وداعا الفين وسبعة ..... أهلا الفين وتمانية

السلام عليكم ورحمة الله وبركاته. قراء مدونتي الكرام ازي الحال كده والله واحشني جدا من زمان ما بكتبش انا عارف بس والله نفسي اكتب مش بلاقي موضوع اكتب فيه بس الحمد لله لقيت موضوع أهوووو . أتكلم اليوم عن نهاية عام 2007 بأفراحة بأحزانه .عام 2007 عام -بالنسبة لي-عام متضارب بين السعادة والحزن، أحداث كثيرة أفرحتني وجعلتني في قمة السعادة وأحداث كثيرة أحزنتني سأسرد ما استطيع منهم في هذا الموضوع ان شاء الله.والآن أبدأ بالحديث عن حاجات حلوة حصلتلي في 2007 أهمها طبعا ان أختي داليا بكالوريوس ألسن جامعة عين شمس - اتجوزت في اخر شهر 4 عام 2006 أي بعد وفاة والدي رحمه الله بنحو شهرين وأيام معدودة- ولدت وجابت بنوته زي القمر اسمها حنين في اخر شهر 3 -2007 عملت عنها الموضوع ده بس الصور شوية قديمة لانها من زمان ان شاء الله هبقي أحط كمان شوية صور ليها جديده لأنها والله أحلي من كده بكتير طبعا مش عايز أقولكم قمة السعادة اللي كنت فيها لما عرفت ان البرنسيسة حنين بنت المهندس وائل شرفت الكون وفرحتي أكبر لأني اخيرا بقيت خال ياااه سعيد جدا لهذا اللقب العظيم وبقا عنده مخلوله زي ما أحمد الصباغ بيقول هنا وبخاصة لأن المثل بيقول الخال والد يعني أبشركم اني خلفت من غير ما أتجوز ههههههه وطبعا أول حاجه اتقالتلي من ماما : بقيت خال أهو يا واد اياك تعقل بقااا بس هيهااااات اه والله هيهااااات - خمس ألفااااات - برضو من الحاجات اللي فرحتني خطوبة أختي الدكتورة دينا الكبيرة -بكالوريوس طب وجراحة جامعة الزقازيق-واللي هيا أغلي حاجه في حياتي علي دكتور صيدلي مصطفي حامد الصياد مدير فرع مجموعة صيدليات شركة النهدي فرع أبها بالمملكة العربية السعودية وطبعا جوز أختي وحبيب قلبي دكتور مصطفي مش عايز اقولكم قد ايه محترم وابن ناس وما يتخيرش أبدا عن جوز أختي التانية باشمهندس وائل اللي شغال في شركة القاهرة لتكرير البترول بطنطا اللي كنت بتمني ييجي لأختي الدكتورة دينا واحد محترم وابن ناس ومتدين زيه والحمد لله ربنا كرمها وكرمنا باللي زيه وربنا يخليهم لبيوتهم ونسمع عنهم كل خير ،كمان من الحاجات اللي فرحتني جدا في ألفين وسبعة اني بحمد الله تميت سن الواحد وعشرين يعني في نظر الحكومة والناس بلغت سن الرشد أي أصبحت رشيد وهذا أسعدني كثيرا ولكن في نظر البيت ولا هيعقل لو بعد 100 سنه بس اللي منرفزني ان الكليه لسسسه عليها كتيرررر وزمايلي خلصو كلياتهم الأربع سنين ، كمان من الحاجات اللي فرحتني في ألفين وسبعة اني بقيت في خامسة طب والحمد لله وطبعا في ألفين وسبعة فرحت قوي لخطوبة بنت عمي الاستاذ محمد علي الجوهري علي العريس العسل أحمد ودلعه حساام حبيب قلبي وبعدين خطوبة ابن عمي محمد حسين الجوهري علي عروسته شيماء وبعدين جواز بنت عمي الاستاذ محمد علي الجوهري علي عريسها قبل العيد بشهرين كده تلاها محمد ابن عمي واتجوز بعديها بأسبوع وبالرفاء والبنين لهما ويارب أتمم لهم علي خير وبارك لهم في حيواتهم-جمع حياة لأنهم جمع- ،برضو أسعدني كثيرا ان أختي الدكتورة دينا أدت فريضة الحج برفقة زوجها الدكتور مصطفي وانهم كلمونا من علي جبل عرفات ودعولي هناك اني أعقل ههههههههه - هو أنا للدرجادي ميئوس مني- ودعولي بالتوفيق في حياتي، وكمان فرحت قوي لما أخدت شهادة الاعفاء من الخدمة العسكرية أو الجيش لأنها والله مش طالبة جيش بعد 7 سنين خدمة في طب وطبعا فرحت كتير بتعرفي علي أصدقاء جدد في الكليه وفي الحياه أهمهم أبو قلب زي الماس أحمد الزرقاني بالفرقة الرابعة طب الزجازيج وناس كده علي الايميل وناس تانية كتير وطبعا فرحتي الكبيرة اللي ما أنساهاش انضمامي لعالم التدوين والمدونات بتشجيع ادهم بيه الشهابي واللي اتكلمت عنه هنا وكمان فرحتي لأن أمور كتير بدأت أشوفها وما كنتش شايفها ولا قيت ناس كتير بجد بتحبني، وكمان فرحتي لأن شقتي أو عش الزوجية بتاعي اتبني ووقف علي حيله اي نعم هو علي الطوب الاحمر بس اهوووووووو شايفه وان شاء الله هظبطه علي طول بس فين العروسة ،و مواقف أخري كتيرة ومتعددة لا أذكرها فرحتني في ألفين وسبعة وربنا يديم الأفراح علينا وعليكم وربنا يكتر من أفراحنا قولو امين-بس مش أبو واحد صاحبي- . هذا عن المواقف التي أسعدتني في ألفين وسبعة اللي هينتهي أهووو بعد ساعات قليلة أما عن بعض ما أحزنني في ألفين وسبعة أولا الموقف العربي والدولي تجاه العرب وتجاه فلسطين ولبنان والعراق وباقي الاراضي المحتلة والله أسأل النصر للمسلمين والعرب علي الاعداء والمجتمع الداخلي مصر يعني الحلوه بس الأوضاع فيها وحشة وبقول يارب وفق حكومتنا وقادتنا لما فيه صالح البلاد والعباد وطبعا الدراسة مخنوووق منها بس ان شاء الله هتعدي ومش هتكلم عنها كتير، كمان في ألفين وسبعة زعلت قوي لضياع أحد أحلامي وطموحاتي الكبري بس ان شاء الله تتعوض في حاجة أحسن لأن الواحد طالما ما عملش حاجة غلط ربنا مش هيعين له الا الخير ومش هيوقف ليه الا ولاد الحلال ان شاء الله ، طبعا حزني الكبير في ألفين وسبعة علي مرور عام والذكرى السنوية لوفاة والدي رحمه الله في 18-2-2007 الله أسأل له الجنه وأن يبدله دارا خيرا من داره وأهلا خيرا من أهله وولدا خيرا مني أنا فأنا ابنه الوحيد كما أحزنني كثيرا وفاة استاذي الكريم الاستاذ محمد عبد النور سلامة استاذ الفيزياء الأب والأخ الكريم رحمه الله وأسكنه وجميع المسلمين واسع جناته ، كما خنقني أحزنني كثيرا سرقة الموبايل بتاعي وبلاش أحكي عشان بتخنق من الموال ده بالذات كل ما افتكره ، ومن الأمور التي كرهتها جدا في ألفين وسبعة خسراني لواحد كنت باعتبره من أعز الاصدقاء للأسف أصبح بالنسبه لي شخص عادي لأنه اتهمني بأشياء لاتجوز أن تحدث بيننا فأنا أعامله عادي ولكن قل في نظري وضاع حبي له فلم يعد أكثر من زميل وبلاش أتكلم في أحزان أكتر من كده لأن مش جو أحزان ده. ومع نسمات العام الجديد اللي خلاص فاضله تقريبا ساعة أسوق لكم بعض أمنيات العام الجديد أتمني من الله أن يديم علي وعلي أسرتي الصحة والسعادة وأن يسعد أخواتي مع أزواجهن وأن يديم عليهم السكينة والسعادة والحب طوال العمر وربنا يخلي البت حنين بنت أختي ويخليني كده لحد ما أشوفها عروسة زي القمر وربنا يرزق أختي الدكتورة دينا بالزرية الصالحة يارب ويبارك لأخواتي في أزواجهن أما أمنياتي لنفسي أتمني اني في ألفين وتمانيه أخلص من سنه خامسة طب بسلام وبتقدير كويس يارب وأمنياتي لروح أبي الطاهرة بالنعيم الدائم في دار البقاء وفي مقعد صدق عند مليك مقتدر وأمنياتي لنفسي تااااني بالاستقرار وان يكرمني ربي علي قد نيتي وتمنياتي للجميع بعام سعيد مشرق وحياة ملؤها الصحة والسعادة وهابي نيو يير الفين وتمانية ويلا بااااااي ألفين وسبعة
دمتم بسلام
د. محـــمد الجــــــوهــــــــــــري
ملك ميت غمر والسودان والكونغو الدكتاتورية وزيمبابوي وقريبا أنجولا.

احساس فريد

تيـــجــي نتـكــلـم *** ولا بـلـغـة الحـب نـعـلـم
يـلا نــقــول حبـي وحبـك *** شيء مش معقول
فاكره أول مره قابلتك *** في الكلية كانت عادي
بعديها قابلتك تاني *** وتالت برضو عادي
لكن المرة الرابعة لما قابلتك *** فاكرة بالذات المرادي؟
كانت صدفة *** حسيت اني عايز اتكلم
عايز أقولك لما شفتك *** قلبي رفع الراية واستسلم
قربت وجيت اتكلم *** اقول ايه رحت مبلم
وشي احمر وقلبي *** راح علي قلبك سلم
قولت أقولك اي حاجة *** فقلت عايزين نبقا نشوفك
وكانت منك أجمل ضحكة *** شفت فيها سحر عيونك
حسيت اني بجد بحبك *** ومش ممكن اعيش بدونك
بعديها كانت أول مرة *** أقابلك فيها لوحدينا
فاكرة الشجرة *** ولا الطلبة من حوالينا
كان الجو صحيح بارد *** بس معاكي كان دافي
فاكرة بجد ولا نسيتي *** احساسي ليكي والله خرافي
فاكرة لما مسكت ايديكي *** حسيت اني بدوب في عنيكي
قررت ساعتها اني هحارب *** كل الدنيا بس ارضيكي
دعيت من قلبي ربنا *** يخليني ليكي ويخليكي

عيد أضحي مبارك

قبل أي شيء أعتذر عن غيابي الطويل عن مدونتي وحبايبي زوار المدونة

كـــــل عــــــام وكل المسلمين بخير وصحه وعافية يارب ولكل موتانا الرحمة والغفران يا رحمن

وبالمناسبة دي اهيكم شوية كاريكاتيرات يارب تعجبكم



وكل عام وانتم بخير وعيد سعيد للجميع
دمــتم ســالــمين

وداع يا دنيا الهنا

سمعت النهارده عبد الحليم في أغنية في يوم في شهر في سنة بيقول وداع يا دنيا الهنا وداع يـاحــب يا أحلام وكمان بيقول كل الجراح بتنام وعمر جرحي أنا أطول من الأيام بجد حسيت الكلام أول مره أسمع الأغنية دي وأحسها كده مع انها من أجمل خمس أغاني بحبهم اللي هما أنا بعشق البحر نجاة الصغيرة أنا لك علي طول وفي يوم في شهر في سنه وأحضان الحبايب عبد الحليم ومتخافيش عمرو دياب . أنا كل اللي مستغرب ليه ازاي في واحد كان حاسس الأحساس ده لأني ما اتخيلش انه ممكن يكتب الكلام ده أو حتي عبد الحليم يغنيه بالحرارة دي الا لو كان حاسه بس أفاجأ ان معظم أغاني عبد الحليم بالأحاسيس دي ومش معقول عبد الحليم قبل ما يغني كان بيحصله كل المواقف دي . يبقى ده دليل علي ان عبد الحليم فنان فوق الفز فنان عملاق بجد .... أدعو للجميع بالتوفيق في حياتهم

دمتم بسلام

د. مـحـمـــد الجـــــوهـــــري

من حفر حفرة لأخية ... اندلق فيه

السلام عليكم ورحمة الله وبركاتة
قراء مدونتي الكرام مرحبا بكم من جديد ، اليوم أحكي لكم موقفا حدث وأنا عائد من الكلية اليوم وأثر في كثيرا وبدون اطالة في الحديث نخش في الموضوع ، كنت أركب الأتوبيس اليوم فكنت جالسا في منتصفة تقريبا بعد عناء يوم كامل في الكلية ومجهود كبير فما كنتش قادر اتكلم حتي فبعد أن جلست وجدت شوية شباب كده من سفهاء القوم صوتهم مرتفع ويصدروا أصوات وأسلوبهم في الكلام غبي لدرجة تغيظ وطبيعي أن أتحمل لأن مش ناقصه دوشه علي آخر اليوم لأجد واحد منهم جالس في نهاية الاتوبيس تماما بيقول: شوفلنا حته طرية يا أسطي طبعا يقصد بنت تقعد جنبة كل الأتوبيس بص ليه وعيونهم ترمقه النظرات قائلة يا سافل يا وضيع وهو بكل لا مبالاه يضحك واذا بـ حته دين مزززه ههههه قصدي بنت حلوه جدا تدخل الأتوبيس لابسه بتاع أصفر كده أنا والله مش هاوي بص علي لبس البنات بس كانت صاروخ ده اللي فاكره دخلت والواد ملحقش يخلص الكلمة فوجئت بالبنت تدخل لآخخر الاتوبيس لأن ما فيش الا مكان واحد جنب الواد ده فاذا بها تجلس بجواره قام أخينا ادي ميسد لصاحبه اللي قاعد في الكرسي اللي قصادي في نص الأتوبيس أخينا فهم انه بيقوله تعالي عشان نزنقها جنبنا قام أخينا اللي قاعد قصادي لقي راجل عجوز واقف عمل عم الشهم وقاله تعالي اقعد يا حاج وانا هقف انا واللي لو مش صاحبه رن عليه ولا كان هيعبره والراجل العجوز قاله لا يابني قاله لا والله يا حاج المهم الواد قام وراح يقعد جنب زميله اللي هو جنب البنت الحلوة والراجل هم بالجلوس ولكن الراجل عنده زكاء الفلاحين اللي بنسميه خبث الفلاحين قام الراجل قال للبنت الحلوة تعالي يا بنتي اقعدي مكاني وانا مكانك والراجل كان تخين شويه البنت ما صدقت تهرب قامت راحت وقعدت مكان الراجل الكبير والراجل راح يقعد طبعا اضطروا يقعدوة وهم يغلون من الغيظ أنا بصيت للواد البرم ده اللي عامل نفسه شهم لقيته بيقولي دا زانقنا زنقة ههههههههه قولتله من حفر حفرة لأخيه... قالي اندلق فيه هههههه الراجل العجوز وهو نازل بصلي وقالي ايه رأيك قولتله والله انتا باشا قام الراجل نازل وهو مبسوط ههههههههه والله انا فضلت اضحك لحد ما روحت

أتمني يكون البوست عجبكم
وفعلا من حفر حفرة لأخيه
وقع فيه
تحياتي ودمتم في سلام الله وأمنه

د. محمد الجوهري
ملك ميت غمر والسودان والكونغو الدكتاتورية وزيمبابوي وجزر القمر

همـســات لــكـي وحــدك

الآن معي قـلـب ينبض ... بـرسـائل حــــب خرافـية

وأري عينيكي لها بريقا ... وجمــال دمـوع صورية

تدعـوني لأمـل يجذبني ... وليــالـي حــــب قـمـريـة

أخيالي الناطق يصدقني ... أم أني أعيش رومانسية

لحـنانك دومـا يشعـرني ... بمشـاعـر حــب ذهـبـيـة

وبدونك اعـيش بلا أمـل ... وحـياتي بدونك رمـاديـة

وخـتامـا لـكي دوما مني ... مــن قـلـبي أغـلى تحيـة

لـك أنـتــــي لا لـغـيـرك ... يــا أحلى وأجمل حـورية

أنواع الأصدقاء ..اعرف صاحبك وعلم عليه

السلام عليكم ورحمة الله وبركاته ، قراء مدونتي الكرام مرحبا بكم من جديد ، أتناول اليوم موضوعا جديدا فريدا من نوعه على الأحرى بالنسبة لي فأنا لم أتناول هذا الموضوع من قبل ولم أكتب عنه قبل ذلك . موضوع اليوم " أنواع الأصحاب" وقد تكون هذا الموضوع في رأسي من علاقاتي وأصحابي وأصدقائي وزملائي في الجامعة .والان مع الموضوع ينقسم الاصحاب الى أربعة أقسام كالآتي

أولا صاحب راجل وجدع ثانيا صاحب راجل ومش جدع

ثالثا صاحب جدع ومش راجل رابعا صاحب-للأسف-مش راجل ومش جدع

مش فاهمين ياعم الحاج ....طيب طيب هشرح اهوه

النوع الاول : الصاحب الراجل والجدع

ده الأفضل والأثير

وده بقا راجل عشان بيقف معاك وقفة رجاله لما تقصده في أي خدمة مينفضش ولا يستندل معاك ويقولك أصلي ..مش عارف ايه...الله يخربيت اصلي دي بكرهها جدا

وجدع عشان ما يستحملش حد يقول عليك نص كلمة وانتا مش موجود وكمان يقف معاك لو حس ان في حد بيضايقك وما يسمحش لأي حد يتكلم في خصوصياتك بتاتا عشان كده جدع

النوع الثاني : صاحب راجل ومش جدع

راجل زي ما قولنا في النوع الأول عشان بيقف معاك وقفة رجاله لما تقصده في أي خدمة مينفضش ولا يستندل معاك

ومش جدع لأنه معاهم معاهم عليهم عليهم يعني لما يكون معاك يبقي حبيبك وتحس انه أجدع صاحب في الدنيا ولما يكون مش معاك يوصلك وتتأكد انه قال عليك كلام مش كويس أو شوه صورتك أو تدخل في خصوصياتك يعني مثلا لو بتحب واحده ممكن يقول لأصحابك عليها كلام مش كويس ويكون مش حقيقة يعني من الآخر استندل معاك يا معلم

النوع الثالث : صاحب جدع ومش راجل

وده بقا جدع عشان زي ما قولنا في النوع الأول عشان ما يستحملش حد يقول عليك نص كلمة وانتا مش موجود وكمان يقف معاك لو حس ان في حد بيضايقك وما يسمحش لأي حد يتكلم في خصوصياتك بتاتا وغالبا بيعمل كده لأنه بيحس ان ده حرام نازع ديني يعني

و مش راجل ليه بقا... لأنك لو قصدته في أي خدمة يقولك أصلي.. رايح مشوار .. مش فاضي ..أي فابريكاشن.. وماشي بمباديء زي الطين في حياته مثلا السلف تلف والرد خسارة ومثلا عيش ندل تموت مستور وبأسلوب الدمايطه الوحشين وبكرر الوحشين بس اللي هو تشرب شاي ولا مانتاش كييف ..تتعشي ولا تنام خفيف.. تبات معانا ولا تبات علي الرصيف دي المباديء بتاعته في الحياة طبعا زي الزفت

النوع الرابع : للأسف صاحب بس مش راجل ومش جدع

ده الاسوء والحقير

وده بقا مش راجل عشان نفس الأسباب بتاع النوع الثالث وفوقيهم تلاقيه تلم وسدغ وغير حافظ للجميل يعني لو قصدته في خدمه يقولك وش مش فاضيلك

و مش جدع عشان نفس أسباب النوع الثاني وتضيف فوقيهم ان الخيانة والنداله في دمه مش بيتصنعها او بيفرض عليه الموقف كده

بالطبع الأخير أوحش واحد فيهم وأسوء من واحد مش صاحبك وبيكرهك يعني هو المقصود في..عدو عاقل خير من صديق جاهل .. هو ده الصديق الجاهل
أتمنى يكون البوست عجبكم ويارب نشوف كومينتات زي اللوز

بس ملحوظة علي السريع حقوق اللطش محفوظة ليا أنا طبعا وأي حد عايز يلطش أي حاجة ما يستأذنش بس يبقا يصيتني كده ويقول ان ده من عندي لان اللطش علي الجاهز حرام دا خلاصة اربع سنين في كلية طب الزجازيج يعني شفت فيهم الويل

تحياتي ودمتم سالمين

د. محمد الجوهري

ملك ميت غمر والسودان والكونغو الدكتاتورية وزيمبابوي

ياما في الدولاب مظاليم

صباح الخير أو مساء الخير جميعا. ازي الحال؟؟؟ أتمني تكونو كلكم بخير. موضوع النهارده نكته جامده سمعتها من واحد صاحبي ضحكتني بجد في زمن صارت فيه البسمة صعبة ، والان مع النكته : واحده ست بيتها جنب شريط القطر اتصلت بنجار علشان باب الدولاب كل ما القطر يعدي بيتفتح فالنجار جه وصلح الباب وقالها كلو تمام قالتله لا لايمكن تمشي قبل ما أتأكد ان الدولاب اتصلح قالها طيب أنا أعمل ايه دلوقتي عشان تتأكدي ؟؟ قالتله: لسه علي القطر 5 دقايق ادخل جوا الدولاب استني لما القطر يعدي شوف الباب هيتفتح ولا لا وفعلا النجار دخل دقيقتين جوزها جه من بره دخل عليها بيقولها جزمة مين اللي بره علي المشاية وفتح الدولاب لقي اخينا جوه اخينا النجار طلع وقاله أظن لو حلفتلك 100 يمين اني مستني القطر مش هتصدق

ههههههههههههههههه يارب تكون النكته عجبتكم مستني الكومينتات ودمتم بسلاااااام

وداعــا الــي ان نــلــقــاك

أمــســـافــــر أنت ... أم ســتعــود مـــــن جــديــد

سـتـعـــود حقــــــا ... أم غائــب الــي يـوم الوعيد

أيـهــذا الــزمــــان ... أعــيـدني للمــاضــي البعيد

أرجـعني لعطف أب ... وارحــم قلــبــي الشــريـــد

*******أبـــــــــــــــــــــــــي******

الـــى مـــن تتركـنـا ... لـــــدنـــيــــا حــــقــيـــرة

ألا عــــــــــد وراع ... أخـــــتـــــي الصـــــغيــرة

رحـلــــــت عــنــها ... لــــتـتـركــهـــا يــتــيــمـة

أرى الحـزن كل يوم ... والدموع في عينيها كثيرة

*******أبـــــــــــــــــــــــــي******

لا أنـقـــم مــن زمـان ... حــقــــــــــا غــــــــدار

بـــل أدعـــــو لك الله ... أن تنال منزلــة الأخيـار

وأن يسكنك الفردوس ... ذات الاستبرق والأنهار

حنين بنت اختي ربنا يخليها لباباها وماماتها

عيل صغير بس دمه زي العسل

عيل قريبنا كده

قالي : عمو

قولتله : نعم يا حبيبي

قاللي : ممكن اقولك نكته ؟؟؟

قولتله : قول

قاللي : مره شوية فران بيلعبوا كورة مع شويه افيال ، الفران خطفوا الكورة من الافيال ، فالفار كابتن الفريق اخد الكورة وبيجري عشان يجيب جووون راح الفيل مكعبله ففي فار راح للفيل وبيقوله ياكابتن بطل الخشونة دي الفيل رد بكل ثقه ما بعرفش العب الا كده راح الفار باصص لزميله كابتن الفريق وقايله : كسره يا فوزي ههههههههههه

قام فوزي لم باقي الفريق وطالع علي ظهر الفيل قام الفيل هز ظهره وقع كل الفران اللي علي ظهره ما فضلش الا فوزي (الكابتن) اتشعبط في شعرة علي قفا الفيل ، باقي الفران شافوه فوق قامو قالوله يلا يا فوزي اخنقه يا فوزي ههههههههههههههه

حلو خيال الأولاد الصغيرين ده

بجد النكته ضحكتني

لو ضحكتم زيي زقلوني بالكومينتات

دمتم سالمين

مبروووك يا حبيب قلبي لولولولولييييي

واحد صاحبنا ندل كده ضايفينه من ضمن الناس اللي في مدونات حبايبنا خطب أينعم هو مش رسمي لأن القاعات زحمة اليومين دولا فهو خاطب بس الرسمي بعد شهر كده ان شاء الله المشكله ايه؟؟؟ ان أنا بحبه جدا ولو تخيلت نفسي أنا اللي بخطب -دا مثلا يعني مثلا مثلا هاااه أحسن حد يفتكر اني اغتنيت ولا حاجة-كان هو من أوائل المعزومين من ميت غمر ان لم يكن أولهم . اللي حصل بقااا انه نسيني خالص وما افتكرنيش الا لما قابلني في الجامعة قام عازمني . طبعا من كلامي تفتكروا اني زعلان لا طبعا لأن محدش يزعل من أخوه وبعدين برضو الراجل كتر خيره عزمني برضو يعني مش قابلني ونفض . المهم قاللي الموضوع علي مدونتي كنت مفكره بيهزر دخلت لقيت الكلام بجد ولقيته ودع حياة العزوبية - عقباااااااالي ياااارب - ههههههههه ربنا يعلم اني فرحتله جدا جدا لأنه فعلا عزيز عليا . الأخ المذكور هو أدهم بيه الشهابي أخو ابراهيم بك الشهابي و مراد باشا الشهابي . بما ان أدهم هو اللي عرفني سكة المدونات وده أنا قولته في أول بوست وبما انه أول واحد حطلي كومينت لذلك كان لازم أردله الصاع صاعين وأعمله زيطه وزمبليطه بالمناسبة السعيده دي لذلك عملت هذا الموضوع

يلا نهيص بقا ونرقص ونغني لأدهم بيه

العنب العنب العنب بني وطعمه خطير البلح احمر ومن السباطه هو ايه ؟؟ البلح

وهكذا

ولا اقولكم متيجي نتحنطر

أركب الحنطور واتحنطر درجن درجن وأركب الاتوبيس واتأبوس

تتأبوس ايه يا عم الحاج متغني حلو

حاضر حاضر

النهارده فرح أدهم ياجدعان عايز كله يبقي تمام ومافيش خمره ولا نسوااان

ههههههههههههههههههههههههههههههه
لولولولولي

من قلبي فرحانلك يا أدهوووم يا حبيب قلبي

وعقبالنا أنا وابراهيم وأي حد يريد ان يكون بعلا بالعين
ملحوظه فلحوسة : باركوا لأدهم بقا في الموضوع ده

http://adhamblog.blogspot.com/2007/10/blog-post_21.html

يلا بقااااا باركوله وادعوله

بارك الله لكما وبارك عليكما وجمع بينكما في خير

دعـــــوة لتـبـــادل الأفكــــــــار

السلام عليكم ورحمة الله وبركاته

قراء مدونتي الكرام مرحبا بكم من جديد وكل عام وانتم بخير بمناسبة عيد الفطر المبارك والله أسأل أن يعيده عليكم بالخير واليمن والبركات.والان مع موضوع اليوم

قرأت كتابا منذ فترة بعنوان دعوة لتبادل الأفكار فوجدت فيه هذه الكلمات التي أعجبتني فنقلتها لكم عسى أن تنال اعجابكم

معك تفاحة ومعي تفاحة ...لو أعطيتني تفاحتك وأعطيتك تفاحتي .. فكم يكون مع كل منا ؟؟؟

طبعا واحد رخم هيرد مقاطعا ايه الذكاء ده وواحد ارخم هيقول طب وليه نبدل كمل يا عم الأمور للآخر

لديك فكرة ولدي فكرة ... لو أعطيتني فكرتك وأعطيتك فكرتي .. فكم يكون مع كل منا ؟؟؟

سيكون مع كل منا فكرتان وليس فكرة واحدة .. اذا هي دعوة لتبادل الافكار ، دعوة للحاق بركب الحضارة ، ودعوة للعودة للتعاون والبناء

بـــس خــلاص

تحياتي واتمني البوست يعجبكم

أخوكم

محمد الجوهري

منعوت دين أمــك!!!

مرحبا بكم من جديد ... وحشتوني جدا يا قراء مدونتي الكرام أشكر كل من أضـاع من وقته دقيقة ليكتب لــي تعليق لأنه يساعد بشكل كبير في تشجيعي من نـاحية ومن النـاحية الأخـرى يسعـدني كثيرا كثيرا. والان مع موضوع اليوم

موضوع اليوم خاطرة مازلت أتذكرها حتي الآن ومازلت متمسك بتفكيري فيها أنا حـــر بقااا في تفكيري بس قولت أحكيلكم عليها -لأني لما بحكيها لحد غالبا ما بيضحكوا- نظرا لحالة الزهـق والخنقة اللي بنمر بيها في كل نواحي الحياة الحياتية،السياسية،الاجتماعية،الثقافية،العلمية....الخ ... يوووه بطل لك-لك كلمة عامية معبرة معناها رغـــي كتير في الكــــلام قال رغي هي اللي مش عامية- كتير وخش في الموضوع ... حاضر يا بـاشــا موضوع اليوم حدث ونحن في المــرحلــة الابتدائية يااااه من زماااان قوي بس لسه فاكره في حصة اللغـة العربيـة حيث كانت المعلمة-المدرسة يعني أصل حــد يفهم غلط ولا حاجة - شرحت في حصة سابقة درس الصفة أو النعت والموصوف أو المنعوت كنت وقتها بكره لفظ النعت والمنعوت ولحد دلوقتي بكـــرهــهم بسبب الموقف ده نحكــي بقااا الناظر أفندي داخـل يختبر مستوي الطــلاب في الفصل حصـلنا الرعــــب يا مـعلم-الحمد لله طول عمـري من الأوائل ان لم أكــن الأول لحد الجـــامـعــة..بلاش أحكيلكم عــاللي بيحصلي في الجامعة- الناظر أفندي كتب الجملة دي على السبورة السمك الاصفر يوجد في البحر الأحمر وقام قايلي محمد أسامة قوم اعرب الجملة دي -اشمعزه أنا بالذات ماخابرش- قولتله حاضر يا حالناظر السمك مبتدأ مرفوع وعلامة الرفع الضمة ، الأصفر صفة مرفوعة وعلامة الرفع الضمة ، يوجد فعل مضارع مرفوع وعلامة الـــرفع الضمة ، الفــاعـل ضمير مستتر تقديره هـو عــائد علي السمك ، في البحر جــار ومجرور وعلامة الجر الكسرة ، الأحمر صفة مجرورة وعلامة الجر الكسرة والجملة الفعلية في محل رفع خبر المبتدأ الأول. لقيت الناظرأفندي قـــاللي ايــه صفه دي اللي انتا بتقولها؟؟ اسـمـه نعت مش عارف بقا كان بيتلكك ولا ايه قولتله ما هما الاتنين واحد حضرتك قاللي لا نعت قولتله لأ صـفـة قـاللي نـعت قولتله صفة قاللي نعت انت هتعـرف أكتر مني؟؟ قولتله يا حالناظر الكتاب أهووووه الدرس اسمه الصفة والموصوف قاللي بس هو اسمه النعت. وأنا صغير كنت عفريت بخاصة من بعد ما جيت من ليبيا كما ذكرت آنفا واحتكيت بالمصريين العفاريت فالناظر أفندي كل شــــوية يقـــوللي هي نـعـت وأنــا أقـــوله لأ صفة قفشت عــليه قمت قــايلــه منعوت دين أمك الدرس اسمه الصفة والموصوف وانت تقولي نعت طب هي صفة بس. قام قايلي تعالى هنا قمت قايم من الديسك وعينك ماتشوف الا النور طيرااان ويا فكيك علي مـامـا كانت مدرسة بالمدرسة روحتلها بجري وحكيت لها علي الموضوع كله ...طبعا من غير منعوت دين أمك اللي في الآخر دي قالتلي طب ايه المشكلة ؟؟ عملت أنــا عبده الـعـبيط اللي مش عــارف حاجة قولتلها ببراءة شديدة الناظر بيجري ورايا.قالتلي بيجري وراك عشان النعت والصفة؟؟ وازبهلت لحد ما الناظر أفندي وصل بزعابيبه وبيقولها لا ياأبله ابنك محمد ده قليل الأدب فقولتله ليه حضرتك؟؟-يخربيت الاحترام مــساء الاستعبـــاط يعني- قاللي ولـيـك عين تتكـلـم؟؟ استخبيت ورا مـامـا قالتله ليه يا حضرة الناظر؟؟ قالها الولــه بقوله اســمه نعت بيقولي صفة قالتله مـامـا طب ايه المشكلة عادي هو نعت أو صفة الاتنين يمشوا قالها مــاشي قولتله لأ مش مــاشي هو صفة مش نعت والدرس اسمه الصفه والموصوف بصلي بغل كده قمت راجع مستخبي ورا مـامـا تاني قام قايلها مش دي المشكلة قالتله أمال ايه المشـكلـة؟؟ قالها المشـكلة انه شتمني في الـفصل وسب لــي الدين قدام الطلبة ، مـامـا قالتله سب لحضرتك الدين ؟؟ مش ممكن محمد عمره ما يعمل كده- تعجبني قوي ثقة ماما فيا اللي انعدمت بـعد خمـس ســت مواضيع من دول- قــام الناظر أفندي قــايلها أهــوه قـدامـك أهــوه اســأليه ، قولتله لا أنا وراهــا مش قدامها علي فكرة لقيته حصله ازبهلاااال فظيع ومش عارف يعمل ايه قولت اخده علي مشمه بدل ما ماما تعملي فيلم هندي وتقولي تشتم حضرة الناظر وبتاع قولتله يا حالناظــر نـعـت يـعني ايه؟؟ قالي يعني صفة ، قولتله حلو قوي طيب لما أقولك منعوت دين أمك يعني ايه؟؟ قالي يعني موصــوف دين أمـك قولتله لأ موصوف دين أمـــك انتا -عليا النعمة كنت جريء موووت- قـاللي يعني ايه يا فــالـح مش شـتيمة دي؟؟ قولتله بكل برود يا حالناظر يعني دين أم حضرتك مــوصوف لــكل الـبشر لأن الكـون بالفطره مسلم- كنت سامعها في خطبة للشيخ الشـعـراوي رحمــه الله أن الأرض والــكون والبشر كله مسلم أي أن الانسان يولد بالفطرة مسلم لأب وأم مسلمين فيظل مسلم أو لأب وأم مسيحيين أو يهود فينصرانه أو يهودانه ما علينا مش هكمل باقي الخطبة - قاللي اجــري يــااااض وانت النهارده مش هتكمل باقي الحصص عقابا ليك قولت في نفسي بــركه يا جــامــع وقمت قايل لماما هاتي المفتاح أخدت المفتاح وهميت بالمشي ثم رجعت كــأني نسيت حــاجـــة وقــــلت للناظر أفندي حالناظر قــاللي عـــايز ايــه تـــااانـــي؟؟ قولتله منعوت دين أمك وقــمـــت طـــــالــــع جري ههههههههه

أرجو يكون البوست عجبكم عارف ان في انتقادات دينية بس رجاء تلاحظوا اني كنت عيل صغير- مش فاهم حاجة يعني- هههههه

تحياتي ودمتم سالمين

أخوكم

محــمد الجـــوهري

ملك ميت غمر والسودان والكونغو الدكتاتورية وزيمبابوي

آسف لن أنساكي!!!

نــعــم لــم تقـــولــيـهــا ... ولـــكـــني بـها أحـســسـت

نــعــم لــم تنـطـقــيـهــا ... ولـــكـــني لــهـا سـمـــعــت

انســـاني ...كلمـة سهلة ... تـظـنـيـن أنـي بـهـا ارتحـت
تريدينني أن أنساكي؟؟
تــريــديــن أن أنــسـى ... مــــن تـكـون لـــــي روحـــا

تــريــديــن أن أنــسـى ... مــــن تـكـون لـعـيني بـصرا

تــريــديــن أن أنــسـى ... مــــن تـكـون لـعقـلي فـكــرا

تــريــديــن أن أنــسـى ... مــــن تـكـون لـقلبـي نبـضـا
كيف أنساكي؟؟
كيـف أنسى مـن تكـون ... حــــلـــمــــــي الــكــبـيــــــر

كيف أنسى مـن هـــزت ... قــلـــبــــــي الــصـغـيــــــــر

أينـسى نـــور الشـمـس ... من رأى بـعد أن كـان ضرير

أينـسى طــعــم الســكـر ... من كـــان ذا حــلـق مــريــر
كلا لن أنساكي

نــعـــم لــن أنـســاكــــي ... فـلـن أحـب مخلوق سواكـي

نــعـــم لــن أنـســاكــــي ... أقــســـم بالـــذي ســواكـــي

نــعـــم لــن أنـســاكــــي ... وان عـشــت عـلي ذكـراكـي
آسف لن أنساكي

لا تتركيني

أيا مـن شغل عقلي بالتفكير فيك
أيا من نبض قلبـــي يحيــيـك
لا تـقـــلــــقــي لســـت أنـــــــــــــــــــا
ممن يعرفك ثم يصير ناسيك

مـــن أنـتــــي ؟؟

أأنـــت نــجـــــــــــــم بــــــــــــــــــارق
أضــــــاء ظــلمـــة حــيــاتــــي
أم أنــــت قــــــــــــــــــمـــــــــــــــــــــــر
ســـطــع لـيـبــدد ظـــلمـــاتــــي

مـــن انـتـــي ؟؟

أأنـــت مــــــــــــــلاك رحـــــمــــــــة
جـــــــــاء يقــــــــــوي يـقـيـنـي
أم أنــت حـــبـيـب وجـــــــــدنــــــــي
حــزيــنا فـجـــــاء يـــواســـيني

بـالله عـلـيـك أخـبـريـنـي

مــــــاذا أكــــون فــي حـــيــاتــــــك
صديقا أم حبيبا ردي وداويني
ارفعي عني حزني ضميني قويني
والا فارحـلي عـنـي واتـركـيـني

أتــتــركــيـنـي ؟؟

لأعــــــود للــيــأس مــن جــــديـــــد
أتــتــركـــي قــلــبــي الـــشــريــد
أتـتـركـــــي قـــلـبــا عـنـدمــــا رآك
كـــــان عــنــده يــــــوم عــــيــــد

لا تـتـركـيـنــي

لا تـــرحــلـــي عــنــي وتـقــــولـي
ســيــنــســــانــي ويــسـتـريــــح
كـــــــــــــيــــــــف أنــــــــــســـــــــــي
مـن داوت قــلــبــي الـجــريـح
لا تــتــركــــي خـــيـــوط حـــــــب
نسجناها سويا في مهب الريح

لا تـتـركـيـنــي

وأنا في ليبيا

سلامو عليكم ازيكم يا شباب؟؟ وحشتوني جدا والله العظيم 3 . النهارده بقا هتكلم عن بعض الذكريات الخاصة بي ونحن في ليبيا أو الجماهيرية العربية الليبية الشعبية الاشتراكية-الفول والطعمية- العظمي(والله اسمها كده بس للأمانة بدون فول وطعمية انا حطيتهم علي القافية) حيث كان أبي رحمه الله مسافرا هناك فأخذنا معه عامين .والسنتين دولا الواحد عمره ما ينساهم ليه؟؟ لأنهم في فترة الصبا الفترة الجميلة جدا اللي الواحد بيعمل فيها كل اللي هو عايزه بدون ما يفكر في أي حاجه أو بدون موانع . المهم كنت في بلد صغيرة كده فاكر كل حاجة فيها لحد دلوقتي اسمها بلدية الشرارة كانت تابعة لفرع أو مركز اسمه أوباري -هو اسمه كده- واللي تابع لبلد أو محافظه الله أعلم اسمها سبها-لا محدش كان ماسكها دي هيا اسمها كده- سبها دي كان كل أهلها سود البشرة لدرجة ان المصريين مسمينها سبها السودة المهم وأنا صغير كنت أبيض خالص فكنت بالنسبة للبنات المفاعيص الليبيات هناك واد عسل كده والله العظيم كنت أبقي مروح اللي تشيلي الشنطه واللي تمشي معايا واللي تعملي الواجب وكده فكان فيهم بنت كده سوده مش فاكر شكلها بس فاكر انها اسمها لمياء كانت من البنات الكتير اللي بيمشوا مع الواد الأبيض المصري ده فكان تقريبا الواد لمين-هو اسمه كده(واد ليبي اسود خالص ماتشوفش في وشه كله الا أسنانه بيضااااااا تقول انا مش شايف غير صفين لولي) - كان بيحب البت لمياء دي الله يحرقهم بجاز الاتنين ماعلينا كان الاخ يشوفها ماشية معايا يتجنن لما اجي تاني يوم يلم كل العيال الليبيين السود دول وينزلو علي الواد المصري ضرب .... بس ضرب عيال يعني .. وانا صغير كنت غلبان قوي ماكانش ليا بقا في الخناق ولا الدفاع عن النفس حتي كنت بقعد أقولهم الله يسامحكم ولا أي حاجة... ولاااا كانو بيسيبوني لحد ما صاحبت واد سوري أبيض زيي اسمه طه قاللي انت سايبهم يضربوك ليه؟ قولتله أعمل ايه أنا مصري هما ليبيين احنا في ليبيا ما أقدرش أعمل حاجة قاللي ما أنا سوري وابيض زيك ما بيضربونيش ليه قولتله ليه؟؟ قاللي لأن لمين ده جه في أول يوم يعمل معايا زي ما بيعمل معاك ضربتو علي وشه بالكف فبكي فكل الليبيين عملولي حساب المهم قولتله لا يا عم أنا مبحبش أتخانق عشان حرام قاللي خلاص مالكش دعوة انتا أنا اللي هيكلمك هخرشمه -تطبيقا لاتفاقية الدفاع المشترك .. قصدي الدفاع السوري عن مصر- فجه الأخ لمين بعد المدرسة والبت لمياء بتوصلني للبيت وشايلالي الشنطة هي والبنات التانيين وعايز يتخانق معايا هو والليبيين فالأخ طه شافو قام لامم كل شلته وجالي بالنجدة مسكو العيال الليبيين ضحضحوهم ومن يومها الواد لمين لما كان يقابلني كان يخاف يبصلي أحسن طه يشوفو من يومها وأنا بحب سوريا هههههههههه لما رجعت مصر واحتكيت بأولاد الشعب الأصيل اتعلمت النمرده والخناق لدرجة اني نفسي أشوف لمين ده عشان اقوله الله يسامحك بس بأسلوب تاني -أسلوب مصري صميم- برضو أفتكر واد ليبي كان صاحبي قوي اسمه سعيد كان طوووويل وكان أهبل كده ومدهول في نفسه كانت الأبله تقول سقفوا لسعيد لما يجاوب سؤال صح كان سعيد يسقف لنفسه ههههههه كان شكله بيبقي عسل كنت بحبه عشان كان واد غلبان كده ومالوش دعوه بحد . برضو من الحاجات اللي مش هنساها في ليبيا كان بابا الله يرحمه مدرس ثانوي في مدرسة اسمها شهداء الواجب هناك فكان بيدرس علوم أو بيولوجي-أحياء يعني- فكان هناك من ضمن مناهجهم التحنيط وكان في طرق كتيرة جدا أبسطها استخدام الملح او انك تحط حاجه زي الفراشة مثلا في كتاب وتسيبها المهم في يوم صحيت الصبح علي خبط الباب زي ما يكون البوليس المصري جي يقبض علي واحد فقمت لقيت بابا -الله يرحمه- فاتح الباب وحوالي 8 عيال جايبينلو صينية عليها بتاع 30 عقرب وبيقولو لبابا يا استاذنا عايزين نحنط دول لقيت بابا قلع الشبشب وقالهم يلا ياولاد الـ ... ههههههه موقف غريب العقارب في المنطقة دي كانت كتير جدا لأنها كانت منطقة صحراوية وكان في جبل علي بعد 250 متر من البيت العيال هناك العقارب عندهم زي مثلا الضفادع عندنا مبيخافوش منهم خالص مش فاهم ليه !!! يلا كانت أيام جميلة الله يرحمك يابابا أتمني البوست يعجبكم هو مش مضحك علي ما أعتقد بس
ان شاء الله البوستات الجاية أحلي
أستودعكم الله وكل عام وأنتم بخير ودمتم سالمين
د.محمد الجوهري
ملك ميت غمر والسودان والكونغو الدكتاتورية وزيمبابوي

الله يرحمك يا شيكو

عارفين يا جماعه انا بتكلم عن واحده والله العظيم لا اعرفها ولا عمري شفتها ولا حتي كلمتها ولا لي اي علاقه بيها هي باختصار شديد كل اللي اعرفه عنها انها عامله مدونه زي حالاتي كده .... تخيلو لما الواحد يكتب اخر كلام في المدونه بايده وبعدين يمووووت وانت تقرأ كلامه تخيل احساسك لما يكون كلامه مؤثر مش هطول عليكم
ده اللينك بتاع مدونتها شوفوه
http://shikoonline.blogspot.com/
وادعولها ولينا ولكل المسلمين بالرحمة
اللهم اغفر لها وارحمها واعف عنها و بارك في حسناتها وامح سيئاتها وتجاوز عنها واسكنها الفردوس الاعلي ولاتحرمها لذه النظر لوجهك الكريم واغفر لها ولموتانا وموتي المسلمين أجمعين أمين امين

أحــمــد عــــزرائــيــل

السلام والتحيه علي أصحاب الطلعه البهيه اللي بيقرو الصفحة ديا .... ازيكم كده يا جماعةعاملين ايه ؟؟؟ يووووه كنت هنسي رمضان علي الأبواب كل سنه وانتم طيبين ويارب يعيد عليكم الأيام بخير .أكلمكم بقا عن موضوع النهاردة اللي أضحكني كثيرا وأذكره لأبي -رحمه الله - حدث هذا الموضوع ونحن في الفرقة الأولي في كليتنا الجميلة قووووي حيث كان الواحد داخل مرحله جديدة زي اللوز وما بيصدق يتعرف علي واحد شخصيته حلوه ودمه خفيف الا ما بيتعرف عليه وهووووب يبقوا أصحاب وتليفونات وبتاع ، طبعا بما اني واحد في كلية فنفس الظروف حصلتلي واتعرفت علي شوية أصحاب مجانين بس عسل كان الأخ محور قصة النهارده واحد منهم الأخ اللي هتكلم عليه اسمه أحمد علي كان لعيب كوره جامد بس غشيم شويه يعني وهو بيلعب ممكن يوقع واحد علي ضرسه لسانه يتجزع ويجيلو شد عضل في ودانه ما علينا فكان لما يلعب كوره في أي ماتش لازم يكون في مصابين أساسي وأنا بما اني مبعرفش ألعب كوره أبدا فكنت بتفرج عليه وهو بيكسر رجول اللي بيلعب ضدهم المهم من هنا وبسبب زياده عدد القتلي حسيت ان أحمد مندوب عزرائيل -ملك الموت لمحدش يكون عارف ولا حاجه- فطلعت عليه اسم أحمد عزرائيل والاسم انتشر كالبرق في الكلية لدرجة ان المعيدين بقوا ينادوه كدا المهم في يوم رجعت من الكلية هلكان فنمت فالأخ أحمد مش فاكر حصل موقف ايه بعد ما مشيت ما شفتوش كان عايز يقولي عليه فاتصل عليا علي الموبايل كنت قافله ونايم قام متصل علي البيت رد عليه والدي -رحمه الله- ليحدث حوار كوميدي جدا .. فاصل ونواصل ..سنعود بعد قليل.. لو تشرب شاي العفريت تطنطط في البيت طنطيط لو تشرب شاي الصرصار هتبقي زي الحمار ..عـــدنـــا الحوار الذي حدث كالأتي
أحمد : ســــــــــــــــــــــــــــلام علـــيـكــــــــــــــــــم
بابا-الله يرحمه- : وعليكم السلام ورحمة الله وبركاته
أحمد : بيت محــــــــمـــــــــد الجــــــــــوهــــري ؟؟؟
بابا-الله يرحمه- : أيـــــــــوه يــا حـبـيـبـــــــــي
أحمد : طــيــب مـمـــكـــــــن أكـــــــلـــمـــــه ؟؟؟
بابا-الله يرحمه- : هــو نـــايــم ثــواني أصحيهولـك
أحمد مقاطعا: لا لا متصحيهوش هكلمه لما يصحي
بابا-الله يرحمه- : لا هصحيه أحسن لوسبته هينام للصبح
أحمد : خــــــلاص أوكـــــــــي يا عــــمــــــــــــــو
بابا-الله يرحمه- : طــيـــب أقـــــــــولـه ميــن؟
أحمد : قـــــــــولـــــه أحــــــــمــــــد
بابا-الله يرحمه- : أحمد مين؟؟ أصله عارف أحمدات كتير
أحمد : ااااا......... مش عــــــارف يقــــــولــه ايـه
بابا-الله يرحمه- : نعـم ؟؟!! مش سامع علي صوتك
أحمد : قــــــوله يا عمــــــــو أحــــمـــــد عــــزرائيل
بابا-الله يرحمه- : هـنــهــــــــرج !!؟؟
أحمد : لا والله يـــــا عـــمــــــــــــــو
بابا-الله يرحمه- : أمال ايه أحمد عزرائيل دي في حد اسمه أحمد عزرائيل؟؟؟
أحمد : لا دا اســـــم الشــــــهـــــرة بـتــاعــــــي
بابا-الله يرحمه- : شهرررره يا ساتر لا ألف سلامه .. ثواني هناديهولك
ترك أبي سماعة التليفون ومشي متمتما بكلمات عجيبة ..أحمد ... قال عزرائيل قال ولسه ياما هنشوف وجاء يصحيني قائلا انت يابني قولتله نعم يابابا سيبني أنام شوية هووووه -لا ده تثاؤب كده علي السريع- رد علي أبي قائلا يابني قوم كلم صاحبك في التليفون فقولتله صاحبي مين؟؟ فرد بقنبلة كوميدية قائلا أحمد يكفينا الشر هههههههه رحمك الله يا أبي وأدخلك فسيح جناته والله يحرقك بجاز ياد ياأحمد يابن الحاج علي الكواوي وختاما تقبلوا تحياتي وكل عام وأنتم بخير ورمضان كريم علينا وعليكم وعلي الأمه الاسلاميه يارب دمتم سالمين والسلام ختام
د.محمد الجوهري
ملك ميت غمر والسودان والكونغو الدكتاتوريه وزيمباوي

الي جنة الخلد أستاذنا الفاضل

ذهبت أمس الأول الي الزقازيق في زياره لبعض الاصدقاء وعدت الي المنزل بعد آذان المغرب لأجد خبر أحزنني كثيرا لقد قالت لي والدتي أن الأستاذ محمد عبد النور -مدرس الفيزياء اللي حكيت لكم عنه قبل كده- قد مات فصدمت لهذا الخبر كثيرا وحزنت كثيرا كثيرا . لقد كان الأستاذ محمد -رحمه الله- رمزا للاحترام وللذكاء فرحمك الله يا أبا عبد النور وأدخلك فسيح جناته وأسكنك الفردوس الأعلي مع النبيين والصديقين والشهداء والصالحين وحسن أولئك رفيقا . لقد مات رمز الفكاهه ورمز الاحترام فاللهم ارحمه واجزه عن كل حرف علمه لنا من الحسنات ما تثبت به فؤاده وما يدخله فسيح جناتك اللهم اجزه عنا خير الجزاء اللهم ارزق أهله الصبر والسلوان اللهم أسكنه الفردوس الأعلي اللهم لاتحرمه لذه النظر الي وجهك الكريم اللهم انه مات في شهر نبيك الكريم فاجمعه معه في جنات النعيم اللهم اسقه من يده شربه هنيئة لا يظمأ بعدها أبدا يا اكرم الأكرمين اللهم أسكنه دارا خيرا من داره وأهلا خيرا من أهله وولدا خيرا من ولده وارحم ضعفه وارزقه من الحور العين ما شاء أمين أمين أمين اللهم اغفر له ولموتانا ولموتي المسلمين أجمعين اللهم لاتفتنا بعده ولا تحرمنا أجره
وانا لله وانا اليه راجعون ان العين لتدمع وان القلب ليحزن واناعلي فراقك يا أبا عبد النور لمحزونون محزونون ولكن لا نقول الا ما يرضي ربنا انا لله وانا اليه راجعون ، أستحلفكم بالله كل من قرأ هذا الموضوع أن يقرأ الفاتحه علي روح هذا الأستاذ الفاضل والأب الكريم
وآخر دعوانا أن الحمد لله رب العالمين

أبـــويـــــا

مرحبا بكم من جديد النهارده هكلمكم عن موقف ظريف جدا حصلي وأنا بكلم زميل لي علي الايميل. في البداية عايز أسأل ليه محدش بيكتب ردود أو تعليقات علي موضوعاتي ياريت يا جماعه أشوف تعليقاتكم لانها بتشجعني و بعد الفاصل السابق نواصل... نرجع لموضوعنا بتاع الايميل صديقي اللي بكلمه اسمه د.خالد أمــين زارع (هو اسمه كده سبحان الله) ماعلينا هو في رابعه طب الأزهر فكنت بكلمه عن الامتحانات والنتيجه وكده فبقوله ربنا يستر وقعدت أدعي فلو تلاحظو الصوره هتلاقو الحوار اللي حصل أنا بدعي فوجئت بالأخ بيقولي أبـــويــا فبقوله أبوك!!! قالي آه فبقوله الله يرحمه-لانه مات يعني- وبعدين بقوله ماله أبوك ؟؟ بحسبه هيقولي مثلا حلمت بيه أو كده فوجئت بيه أطلق قنبله كوميديه قائلا: انت بتدعي أنا بقول أبويا فمفهمتش ايه اللي دخل ابوه في الكلام فوجئت به بيقول انت بتدعي وأنا بقول أبويا يعني أمـيـن -أبو الدكتور خالد الله يرحمه اسمه الحاج/ أمـين -هههههههه كم كان موقف مضحك أتمني يعجبكم وانتظروا المزيد دائما

مـحـمد الـجــوهــري

ملك ميت غمر والسودان والكونغو الدكتاتوريه وقريبا زيمبابوي

الدكتوره س معيدة التشريح

السلام والتحيه علي اصحاب الطلعه البهية اللي بيقرو الحته ديا..مرحبا من جديد معلش البوست ده جي متأخر شويه بس هنعمل ايه حكم القوي الامتحانات بقي والواحد يادوب لسه هيخلص بكره مش عارف ليه مأخرين رابعه طب الزجازيج في الامتحانات دونا عن باقي كليات المحروسة فمثلا جامعة الازهر مخلصين من شهر ونص وجامعة عين شمس من شهر واحنا لسه مش عارف ايه حبهم في انهم يركنونا في الصيف حيث الجو اللذيذ الذي يساعد علي التركيز والخالي من الحشرات التي لا تغيظ ما علينا اهو قدرنا ولازم نمشي فيه للأخر واما نشوف أخرتها... موضوع اليوم برضو عن قصة طريفه حدثت لي ونحن في الكليه الجميله اللي بحبها جدا بتاعتنا حيث كنا في الفرقه الثانية وفي قسم المدرعات قصدي التشريح وتحديدا في المشرحه حيث رائحه الورد -الفورمالين- اللذيذه المتناثره في كل مكان والتي تضفي علينا احساسا بالنشوه والسرور وتساعدنا علي التركيز وكله في اللذيذ المهم كانت الدكتورة س معيده بتشرحلنا كده مالكوش دعوه بيها دكتوره دمها زي العسل كانت بادئه برانش جديد في الطرف السفلي من الجسم او
lower limb
فالدكتوره س قالتلنا ايه ياجماعه ال لوار ليمب ده جميل ان شاء الله هتفهموه مني عارفين انا بحبه كله ما عدا حاجة واحده طبعا اخوكو ركز جدا في الحته دي وفاق من تأثير الصدمة الناتجه عن رائحة العطر اللذيذة وقولتلها هي ايه يا دكتوره؟؟؟؟ فقالتلي هي ال
fascia lata
بتاعه كده -طبقه تحت الجلد في الرجل- مش ده موضوعنا طبعا دكنت المعلومه وسكت اسبوع قعدت تشرح واحنا زي الكراسي اللي قاعدين عليها فقررت اني ابدأ مدرسه المشاغبين معاها عشان حسيت ان العيال زمايلي زهقوا فكان لازم اني اتصرف قلتلها يا دكتوره قالتلي نعم يا محمد قولتلها يادكتوره حضرتك قولتيلنا لما متفهموش حاجه وانتو بتذاكروا-اللي بيزاكرو بقا- قولولي وانا اشرحها قالتلي تمام قولتلها طيب يا دكتوره انا مش فاهم الفاشيا لاتا
fascia lata
بكل ذوق وأدب واستعباط قولتلها ممكن تشرحيهالي؟؟ بصتلي كده ومناخيرها اخضرت وودانها احمرت وقامت قايله يا جماعه انا طولت عليكم النهارده ان شاء الله السكشن الجي نكمل موضوع الدرس ففهمت انها عايزه تهرب قولتلها طب والفاشيا لاتا قالتلي المره الجايه فكرني قولت في نفسي خلاص هي الفاشيا لاتا الحل كل ما نزهق هقولها اشرحيهالي . كمان نسيت أقولكم حاجه كنت بقعد جنب صاحبي أبو لهب في السكشن الجاز ده عشان أبو لهب دمه خفيف وكان بيرطب الجو بدل ما الواحد مخه يعفن من الغباء اللي بيتشرح فكنا بنتكلم علي طول وهي بتشرح فالمهم الدكتوره س حوله في مره شافتنا واحنا بنتكلم فشاورت ناحيتنا وقالت انتا يا دكتور اتفضل اخرج بره فأبو لهب قالي الحق دي بتقولك اطلع بره فبصيتلها وهميت بالخروج وهخرج أهوه قامت قالتلي مش انتا قولتلها امال مين؟؟؟ شاورت عليا وقالتلي انتا قولتلها أنا قالتلي لا مش انتا قولتلها امال مين؟؟!! شاورت عليا تاني وقالتلي انتا يا دكتور فشديت شعري وقولتلها مانا خارج ايه المشكله قالتلي وانتا تخرج ليه ففكرت وبعدين ركزت وقولت دي حوله يبقي لما تكون بتشاور عليا يبقي بتشاور علي اللي جنبي فقولتلها يعني ده وشاورتلها علي اللي جنبي الناحيه التانيه قالتلي لا فمت علي نفسي من الضحك قولتلها امال مين شاورت عليا تاني وقالتلي انتا يا دكتور شاورتلها علي أبو لهب قالتلي بص اللي انتا بتشاور عليه انتا وهو بره قولتلها طيب وقمت واخده وخارجين. بعد كده تاني يوم ابولهب زهق من الشرح فقالي أنا عايز أخرج بس مش عايزها تشوفني قولتله بص لما تكون شايفها بتبصلك أخرج فعلا نفذ كلامي وخرج لما كانت بتبصله وما شافتهوش. أتمني يكون البوست عجبكم هو أي نعم مش مضحك شويه بس أهو ده اللي جه في دماغي منتظر تعليقاتكم ولا داعي للتصفيق والسلام ختام
د.محمد الجوهري
ملك ميت غمر والسودان والكونغو الدكتاتوريه وجاري احتلال زيمباوي

نصبر

مرحبا بكم من جديد.. اليوم سأكمل معكم بعض ذكرياتي كما قلنا في المواضيع السابقة لكنها كثيرة ومتنوعة ولايكفي لها تلك المدونة ولكن سأحاول أن أستعرض ما أستطيع من الذكريات والمواقف المضحكة فقط لأني عارف ان الحكاية مش ناقصه هم وغم وحكايات عن المشاكل والحاجات اللي تخنق فبقول نديها ترفـيـه...... واديها مــيـــه تديك طراوه ..... ماعلينا.. سأذكر لكم اليوم قصة طريفة حدثت ونحن في الصف الثالث الثانوي حيث كانت حصة الفيزيـــــاء وكان الأستاذ محمد عبدالنور ربنا يمسيه بالخير-اللي حكيت لكم عنه قبل كده في موضوع ثمين أي تخين- بيشرح برضو باب غلس في الفيزيــــاء وهو الفصل الثالث من الباب الثالث بتاع الحرارة علي ما أذكر كان بيشرح قانون شـــــارل بتاع الحرارة وتقريبا كانت التجربة اننا بنجيب غاز محبوس وبنعرضه لدرجة حرارة الماء المغلي 100درجة مئويه وبعدين نقيس حجم الغاز ثم نـنـــــتـــــــــظـــــــــــــــر قليلا وبعدين نعرضه لدرجه حرارة الثلج صفر درجة مئوية انا ده اللي تقريبا متذكره بس مش قضيتي صح ولا غلط التجربه الفكره ان الكلام ده كان في الموضوع اللي حصل . المهم الأخ هيثم شاهين اللي حكيت لكم عنه في موضوع أبورجل مسلوخة الأستاذ محمد بعد ما خلص الشرح سأله قائلا قولي بقي يا هيثم تجربة قانون شارل خلينا نفتكر كده قام هيثم ورد قائلا-مع ملاحظة ان هيثم كان في رده يتكلم باللغة العربية الفصحى وليس بالعامية- نحضر اناء به غاز محبوس ونضعه في درجه حرارة 100 درجة مئوية بامرار بخار الماء عليه أو وضعه في ماء مغلي ثم نقيس حجم الهواء ثم نـــــصــــبـــــر قليلا-بدلا من نـنـــــــتــظــــــــــر- فالأستاذ محمد ساب اللي في ايديه وبص لهيثم قائلا: نصبر..نصبر ايه ياخويا... نصبر حتي يأتي الفرج ... قال نصبر قال... هو احنا قاعدين علي مصطبه ولا بنعمل شاي هتقولي نصبر ناقص تقولي نستني شويه ههههههههه كان عسل الاستاذ محمد ربنا يخليه يارب ويديله الصحة. هذا ما حدث يومها أتمني أن يكون الموضوع عجبكم وعلي فكره انك تحضر الموضوع غير انه يتحكي لك يعني مش ممكن يوصلك زي ما حصل يعني لو انت ابتسمت وانت بتقرا الموضوع يبقي الموقف ساعتها كان يهلك من الضحك . ختاما أشكر الاهتمام وزيارة الصفحة لقراءة الموضوع مشكورين جميعا ومشكور كل من يعلق علي الموضوع ودمتم سالمين
أخوكم
محمد الجوهري
رابعة طب الزجازيج

أبو رجل مسلوخة

تم حذف الموضوع تجنبا لاي خلفات مع الاعتذار لكل من أحمد عبد العزيز و هيثم شاهين
تحياتي للجميع
أخوكم
محمد الجوهري
ملك ميت غمر والسودان والكونغو الدكتاتورية

ذكرياااااات .. عيشنا فيها

لكل منا ذكرياته الخاصة التي يتوق لها عقله وقلبه .. وبما انني واحد من البشر فلي ايضا ذكرياتي الجميله التي عندما اتذكرها اضحك احيانا.... ابكي احيانا.... احلم احيانا.... أحبط أحيانا .... سأتكلم اليوم عن بعض ذكرياتي الدراسيه وليس كلها لأن الموضوع يطول ويطول ولا يمكن شرحه في مدونه او مجموعة مدونات . المهم لأني اعلم ان وقتكم ثمين.. بمناسبة ثمين دي كان ياما كان واحنا في الثانوية -فترة لذيذة عدت- كان في استاذ فيزياء عسل جدا وبحبه جدا اسمه الاستاذ محمد عبد النور متعرفهوش انتو انا بقي عارفه المهم كان الاستاذ محمد من ألذ وأظرف الشخصيات اللي مرت في حياتي كان بيشرح لينا درس الكهرومغناطيسيه الباب الرزل اللي علي ما اعتقد الفصل الرابع من الباب الرابع المهم الموضوع كان رخم وعايز تركيز وهو بيشرح الواحد جاب بنزين -قصدي عرق- وبيحاول يفهم قام الاستاذ محمد ربنا يمسيه بالخير قال ايه ياولاد الموضوع ده مش محتاج وقت كتير في المذاكره فأنا استغربت فبقولو يا استاذ محمد ازاي دا صعب قالي انا عارف ان وقتك سمين-قصده ثمين- أي تخين أي فحل أي بغل هههههههه انتم مش متخيلين كان بيقولها ازاي انا كل ما افتكرها اموت من الضحك. في مواقف كتيره جدا للأستاذ محمد ربنا يسهل هبقي استعرض بعضها بعدين. برضو من الشخصيات الظريفه في الثانويه الاستاذ محمد الباز مدرس اللغة العربية برضو متعرفهوش انتم وانا اللي عارفه هههههه الاستاذ محمد الباز من حبايبنا برضو اللي ما نقدرش ننساهم . كان بيشرح درس أدب بتاع المدرسة الكلاسيكيه في الشعر فكان البارودي هو اللي وضع اساس هذه المدرسة في الشعر وقام أحمد شوقي بالتطوير والتحديث فيها المهم مش هشرحلكم بقي باقي المدرسة كان زميلي أسعد معانا في رابعة طب الزجازيج قاعد جنبي في الديسك الاستاذ محمد كان متعود وهو بيشرح يقوم واحد ويسأله زي نظام أكمل فقوم أسعد وقاله قام البارودي بوضع أساس المدرسه الكلاسيكيه وقام أحمد شوقي .... وعايزه يكمل طبعا الأخ أسعد كان سرحان لأن أنا وهو كنا بنتكلم فرد أسعد علي الأستاذ محمد بابتسامة عريضه بصب العماويد ههههههههه بصله الاستاذ محمد وقد اصابه الذهول من الاجابه وانا وقعت يومها علي الارض من كتر الضحك لدرجة اني والله فضلت عشر دقايق اضحك والاستاذ محمد يبصلي هو كان بيحبني وما كانش عايز يقولي اخرج بس هو عارف ان الموقف مضحك فعلا واحد حط الاساس والتاني صب العماويد ههههههههه والله اجابه منطقيه لواحد مش متابع ولا ايه رأيكم ياريت تردو علي الموضوع وأوعدكم باستكمال بعض الذكريات المضحكه في الثانوية او الكليه في المرات القامة تحياتي للجميع
د.محمد الجوهري
رابعة طب الزجازيج

لولولولوليـيـيـي بقه عندي مدونة

مرحبا بكم في المدونة الخاصة بي. كم أنا سعيد جدا بهذه المدونه أخيرا يمكنني ان أكتب أفكاري وخواطري وأن أري تعليقات الجميع بدون جو المنتديات المليء بالشغب وبالاشخاص الغير لائقين عموما حتي لا أطيل عليكم مرحبا بكم جميعا وانتظروا الجديد دائما. وفي النهايه أود أن أقدم شكرا لأخي وحبيبي أدهم الشهابي علي أنه أخبرني علي هذه المدونه . مشكورين جميعا
أخوكم
د. محمد الجوهري