغ wrote @ الثلاثاء, 23 سبتمبر, 2008 at 5:33 ص
شخص حقير والله زى ممسحتها من عندك ومن عندى صح بتدارى كلامك
انا شخص حقير ؟؟

دخلت أنا بالليل لقيت الردود علي مدونة البهائي رديت أنا قائلاً

د. محمد الجوهري wrote @ الثلاثاء, 23 سبتمبر, 2008 at 8:54 ص
أيمن
عيب أوي كداااااااا
بجدعيب يا أيمن
لايجوز أن تسب أي أحد مهما كاااااااان
بخاااااااااصة وإنك مش علي مدونتك
إعمل اللي انتا عاوزه علي مدونتك
ونصيحة من أخ
بطل بقااااااااا
في مثل بيقول ” كل واحد متعلق من عرقوبه”
سيب البهائي هو حر يعبد اللي يعبده مالكش دعوة بيه طالما ما غلطش فيك
وصراحة أنا شايف انك بدأت الغلط في أحمد الصباغ بدون وجه حق
هو حررررررر
يحب اللي يحبه يا عمدا مزعلك في ايه؟؟؟؟
هو شايف ان عليه دور هو قال هو ايه؟؟؟
لما الصباغ يقول أنا بساند نشر الدين البهائي علي مدونته ساعتها ليك الحق تعترض
وطبعا الصباغ مسلم بيتعامل بمبدأ ” لكم دينكم ولي دين”
لكن استحالة في يوم يقول أنا بدعو لنشر البهائية لأن دا طبعا دين غير دينه وهو وااااااثق انه مش سماوي لأن آخر الأديان السماوية هو الإسلام
دااااااا اللي أعرفه عن الصباااااااغ
وكفاية كدااااا بقا يا أيمن لأني تعبت من الحوار دااااااا
أنا آسف يا شادي بس أنا بوجه كلامي لاتنين مسلمين
——————————
أما عن ردي السابق
فدا كنت برد فيه علي كلامك أولا
وعلي بيلو أفندي اللذيذ
اللي بيقول عندك اتصال مباشر بالله-تعالي الله عما يصفون- علشان تقول ان البهائية دين مش سماوي؟؟
هرد تاني بأسلوبك لأن دا هو أسلوب الرد علي المجادلين مثله
هعكس السؤال وهسأله :
وهل عندك اتصال مباشر بالله-تعالي الله عما يصفون- علشان تقول ان البهائية دين سماوي؟؟؟
إثبت بالدليل القاااااااطع ههههه وابقا قابلني وأنا أثبت
هقولك حاجة ما تحاولش تثبت إن دينك علي صواب أمام دين راسخ قوي الأركان منذ ما يقارب من الألف وخمسمائة عام
بس خلاص

شوية وأيمن دخل عالميل فكلمته ودي كانت أول مرة نتكلم عالميل في الموضوع داااا مش زي ما هو قال إن الصباغ باعتني له عالميل علشان أكلمه وقولتله يا عم إنت مالك ومال الصباغ ؟؟ بتشتمه ليه عند البهائي؟؟ إنت حر تقول اللي إنت عاوزه للبهائي وهو برضو حر.. أُفاجأ بوابل من الشتائم القبيحة جداً توجه لي من قبل عم أيمن وقاللي انت بتجامله على قفا أهلي!! إيه التعليق دا؟؟ يقصد التعليق اللي بقوله فيه عيب عند البهائي...
يا عم أيمن أنا مش شايف إن في دا مجاملة للصباغ ..أنا بس بقولك إن أسلوبك غلط...
المهم شوية وعم أيمن قاللي: بص كبر دماغك ومالكش دعوة.. قولتله أنا ماليش دعوة إنت حر أنا قولتلك اللي عندي ... ثواني وقام شاتمني بشتيمة قذرة وقام قافل الميل وماشي..
مش هرد عليك يا أيمن ولا هقولك لسان المرء جزءٌ منه فإن كان حسناً فهو حسنٌ وإن كان قذراً فهو قذرٌ ... لا طبعاً مش مشكلة يا أيمن ربنا يسامحك...
بعد كدا قام أحمد بعد الفجر عمل البوست دا..
وطبعاً بعيب عليك يا صباغ الشتائم الكثيرة اللي فيه والألفاظ اللي لا يجوز أن يكتبها مدون محترم كالصباغ ..
بس يا عم أيمن لاحظت إنه قال في البوست إنه بعتلك إعتذار نص متر.. هو قال كدا في البوست .. طب ليه ما قبلتش إعتذارة يا أيمن؟؟
نكمل.. طبعاً أيمن ما سكتش عالبوست بتاع الصباغ ...مافيش خاااالص أكون أنا عند الله الأفضل في شهر زي دا لأاااا إزااااي!!؟؟ ... قام عامل البوست دا وطبعاً بألفاظ بقا ما يتوصاش ..
طبعاً بقولك تاااااااااني عيب يا أيمن وإنت كمان عيب أوي يا صباغ الألفاظ دي يا جماعة..
إنتم ناس قدوة لقراءكم علموهم إزاي يتكلموا بإحترام وإزاي في أسلوب متمدن محترم في الحوار.. مش همجية زي الجهلة ولا مؤاخذة..
قبل ما أختم كلامي: كلمة ليك يا أيمن بعيداً عن الموضوع بس متعلقه بيه
أنا عملتلك إيه علشان تزعل مني كدا؟؟... بص إنت قولت عن الصباغ بسخرية متمسحنيش من بلوجر وقولت الصباغ مالوش سلطة على حد وإن كلنا زيه... طبعا الصباغ عارف دا كويس لكن المشكلة إنك إنت اللي مش عارفه هقولك ليه... المنتدى اللي عملناه سوا ومعانا أسعد وغيرهم لبلدنا واللي لحد النهاردة أنا حاطط لسه الدعاية بتاعته علي السايد بار في مدونتي بالرغم من إنك إنت نفسك شيلتها أنا بقا ما شيلتهاش؛ مش أنا كنت ماسك مشرف قسمين فيه؟؟ طبعاً بعد المشكلة مع الصباغ شيلتني من الإشراف علي القسمين اللي أنا أصلا ماسكهم إختياري -بمزاجي يعني- علي فكرة مش هعيط ومش فارقة معايا كتير بس أنا بقولك إني لما دخلت المنتدى دا كان علشان متزعلش وطلعت منه وإنت زعلان عموماً إنت أكدتلي إنك بجد ما عندكش عزيز زي ما الناس فعلاً كانت بتقولّي وكنت بكذِّبهم وطبعاً نفس الكلام عملته معاك في فهرس المدونات المصرية اللي أنا أصلاً كنت معاك فيه أيام ما كان لسه فكرة وقولتلك إزاي تنشره والناس تعرفه بالكود اللي يخلي الناس يضيفوه لمدوناتهم واللي كان فكرتي لو تفتكر ومع ذلك شيلتني منه مع إني كنت تاني واحد وطبعااااا ما يهمنيش ولا فارق معايا .. وكمان شيلتني من مدونات صديقة عندك وبرضو متفرقش معايااااا...
أنا بس بوضحلك إنك كررت نفس الكلام اللي كنت بتنتقد الصباغ وبتقول إنه عمله بس للأسف نفذته علي واحد صاحبك عشرة عمر.
------------------------------------------------
ختاماً: يا أيمن ويا صباغ
أنا عمري ما كنت تابع لحد ولا بتودد لحد وأنا مبحبوش ولا من الأذيال يا عم أيمن .. أنا قولتلكم اللي عندي واللي يُمليه عليّ الضمير وربنا يعلم موضوعكم دا تعبني نفسياً قد إيه ... لكن هقولكم كلمة النهاية..
اللي بعد الكلام دا لسه معتبرني صديق أهلا بيه وعلى راسي من فوق...
واللي مش عاجبه آسف إني أقوله إني ما يشرفنيش بعد النهاردة إني أعرف واحد بالعقلية المغلقة والمتخلفة دي.
وأتمني إنكم إنتم الإتنين تعرفوا مين محمد الجوهري.وأتمني ما أخسركمش إنتم الإتنين إلا إذا كان فيكم حد ينطبق عليه كلامي.وساعتها مش هزعل عليه أوعدكم بدااا.
عذراً للإطاله بس كان لازم أوضّح الموضوع كله.
تحياتي للجميع
دمتم سالمين

٢١‏/٠٩‏/٢٠٠٨

ضيـف كــــــــــــريم ونــــــوّرنا

ضيـف كــــــــــــريم ونــــــوّرنا
شهـــــر بحـــــالة في ديــــارنا
أهـــلا بيـــك يـا شهـر الصــوم
وهـــل هــــــلالك يــا قمــــــرنا
*********
مــن إمــــــــــــــتى بنـحسبـــلك
وبالمليــــــــــــــــــــم نـــــرتبلك
وعـنينـا بتنـســـــى النــــــــــوم
مع قدومك وبـــالفوانيس ننورلك
*********
وعالسفــــــرة بنتجمـــــــــــــع
والضحكـــــة تعلــــى وتلعلــــع
بــــلاش البصل بـــــلاش التوم
أحســن في الصـلاة ببقا هفرقع
*********
يــا شهــــر الخــــير والبــركات
يــا نــور ومنـــوّر السمـــــاوات
ببركـــــاتك نقـــــوملك قــــــــوم
ونــــــزود رصـــــــيد حســــنات
*********
ناســــــيين ربنا الــرحــــــــــــيم
وإنه بحـــــــال عــــــباده عليــــم
ياريت عالزمـــــن نبطل لـــــــوم
وندعــي لرب إســــــــمه كريــــم
*********
قـــــــوم ســــــبَّح وقـــــــوم صلي
ولإســــــم رب كــــــــــريم عــــلّي
دا شـــــهر يعني تلاتين يــــــــــوم
بالـــــــذكر للســـــــــانك ســــــــلّي
*********
يا أحــــــــلى ما فــــــيك الصــــيام
وصـــــــــــلاة الفجـــــر والقـــــيام
ونشـــــــــــرب تمــــــــــر ولا دوم
مــــبارك وبعـــــــــــوده الأيـــــــام
*******
----------------------------------------
ملحوظة: القصيدة دي عملتها بعد ما خلصت اللي فاتت بسويعات بجد حاسس إني اتعلمت فيهم كتير جداً من أسلوب الرائع الراحل صلاح جاهين. أتمنى تعجبكم. وفي انتظار تعليقاتكم والتي تضفي عليّ إحساساً بالسعادة.
ملحوظة تانية معلش: طبعا كوووووووول قصيدة هنقول: القصائد دي بيُبذل فيها مجهود ذهني فظيع والله العظيم تلاتة. لذلك ومن هذا المنطلق-حلوة المنطلق دي- حقوق ملكيتها الفكرية محفوظة لمدونتي -يعني اللطش ممنوع يا اخواننا-.وأي حد يحب ينشرها يقول مصدرها أو يستأذن من صاحبها اللي هو أنااااا د. محمد الجوهري
دمتم سالمين.

١٧‏/٠٩‏/٢٠٠٨

حكـــــــــايـة إنســــــــان بســــــــــيط

فـــــــــــــاكر في يـــــوم إتلمينا حــــوالين جــــــــــدنا
وعـمــلنا دايـــــــرة وحـــاوطــناه بيـهـــــــــا كلـــــــنا
كــــــان الحـــــب مجــمعــنا وهـــــو قاعـــد وسطـــــنا
بصِّــلنا واحــــــــــــــــد واحــــــــــــــــــد وقــــال لــنا
عـــــــــاوز إيـــه منـــك لــه لهــــا مني أنــــــــــــا ؟؟
**********
قـــولنالـه يـــــلا يا جــــــــــدو إحكيلنا حــــــــدوتـــــة
بس تكــــون حلـــــــــوة ومتكــونشي ملتـــــــــــوتـــة
بصِّلنا وقال خلاص أحــكيلكم عن القطــــــة الزغنطوطة
بصـــت هــــناء لجـــــــــــــدو وهـــيا مـش مبســـوطة
وقالتله مش نــاقص إلا تحكيلنا عــــــــن فـطــــوطــــة
**********
طبطب علـيهــا وقــــــــــال لهـــا يـا بنتي حيـرتينـــــي
طـَب عـــــــــــــــــاوزه إيـــه بس قوليلـي دِلّــيني ؟؟؟؟
قـالتلـــه حــــــــــــــدوتـــــــة حلــــــــــــــوة تشـجيني
ولا انتـا بـس شــــــــــــــــــاطـــر تقـــــولــي جننتيني
قـــــال لــها هــــــــاحكيلك يــــا لمــاضة مــــــن عيني
**********
بـس اسـمــــــــــع وركِّـــز معــــايــا وبص فــي عـنيـا
أنــــا هـحـــــكـي حـــــــــدوتــــة مــش هــغـني أغـنية
طــــــرطأ ودانـك يـــــــــــــا واد إنتــــــا وهـيـــــــــــا
هحــــكيلكــم حكــــــــايــــة واحـــــــــــنا فـ الصـبحيــة
وبـعـــدهــا تـاكـلـوا مـن إيـــــد سِتُـكُم طبــــق المهلبيـة
**********
قــــولنـالـه يـــلا يـــا جـــــــــدو جـننتنـا جـنـــااااااااان
قـالّـنا طب إصحوا معــــــــــــــــايا وطرطأوا الـــــودان
وإنتي يا هـــــــــــناء صحصحي وارمـــــــي اللبــــــان
كـــان يـــــــامــا كـــــان ... كــان فــي إنــســــــــــان

مكـســــور غـلبـــــان ... كــــــل أملـه يعيش في أمـان
**********
إنـســــــــــــــــان طـــــيّب
ولــــــــــــربــــــه قُريّـــب
شـــــــــــاف ظـــــــــــــــــــــــــروف والله تـشّــــيـِب
مـــــا عُـــمـــــــــــره في يــــــــــوم علي شــيء عيِّب
بـجـــــــــــد بـجـــــــــــد... إنـســــــــــــــــــان طـيب
**********
دا كــــــــــــان إنـســـــان .. بـــدائـــــي قــــــديـــــــم
مــش أي بـدائــــــــي ... دا بـدائـــــــــي عـــــــــظيم
إتـعـلـم يـــــــزرع خُــضــــــــــــرة وبـرســـــــــــــــيم
وبـــــإيده الصـحــــــــــــــــرا ... بقـت نعــــــــــــــيم
بــــالذمـــــة دة ... مــــش يـبـقـــــــــــا عظــــــــيم؟؟
**********
ومــن زمــــــــــان .. صـــــنع حـضـــــــــــــــــــــارة
بـنى هـــــــــــــــــــــرم ... مـــــــــــن الحجـــــــــارة
وفـــي إســــكنـــدريـــة ... نـــوّر منــــــــــــــــــــارة
وقعــت مع الـــــــزلــزال ... مــا تقــــولشي غـارة !!
يــــا خســـــــــــــــــــــــــارة يـا خســــــــــــــــــــارة
**********
حَكَـــــــمُه نــــاس شُــــــــــــــــــــداد شُـــــــــــــــداد
زي قــــراقــــــــــــوش وزي فــــــــــــــــــــــــــــؤاد
ومـــــع كــــــــــــــل دا إصــــــــــــــــــــــــــراره زاد
مــــــــــــــــــــين يغـلبه في العــــــــــــــــــــــــــناد!!
مـش أي حـــــــــــــــد ... دا بـجـــــــــــــــــــــــد واد
**********
وعـالـفـســـــــــــــاد ثـــــــــــــــــــار وثــــــــــــــــار
وكــــــــوِّن جـــــــــــــــماعـــة الـضُـبـاط الأحـــــــرار
طبعاً جـمـــــــــــــــــــــــال صـــــــــاحــب القــــــــرار
حــــــــــــــاكــــــم قــــــوي نــــــــــــــور ونــــــــــار
حــــارب الـفـســــــــــــــاد والإســــــــــــــــــــــتعمـار
**********
شـاف الفـيـضــــــــــان بنالـنا ســــــــــــــــــــــــــــــد
عالميـة عـــــــــــــالــــــي ... ومـــــــا قــــده قــــــــد
حـجــــــــــــــــــــــــــز الفـيـضــــــــــان ... ورده رد
ومات جــمـــــــــــــــــــــــــــال ... مـــات الـجـســـــد
وســـــــــــــــاب ذكـــــــرى ... حـــــــاكـم أســــــــــد
**********
مســـــك الحُـكـــــم الســـــــــــــــــــــــــــــــــــــــادات
جــــــاب الـنــصـــــر ... دمّـــــــــــر إيـــــــــــــــلات
حـطّـــــم بــارلــيــــــف ... فــي ســــــت ســــاعـــات
ملِك أكتــــــــوبــــــــر ... ولـــه في السلام أروع آيات
ومـــات شــــــهيـد وأعــمــــاله إتحسبت من الصالحات
**********
ومســــــكـنا حـســــــــني فــي اتـنـيــن وتـمــــــــانيـن
وعيـشـــــــــــنــــا مـعـــــــــــــاه ســـنـيـن وســـنـيـن
كُـــنا عـــــــــــــايـشــــين وكُــــــــنا مـبســـــــــوطـين
لـيـه الـفـســـــــاد ظـهــر آخــــر خمس ست سنين ؟؟؟
لـيـه الـكـوســـة والســـــــــرقة فـي بــلـدنـــــا مقطعين
**********
لـيـه بـقــت الــحــــــــــــــــــالــة زي الـطــــــــين ؟؟؟
لا مـــــــؤاخذة يــا ريـــس ... إحـــنا بني آدمـــــــــين
والــرســــول الـكـــــريم قـــــــــال كـــلنا متـســـاوييـن
بـســـــــــألك الـحـــاشـيـة ليــــــــــــــــه عـالـييـن ؟؟؟
ليــــــــه دايسين على روس غـــلابة مطحـــــونين ؟؟؟
**********
مبلــــــــومـش عـليـك يــــــا ريـس دانــــــا بــدعـيـلك
وزي مـــا قــــال الشعـــــراوي بقـــــــول ربنا يـديــلك
وتقـــــــــدر تـخــــــلِّـد ذكــــــــــرى زي ســــابـقـينـك
وإلا مـــــــــن رب العبـــــــــــــــــــاد يــــــــــا ويـــلك
بـدعـيـلك مــــن قـلـبـي ربـنــــــا لـصــــوابـك يـهـديـك
**********
بـكـــــــــده خــلصـــــت حـــدوتة الإنـســـــان الجمـيـل
عــــــــارفـــين دا مـين يــــــــاولاد؟؟ دا ابـن الـنيـــــل
اللـــي شــاف الـعـــــز- قصـدي الخير- وشاف الـويل
و بـرضـــــــــو لسه صـــــامد ... أصــل أصله أصــيل
وأصله بـرضــو عارف ... تـــاريــخــــــــــه الطويـــل
**********
وتـــــــــــوتــــة تـــــــــــوتـــــة
خـلـصـــــــت الـحـــــــــــــدوتــة
يـــــــــارب تــكـــــون حــلـــــوة
ومتكـــونشـــي ملتـــــــــــوتــــة
ولا تكون قديمـة وعليها عنكبوتة
******

----------------------------

ملحوظة: القصيدة دي بكتب فيها من فترة كبيرة بس غيرت كتير في شكلها يعني مكانتشي واخدة شكل الحدوتة وعدلتها ... أتمني تعجبكم يااااارب .
ملحوظة زوغنطوطة كمان معلش: يا جماعة والله القصايد دي بيتبذل فيها مجهود ذهني كبير.. فياريت اللي يحب ينقلها ... ينسبها لصاحبها ... وحقوق الملكية الفكرية محفوظة للمدونة .. وكل عام وأنتم بخير .. وانتظروا القصيدة القادمة .. بخلص فيهااااا ...

دمتم سالمين
د. محمد الجوهري.