٣٠‏/٠٥‏/٢٠٠٨

زمـــــااان

دي حــــــاجة غــــريـبـة .... دي حـاجة تحير

أمـــانـيـنــا كـبـيــــــــــرة .... والوقــت قصيَّر

تيـــجــي نــرجع نفتكــــر .... وانتا صــغــيَّــر

فاكر وانتا الصبح بتلعب .... السلم والتعبان

ولا العصر لما تـروحوا .... تصطادوا حيتان

وتــرجعـــوا المغـربـيـة .... بــالكيس مليــان

تشــووه وتــاكـلوا كلكم .... مع ابن الجيران

فـــاكــــــــــر الجـيــران .... جيـران زمااان

كـــــان بينهم حـــــــــب .... أُلـــفـــة وحـنـان

راح الـحــــــب .... مع اللي كان وكان وكان

بــالـــذمـــــــــــــــة دي .... مش حــاجة تحير

فكـــــــــر كـــويــــــس .... مبقيتش صــغـيـر

عـقـلك مُخـيـــــــــــــــر .... مـاهــوش مُسـير

فـكّــــــــــــــــــــَر ودوَّر .... إبـحــث وقــــــرَّر

وخـــليـــك فـــــاكـــــــر

إن الــحــيــــــــــــــاة .... مش يوم دي ساعة

خـلـيـك واعــــــــــــي .... خـلـيـهـا في طــاعة

خـلـيـهـا فـي طـاعــــة.
-
في انتظار تعليقاتكم.
دمتم سالمين


٢٨‏/٠٥‏/٢٠٠٨

ملتقي مدوني كليه الطب البشري بالزقازيق لأول مرة في التاريخ

السلام عليكم ورحمة الله وبركاته
مرحبا بكم من جديد
بعد حفل توقيع مدونات مصرية للجيب الإصدار الأول بعنوان مشروع وطن كما أشرت في البوست السابق . تكلمت مع الأخت المدونة والزميله بكليه الطب ياسمين والتي نشر لها موضوعين من مدونتها في الكتاب علي الإيميل طبعاً لأن د. ياسمين للأسف تأخرت في الوصول للحفل وقضتها مواصلات ورجعت بدون ان تحضر الحفل كما أشارت في مدونتها أجدع بنوته وعالم حدوتة . وأثناء حديثي معها وتفقدي لمدونتي وجدت رسالة من الزميل الجعّر أحد أصحاب مدونة أَبَص كتعليق قال فيها أن عنده عرض أو Presentation لمادة طب المجتمع . وقام بدعوتي ودعوة الأخت ياسمين للحضور . تحدثت مع ياسمين عن هدذا الموضوع ثم اقترحنا تجميع المدونين بالكلية لأول مرة لأن ميصحش نبقا مدونين ومن مكان واحد ومنعرفش بعض . فتحركت وقمت بدعوة من أعرف وكذا ياسمين .وسأقوم بتغطيه لمن حضر معنا. ونفتقد من لم يحضر كالحاج أدهم الشهابي مثلا وغيره الكثيرون .
والآن مع التغطية:




هذه صورة جماعية بمبني مدرجات الفرقة الأولي والثانية. يتوسطهم الدكتور أحمد الحاج وسط ابناؤه وزملاؤه مدوني طب الزقازيق.


ودا محي الجميل وكما يقول هو واو الوصل بين الجعِّر و أبو رمانة. وكان يساعد الجعر و أبو رمانة في حمل البيبسي ( المقاطعة ).


ودي كمان صورة لمحي وهو معانا في الإجتماع . للأسف محي مش مدون علشان معندوش وقت طب بقا يا جماعة - علي أساس اننا دبلوم تجارة - يا محي كلنا دكاترة ومدونين عادي يعني. هي عامة ميول مش اكتر . بس ما فيش مانع انك شخصية عسل وجديرة بالإحترام.


أما دا بقا المدون الجميل محمد جمال صاحب مدونة نقول كمان واللي بجد اسم مدونته علي مسمي لأنه فعلا هادي جداااا. وشخصية جميلة.


أما دا بقا فإسمه فكري(كيكو- المحقق كونان) صاحب مدونة جبتولي الضغط . دا شخصية ممتازة ودماغه جبااارة بجد.



أما اللي لابس شيميز أبيض مقلم بأزرق في الصورة دا هو المدون الجميل شادي . هو نايم مش عارف ليه . تقريباً كان سهران بالليل. مش هنقول بتذاكر يا عم شادي. متقلقش.



أما دي بقا مين ما يعرفهاش دي يا جماعة ياسمين هــانــم صاحبة مدونة:


د. أجدع بنوتة و عالم حدوتة


&


آدم وحواء فـ علاقات لا محدودة


والتالته جاية ان شاء الله . وخمسه وخميسة .


وطبعاً زي ما هو باين في الصورة سمسمة بتوقع ليا في الكتاب ودا توقيع حصري يا جماااااعة أنا الوحيد اللي ياسمين وقعت ليه علي نسخة من الكتاب مش عارف الطم ولا أزغرط من الفرحة. لأن سيادتها نزل ليها موضوعين- مش حتي موضوع واحد- في الإصدار الأول من مدونات مصرية للجيب واللي يحمل اسم مشروع وطن. طبعاً يا سمسمة انتي عارفة ان دا مش حسد دا حقد ومش أي حقد دا حقد وبغِّل .


وإليكم ما كتبته لي في التوقيع علشان تخليني أبَطَل حقد بس أبداً:


I am a girl infront of


a boy


asking him to


Read This book


dr agd3 banota


2008-5-28


طبعا التاريخ غلط وهيا صلحته الي 27 ودا بسبب الإمتحانات معلش يا سمسمة بتحصل في أرقي العائلات.


بجد يا ياسمين سعيد بمعرفتك .

****************************





وطبعا ناس كتير اتعزموا وكنا متوقعين حضورهم وما حضروش علي رأسهم محمد عبد الكريم صاحب مدونة مطرح ما ترسي دقلها . والباشا الكبير أدهم الشهابي صاحب مدونة من أدهم عن أي شيء. وأخوه مراد الشهابي صاحب مدونة من أجل البشرية المعذّبة . وغيرهم الكثير


هذا عن التغطية. وسيتم رفع فيديو في تحديث لاحقاً.



أما عن الأفكار القادمة:


إقترحنا إن شاء الله عمل أسرة في العام القادم لمدوني طب الزقازيق وستقوم بأنشطة متعددة كمجلة حائط . رحلات .. وغيرها وكمان اقترحنا عمل جروب عالفيس بوك هيتبرع اخونا الجعر ويعمله هو قال كدا وطبعا هيخليني ادمين.


وفي الاجتماعات القادمة سيتم تحديد الأهداف وعمل دراسات جدوي وهنعمل كلام كبير وزي الفل.




وفي النهاية أقدم اليكم قائمة بأسماء مدوني طب الزقازيق أو كما تتلامض أجدع بنوتة وتقول زجازيج ميديكال بلوجرز :


اجدع بنوته & عالم حدوته


كل يوم في جديد ذكريات.. وأحلام.. محمد الجوهري


أبــــــــــص


خبيـــــب


واحد من النـاس


نقوووول كمان


جبتولى الضغط


فرى .. كيللر


بلدك يا رأفت


حكاوى القهاوى


على قرقر


عمرو اكشن


عيش ندل تموت محروق


اذا لم تكن معى


dizzy-thoughts
Legend of the fall
هيروووووو


من اجل البشريه المعذبه


من ادهم عن اى شىء


كلمات الصمت


قصاقيص مشاعر


الشباب .. المتكاظى


مطرح ماترسى دقلها


Someone Different


وأخيراً وليس آخراً .. مسك الختام


فليعد للدين مجده




وطبعا لسه في ناس هتنضم لينا


ويارب ما نكونش نسينا حد





ودا بوست من أجدع بنوته هانم عن نفس الموضوع . عدوا عليها ينوبكم ثواب.




أتمني تكون التغطية جيدة .


دمتم سالمين.


٢٤‏/٠٥‏/٢٠٠٨

أول فرحة بجد ... لكل المدونين المصريين

لقد كان حلماً حلم به الكثير من المدونين ... ولكن لم نتوقع حدوثة ... فكان الميلاد ... بعد مخاض أفكار مئات بل آلاف من المدونين المصريين ... فجاء المولود وفاق كل التوقعات ... وفرح به الجميع ممن حضروا حفل ميلاده ... وتمني الكثير والكثير ممن لم يحضروا لو أن الظروف خدمتهم ليحضروا هذا الميلاد ويباركوا لأنفسهم ولزملائهم علي الميلاد السعيد ... ويفرحوا جميعاً لميلاد هذا المولود


وإليكم صورة المولود


أرأيتم كم هو جميلاً ... ويالروعة إسمه ... مشــروع وطن ... مـولود رائع حقاً ...

كم كانت سعادتي به ... كم كانت سعادتي بحفل ميلاده ... لقد التقطنا بعضاً من الصور التذكارية لهذا الحفل البهيج علنا نتذكرها يوما ونفرح حقاً من قلوبنا ...


كم هو جميل أن يحترم الفكر في مصرنا

أري أن هذا بداية التطوير
فنحن شباب الوطن نصوغ فكر الوطن
نكتب بآرائنا ونعبر عن أنفسنا وهذا في نظري حقا ... مشروع وطن
مشروع وطن ... أيا كان ... ترميم ... بناء جديد ... إعادة هيكلة

إلا أنها حقا خطوة بأقدام راسخة نحو مستقبل سعيد

خطوة قوية ... نحو إعادة حضارتنا وثقافتنا
خطوة جادة ... نحو اللحاق بركب الحضارة واللحاق بركب التقد
وخطوة بخطوة وحركة تلو الحركة يتحقق المــراد ... وهذا المولود أولي الخطوات

لقد قمت بتغطية جانباً من حفل الميلاد أعرضها لكم علكم تشاركوني فرحتي ...

إليكم صورة لمكان الميلاد


مكتبة عمر بوك ستور - شارع طلعت حرب - من ميدان التحرير - أعلي مطعم فلفلة



ودي المنصة - ( الدكاترة اللي جابوا المولود)


من اليسار لليمين :

أ/يحي هاشم مدير دار اكتب والتي تولت طباعة الكتاب (ولادة المولود).

أ/ أحــمـــد الـبــوهــي


أ/إيناس لطفي

ودي صور عن قرب لناس كانوا في الحفل

دا الأستاذ/ يحي هاشم مدير دار اكتب للطبع والنشر زي ما سبق وضحت



ودي بقا الأستاذة/ إيناس لطفي صاحبة مدونة عايزة أتكلم واللي شاركت في ميلاد المولود زي ما وضحت سابقاً.


أما دا بقا حبيب قلبي المدون الكبير/ أحمد الصباغ صاحب مدونة خالووو وهو بيكتبلي توقيع في نسخة الكتاب بتاعتي وطبعا واضح العرق الي بذله أحمد باشا بين جماهيره وبين أو تي في والإذاعة وإذاعة مش عارف ايه عالإنترنت .




الصباغ وحوسة بين جماهير المعجبين.



أحمد باشا الصباغ وتوقيعة علي نسختي من الكتاب.


ودا الأهداء بتاع أحمد باشا ليا وربنا يديم عليا الحب والتقدير والإعزاز يا حاج أحمد. علي فكرة نسيت أقول إن مقال للصباغ نزل في كتاب مشروع وطن عن ظاهرة التوكتوك . ألف مبروك يا أحمد باشا . والله انا فرحان زي ما يكون مقال ليا بالظبط نزل . ودمت مبدعا صديقي العزيز .


ودي بقا حدوتة لوحديها ... مين ميعرفهاش ... دي ست آبي هانم ... اللي بجد كنت سعيد جداً لما شوفتها ... وواضح من الصورة انها بتكتبلي إهداء علي نسختي من الكتاب ... مبروك يا آبي تقدير المنظمين للحفل ونشر مقال من كوكبك الخاص انتي وبطوط في النسخة الأولي وفرحتلك بجد والله العظيم 3.


ودا توقيع رحاب (آبي) ليا : إلي أخي العزيز / تقريبا مش حافظه اسمي .. ربنا ميحرمنيش منك ولا يحرمك من قللي ولا خرفاني وبطوط كمان توقيع آبي هانم بتنجاني .... يختششششي عسل وربنا ... ربنا يخليكي لينا ويخليلك بطوط ... ومبروك علي الخطوبة وباركي لـ أ/إسلام نيابة عني.

ودا بقا الأستاذ/ أحمد محمد علي صاحب مدونة عيل مصري واللي بجد حبيته جدا واحترمته جدا وان شاء الله التعارف يزيد.وألف مبروك أ/ أحمد علي مقالك اللي اتنشر في الكتاب .


ودا أشرف صاحب مدونة أخف دم اللي بجد بضحك فيها من قلبي . للأسف يا أ/ أشرف ملحقتش أتعرف عليك . متعوضة إن شاء الله.


أشرف وقصيدة شعرية . الف مبروك يا أ/ أشرف علي الموضوع اللي نزلك وبجد مدونتك تستاهل كل تقدير.


ودا أبو خالد عم المدونين وصاحب مدونة حكايات أبو خالد . والراجل ده بحبه زي والدي الله يرحمه. ربنا يخليه يارب ويعيش ويمتعنا بحكاياته المشوقة . واضح من الصورة إن أبو خالد بيكتبلي اهداء . هو صراحه كتب اهدائين دا كان الإهداء الأول :

الإهداء الاول بالقلم الأزرق كان قدام مكتبه عمر بوك في الدور الثاني وكتب فيه : إبني الحبيب / دكتور محمد الجوهري سعيد أن أراك وأتمني لك من أعماقي التوفيق إمضاء أبوخالد.ثم كتب أحبك في الله . توقيع أبو خالد . أما الإهداء الثاني فسأنقله لاحقاً.


ثم انتقلنا الي كافيه البورصة وهذه بعض الصور هناك:



وعلي البورصة قام أبو خالد بكتابة الإهداء الثاني: إبني الحبيب / محمد الجوهري كوني هنا أو هناك فأنا أحبك في الله ، أتمني أن أراك قريبا توقيع أبو خالد .كم انت رائع يا أبا خالد و أنا أيضا أحبك أطال الله عمرك . وحسن عملك .



ودا دكتور محمد أبو زيد صاحب مدونة دكتور حر . واللي بجد حبيته جدا واحترمته جدا . ومبروك يا دكتور علي موضوعك اللي اتنشر.




ودا الأخ اليعقوبي ذو الآراء البناءة. تحياتي له.




ودا الأخ الجعفري صاحب الأفكار الطامحة والبناءة . تحياتي له ايضاً.

******************************************************************


هذا وقد افتقدنا في الحفل لاختنا العزيزة د. ياسمين صاحبة
مدونة أجدع بنوته في عالم حدوته
مدونة آدم وحواء فـ علاقات لا محدودة
و أبارك لها نشر موضوعين من مدونة آدم وحواء فـ علاقات لا محدودة. وان شاء الله يوه الثلاثاء أعرض توقيعها لي في الكتاب بعد لقائي معها لأول مره في اجتماع مدوني كلية طب الزقازيق.

فعلا كنت سعيد وأنا حاليا سعيد
وبتعليقاتكم هبقا أسعد وأسعد
مليون مبروك لكل المدونين
وألف شكر علي الافكار البناءة.
دمتم سالمين




١٧‏/٠٥‏/٢٠٠٨

بعض ذكريات ليبيا


قراء مدونتي الكرام ... مرحباً بكم من جديد ... أكتب اليوم وليس برأسي أي فكرة محددة ... أطلق العنان لقلمي ليتحرك ويعبر عني ... فمنذ فترة طويلة لم أخلُ مع نفسي هذه الخلوة ... والآن أترك المجال لقلمي علَّه يتحرك ويكتب معبراً عني ... هناك مثلٌ عامي يقول ... طول ما احنا عايشين مسير الحي يتلاقى .. ياااه الأمثال دي فعلاً كتير بتعبر عن مواقف بتحصلنا ... مسير الحي يتلاقى .. طب ايه رأيكم كل واحد حالا يفتكر حد كان بيحبه ومن زمان ما قابلوش ... أنا مثلا دلوقتي افتكرت زمايلي اللي كانوا معايا في ليبيا في أولى إبتدائي ... سعيد وطه السوري اللي اتكلمت عليهم في البوست دا ... ياااه بكون سعيد جدا لما أكون صداقات جديدة .. وبكون أسعد لما أصحابي يقولولي إنهم بيحبوني ... يااااه الحب .. الحب دا نعمة كبيرة جداً ... مبنحسش بيها إلا لما نفقد الناس اللي بنحبهم وبيحبونا ... ساعتها بنعرف قد إيه كنا بنحبهم وقد إيه كانوا بيحبونا .. وقد إيه كانت الحياة حلوة .. بس يا خسارة الحاجات الحلوة بتروح تملي بسرعة .. بس بيفضل مواقف وذكريات لما بنفتكرها بنعيش الموقف وكأنه كان من فترة بسيطة ... أذكر مثلا عندما كنا مع والدي رحمه الله في ليبيا في أوائل التسعينات .. كنت في الصف الأول الإبتدائي في مدرسة ليبية تسمى الحزام الأخضر وكان مجاوراً للبيت الذي كنا نقيم فيه منزل رجل ليبي يدعي الزوفري .. هذا الرجل كان طيبا للغاية وكنت بحبه جداً .. كان تاجراً يمتلك محلاً للبقالة علي ما أذكر .. كان أمام بيت عم الزوفري مساحة كبيرة خاوية تعادل مساحة ملعب عندنا .. المساحة دي كانت فاضية تماماً إلا مما يخرج ربانيا من باطن الأرض من الحشائش والإستبس الفقير وكان عم الزوفري يربي فيها الدواجن والطيور المنزلية .. كان عم الزوفري عنده مملكة عظيمة من الدجاج والأرانب والبط والحمام والديوك الرومي ... وكان ضمن هذه المملكة الحيوانية ديكــاً حتي الآن مازلت أذكر شكله كان بحجم خروف إن لم يزد عن ذلك -وحقا لا أبالغ- وبعد أسبوع من أول قدوم لي من مصر إلي ليبيا وأنا عائد من المدرسة ذات يوم إنقض علي الديك الضخم لا أعلم لماذا وأخذ ينقر في صدري وطبعاً كوني كنت صغيراً اتخضيت -عليا الطلاج اتخضيط يا حج كامل- وجريت ... أخذت أركض وأخذ الديك يركض خلفي لا أعلم ماذا يريد من صدري وبطني .. كلما أذكر هذا الموقف أضحك كثيراً ... وكان أبي رحمه الله كثيراً ما يذكر لي هذا الموقف لإضحاكي ... الغريب في الموضوع أن هذا الديك كان عارفني .. معلِّمني يعني .. وكل يوم وأنا راجع من المدرسة ألاقيه واقفلي وطبعا لازم نعمل سباق جري سوا ... كانت أيام حلوة ... ياريتها دامت .. بس مش كل حاجة حلوة الواحد بيعوزها بياخدها ... وجعت دماغكوا معلش بس كنت بتكلم مع نفسي .

أتمني يكون البوست عجبكم ولو إن ما فيهوش موضوع مثيرأوعدكم البوستات الجاية هتبقا أحلي إن شاء الله.

دمتم سالمين ودامت تعليقاتكم لي

د. محمــد الجـــوهري

ملك ميت غمر والسودان والكونغو الدكتاتورية وزيمبابوي وأنجولا وتنزانيا

٠٨‏/٠٥‏/٢٠٠٨

الدنيا لسه بخير أومال في إيه بقا ؟؟؟


قراء المدونة الكرام ... مرحبا بكم من جديد...
اليوم أتكلم عن موضوع غريب بعض الشيء..هو بالطبع ليس غريباً .. لكنه أصبح نادرا .. إنه الخير .. كثيرا ما نضحك ... لكن لنسأل أنفسنا سؤالاً .. هل الضحك من قلوبنا ؟!!؟ كلا .. إسأل نفسك متي كانت آخر مرة ضحكت فيها من قلبك .. أو كنت سعيداً حقاً .. ستجد نفسك لا تتذكر .. لماذا؟؟ لأن الخير قلَّ في هذا الزمان. كنت أعتقد أن الخير انتهى أو انعدم ولكن أفاجأ ببعض المواقف تؤكد صدق حديث سيدنا رسول الله -صلي الله عليه وسلم- " الخير في وفي أمتي إلي يوم يبعثون " صدقت يا حبيبي يا رسول الله. اللهم اجمعنا بك عند الحوض الشريف لنشرب من يدك الكريمة شربة هنيئة لا نظمأ بعدها أبدا.. اليوم كالعادة صحيت من النوم صليت وذهبت إلي الكلية وانتهيت من الراوند المطلوب وعدت الي ميت غمر.. ذهبت لشراء أغراضاً للمنزل وفي الطريق .. حدث موقف عادي قد يمر علينا .. لكنه حرَّكني فكتبت هذا الموضوع .. أثناء مروري علي إحدى المحلات وكان المحل ناصية شارع صغير متفرع من شارع بورسعيد وكان صاحب المحل ينظف المحل .. فكان يكنس التراب علي الأرض وأثناء مروري إذا به يجر التراب أمامه بقوة ليرمي به خارج المحل تصادف ذلك مع مروري ولكنه لم يكن يراني كونه بداخل المحل وأنا قادم من شارع بورسعيد .. فطار التراب ولم يصبني منه ذرة واحدة.. فحدث شيء أزهلني .. وجدت صاحب المحل -رجل في الستينات من العمر أعتقد أنه يكبر أبي رحمه الله في العمر- يعتذر وبخجل وااااضح قائلاً " أنا آسف يابني والله ما شوفتك .. حقك عليا وجاء مسرعاً وأخذ ينفض البنطلون بتاعي ... الدهشة أزهلتني وأصبت بازبهلال حاد في المشاعر -لا والله الموقف أثر فيا - فما كان مني الا أن أمسكت بيده قائلاً له " العفو يا حاج ما حصلش حاجة ولا في تراب ولا حاجة وحتي لو في ولا يهمك يا حاج " .. فإذا به يربت على كتفي قائلاً " الله يسترها معاك يابني " ياااه دعاء جميل جداً فماذا في الدنيا أفضل من الستر ؟؟؟ أري أننا في الدنيا لا نحتاج أكثر من شيئين : الستر والصحة. اللهم استرنا أجمعين ... حرَّكني هذا الموقف إذ أني أرى أن الإحساس قلَّ أو انعدم في هذا الزمان .. لكن الخير مازال موجوداً .. وصدق رسول الله -صلي الله عليه وسلم- .. فبرغم عموم الشر وانتشار الأحقاد والضغائن إلا أن الخير مازال موجوداً .. فكم من أخ يكره أخيه -إبن أمه وأبيه- ويتمني له الهلاك .. لكن دائماً الخير موجود أذكر مثلاً شخصين أعرفهما .. إثنين إخوات .. محمد وإبراهيم .. الإتنين إتجوزوا وخلفوا وعايشين في بيت واحد مع والدهم ووالدتهم .. محمد خلف ولد أسماه إبراهيم وإبراهيم خلف ولد أسماه محمد. كنت يوماً ما في زيارة لهما فقلت لهما " مسميين ولادكم بأسامي بعض ؟؟ ربنا يديم عليكم الحب " قالوا -بهذار طبعا- " حب إيه يا عم الحج ؟؟ دانا مسمي إبني ابراهيم علشان عالغدا أقوله كل يا إبراهيم يا كلب والثاني يقولي وأنا مسمي إبني محمد مخصوص علشان عالغدا أقوله كل يا محمد يا واطي هههههههه تخيلوا إختاروا أسامي أولادهم من أجل المزاح والنقار مع بعض .. أدام الله عليهم الحب ... فأخذ السؤال يتحرك بداخلي ..طب ما الدنيا لسه بخير أومال في إيه بقا ؟؟؟
هي دعوة للتفاؤل .. دعوة للحب .. حبوا بعض أكتر .. حبوا ربنا أكتر هتلاقوه بيحبكم أكتر وأكتر ..

يارب البوست يعجبكم
دمتم سالمين
د.محمد الجوهري