٢٨/١٠/٢٠٠٩
أطلقوا سراح أ.د. أحمد جابر الحاج
كل ما فعله هو رفضه لما يحدث بالمسجد الأقصى أولى القبلتين وثالث الحرمين..
تم إعتقاله من أمام منزله وهو ذاهب لصلاة الفجر..
عايز أفهم يعني الراجل المفروض يمضي ويبصم انه موافق على كل انتهاكات اليهود للأقصى؟؟
المفروض انه ما يخرجش يصلي ف المسجد لأن في كلاب حراسه تبع أمن الدولة مستنيينه؟؟؟
إلى متى سيظل هذا الفساد يا حكومة فاشية.. يا حكومة متدنية ..
زمااااااااااان أيام ما كان في حكومة محترمة كان أستاذ الجامعة له سلطات وزير.. دلوقتي بيعتقلوه.. تخيلوا!!!!!
سأغلق مدونتى لحين الإفراج عن أستاذي.
أستاذي الذي من القلائل اللذين إحترمتهم وأحببتهم في الكلية..
أستاذي المدون وصاحب تلك المدونة..
ختاماً .. كلمة لك أستاذي
برغم الظلم والطغيان سيزول السجن والسجان
ستمر الأيام خلف القضبان
فاصبر واحتسب ..ولا تحسبن الله غافلا عما يعمل الظالمون.. وما ربك بظلام للعبيد.. وما كان ربك نسيا..
وأدعو الله أن يعيدك لأهلك وذويك وطلابك سالماً.
١٣/٠٨/٢٠٠٩
حوار مع شـــــــــاذ
٠٢/٠٧/٢٠٠٩
تاج من سول.. تأثيره .. أكتر من طبق فول
ما صدقت أخلص من تاج شادي .. اللي تعبني جامد.. ألاقي سول وسبر هانم صاحبة مدونة .o0O Voice Of Mine O0o باعتالي تاج من العيار الثقيل.. أشد وأتقل من تاج شادي ييجي 80 مرة .. لأ ومش بس كدا.. يعيني دبست شادي فيه برضووو.. قال ايييييييه علشان هو بعتلي التاج اللي هيا كانت بعتاهولي من زمان وأنا نسيت أجاوبه وشادي بعتهولي فاستلمته منه وهيا لأ .. فبقا ليها حق عرب .. وحلفت تلت أيمانات-جمع ايمان قصدي يمين هههههه-بالله العظيم تلاتة إنها تديني تاج أشد ضراوة من الأولاني لأ وكمااان شادي معايا.. علشان تضرب عصفورين بقالب طوب ههههههههههههه .. ماشي يا سول.. مصيرنا هيجيلنا تاج رخم وهنمررهولك ونمرر بيه حلقك هههههههه.. خلينا مع التاج..
من أنت؟؟
يا باب يا مقفول.. امتى الدخــــــول؟؟
صبرت كتير ياما.. واللي يصبر ينول
أخبّط يرجــــــــع صدي يقوللي مين؟؟
لو كنت أعـــــــرف مين أنا كنت أقول
وعجبي
نهار أبييييييييييييييض.. أنا محمد الجوهري.. ملك ميت غمر والسودان والكونغوالدكتاتورية وزيمبابوي وأنجولا وتنزانيا.. في حد ميعرفنيش ؟؟ لا لا لا.
وما الذي تفعله هنا؟
الهوا رماني ..هههههههههه.. جاي أتنيل أجاوب التاج بتاعك يا ست هانم.
اسرائيل تقصف كل جنوب بحثاً عنك، أي شمال ستقصد؟
أنا قاصد وجه كريم ههههههههه
إسرائيل بتبحث عني أنا !! ممممم يجوووز برضو هو أنا شوية فـ العالم!! بصي هجاوب عالسؤال بجد بقا
والله على حسب حالتي الإستراتيجية، يعني لو قادر أواجهها أكيد خير وسيلة للدفاع الهجوم.. فأكيد هقصد الشمال اللي هيا بتقصف منه وأديها على بوزها ولامؤاخذة.
لكن لو حالتي الإستراتيجية تعبانة أكيد هفلسع على أي شمال بعيد عن الضرب خاااالص ماااالص.
أنت مكلف بحذف حرف من حروف اللغة العربية، أيها ستختار ولماذا؟؟
ممممم حرف الظـــاد- الظــاء يعني(ظ) - ليه بقااا؟؟ علشان رخم وشكل الطـاء(ط) بس عليه نقطة. تقريباً كان في فرح وحد نقّـطه فبقا عليه نُقطة وهيردها هيردها ، لا وكمان بيتنطق نطق الزاي(ز) بس بنطلع لسانا فيه.. وبصراحة عيب نطلع لسانا لأن اللي بيطلع لسانه بيبقا.... إييييه؟؟ .... قليل الأدب هههههههههه.
نفس الكلام برضو على حرف الـثاء(ث) والذال (ذ) ههههههههه.
لو قُدِّر لك أن تدخل السجن، فما هي القضية التي تتمنى أن تدخل بها إليه؟
ربنا يحفظنا.. دانا بتخنق من القعدة في البيت أيام الامتحانات أقووووم أدخل سجن!!.. لا لا لا .. ربنا يحفظنا.. بس لو لاقدر الله حصل.. أكيد أتمنى أدخل في قضية دفاع عن الدين..أياً كان نوعها بقا.. دفاع عن الوطن.. عن الشرف.. عن الأهل.. عن رسالة الإسلام.. عن السخرية بالرسول الكريم.. وهكذا.
بالمناسبة، منذ متى اكتشفت نفسك؟
لما اكتشفت اني لسه مكتشفتهاش.. عالأقل إكتشفت جزء منها .. لكن كلها أعتقد صعب جدااااااا.
على مفترق طريق الإفتتان، اليمنى تقول"إلى حلمك" واليسرى تقول"إلى ما لم يحلم به البشر" أي الطرق ستسلك؟
مبدئياً أنا في حياتي الدنيا مش محتاج أكتر من حلمي.. لذلك سأختار الطريق الأيمن "إلى حلمى" ولكن "إلى مالم يحلم به البشر" ليس موجوداً سوى في الجنة.. فما المانع أن أسلك الطريق لحلمى في الدنيا وأن أسعى معه لأجد كوبري أو طريق ممكن به أن أصل للجنة "مالم يحلم به البشر" بعملي في الدنيا.. أكيد ذاك الطريق أو الكوبري موجود ولا مانع من اجتيازه.
نسأل الله الهداية والتوفيق.
نحن لا نعيش حياتنا، بل نتعلم فيها كيف نعيش!! ما تعليقك؟؟
والله أنا دايماً مؤمن بمبدأ.. إننا بنعيش ..علشان نتعلم.. نتعلم كل شيء.. بنتعلم إزاي نمشي!! .. إزاي نتعايش!! .. فعلاً بنتعلم إزاي نعيش.
بجملة واحدة فقط اكتب تعريفاً لكل كلمة من الكلمات الآتية:
الوطن
أحب الأماكن لقلب الإنسان.. والتى لو غاب عنها يشعر دوماً بالحنين لها.. يهفو حقاً لها قلبه.. ويتذكر ذكرياته ومعارفه وأصدقاؤه بها.
الأم
مصدر الحنان والدفء بالبيت.. والتي بدونها تكون الحياة صعبة وقاسية.. مصدر الفلاح في الدنيا(بدعواتها) وفي الآخرة(بإرضائها في الدنيا).
الليل
الستر، الهدوء ، الجمال ، السمر ، والرومانسية ولكن من الممكن أن يعبر عن الظلام الحالك ، الصمت القاتل ، الخوف ، والرعب.
دوما ظلام الليل.. يتبدد بنور الشمس .. لذا فمن الممكن أن يعطينا الأمل بغدٍ مشرق.
الحب
أجمل إحساس بالوجود تجاه أشخاص معينة.. تشعر أنك مسؤول عنهم.. تخاف عليهم.. تتمنى لهم الخير.. تحب أن يعيشوا سعداء.. تفرح لفرحهم..تكره أن يمسهم سوء..لاتبخل حتى بتقديم حياتك لو تفيد ثمناً لحمايتم من التعرض لسوء.
أمريكا
إرم ذات العماد. اللذين طغوا في البلاد . فأكثروا فيها الفساد
مملكة ستزول حقاً(ليُصبّن عليهم صوت عذاب. إن ربك لبالمرصاد).
المرأة
من الممكن أن تعطي للحياة ألذ نكهة، ومن الممكن أن تكون سبب الشقاء.
الصمت
حالة من السكوت، من وجهة نظري ؛ أقوى من الكلام إذ أن بها التفكير الذي يليه حسن التصرف.
الإنترنت
بالنسبة لي جزء من الكماليات التي يصعب جداً جداً الإستغناء عنها، فهو حقاً شرفتي الصغيرة التي أطل منها على العالم، تعلمت بسبب وجوده الكثير والكثير والكثير.. وما زلت أتعلم.
إختر منصباً وخذ قراراً
رئيس الجمهورية.. ولكن لمدة ربع ساعة فقط -إذ أنى أعتقد من الصعب عليَّ حالياً حمل تلك الأمانة-
والقرار:
-إقالة وزير الثقافة-تلك الشخصية التافهة حقاً والتي تعتلي ذاك المكان المرموق-
-إقالة مفتي الديار المصرية أيضاً وتطبيق قانون من أين لك هذا عليه!! وطبعاً كلنا عارفين لييييه..
-محاكمة يوسف والي .. ذاك اللعين الذي تسبب ومازال يتسبب في ازدياد معدلات السرطانات بسبب الهرمونات التي سمح بها في الزراعة. والتي على المدى تصيب بالسرطان.
وبعد تلك القرارات أستقيل. فكما قلت لا أستطيع تحمل مسؤولية أن يسألني الله تعالى ماذا عملت بولايتك!!؟؟
قيس،عنترة،جميل هم اللذين يقولون شعراً .. ليلى،عبلة، عزة صموت.. لماذا هذا التغيب من المرأة؟؟
أبداً.. عبلة كانت تقول الشعر في وصف عنترة.. فحينما كان عنترة لا يرضى أن يكون عبداً إلا لـ عبلة.. كن صديقاتها يقلن لها: يا عبلة قولى لعبدك يا عنتر.. فترد عليهن قائلة:
أما رأيتم عنترة .. يسير سير القسورة
وحتى لو كن صموت.. كفى أنهن يُشعرن من أحبوهم بتلك العاطفة التي يقولون من أجلها الشعر.. وبالتالي لسن صموت ولكن يشاركن في صناعة الشعر بشكلٍ غير مباشر..
وعلى فكرة جميل كان بيحب بثينة.. عزة دي جبتوها منين؟!!؟؟ هههههههه.
"أن تكون مطلوباً لارتكابك جريمة، خير لك من ألا تكون مطلوباً مطلقا"ً.. هل تتفق مع هذه العبارة؟؟ علل.
حلوة علل دي فكرتني بأيام زماااااااان هههههههه.
ممممممم لا طبعا، ألا أكون مطلوباً مطلقاً أفضل كثيراً بالنسبة لي.. حد يدخل السجن بمزاجه!! هههههههه سؤال غريب جداً.. وبعدين ايييييه حكاية السجووون؟؟ يااادي التاج اللي متألف جنب سجن طرة دا.
وبعدين ياما في السجن مظاليم.. في ناس كتيرررر في السجن وشرفااااء وناس أكتررررر خارج السجون ومجرمين ولكن..
وما ربك بظلاّم للعبيد
ولا تحسبن الله غافل عما يعمل الظالمون
إلى أين تمضي كلمات الحب؟؟
إذا كانت من القلب.. حتماً ستصل للقلب.
هل تجد علاقة بشكل أو بآخر بين المرأة و قطاع الطرق؟؟
حسب المرأة: منهم حقاً من أشد خطراً من قطاع الطرق، ومنهم من مثل موظف الخزينة الأمين الذي يحفظ لك أموالك. ذكرني ذلك بحديث الر سول الكريم صلى الله عليه وسلم فيما معناه: كلكم راعٍ وكلكم مسؤول عن رعيته، الرجل راع في بيته ومسؤول عن رعيته، والمرأة راعية في مال زوجها ومسؤولة عن رعيتها.. وكلكم راعٍ و كلكم مسؤول عن رعيته. هذا فراق بيني وبينك.. متى ولمن تقولها؟؟
لأي حد يصدر منه خيانة لي ، أياً كان نوعها.
كيف هو غداً؟؟
الله وحده .. عنده مفاتيح الغيب.. ولكن ان كنت تقصدين.. كيف تعتقد سيكون الغد في وجهة نظرك؟؟ أقول لك: أعتقد أنه سيكون أجمل من الحاضر إن شاء الله ..ودي آخر رباعيات كتبتها..
النفق مصيره هيخلص
والنور من تاني يرجع
وفـ بحر الراحة نغطس
ولفوق فوووق هنطلع
تمرر التاج دا لمين؟؟
التاج دا رخم بجد... ممممممم مش لاقي حد أرخم عليه .. عموماً مش هلاقي حد أرخم عليه أنسب من صاحبي الأنتيخ د. خالد أمين .. أما شادي فلبس معايا نفس السولطاااااانية لأن سول كانت ممراه لينا احنا الاتنين كنوع من الانتقام كما أوضحت آنفاً.. حسبي الله ونعم الوكيل.. مش هسامحك أبداً..
د. محمد الجوهري.
٠٥/٠٦/٢٠٠٩
تاج مقلب من شادى.. تعبنى جااااامد
طبعا زي مانتم عارفين محدش يعرف يهرب من قدره
والتاج نوع من أنواع القدر.. وأنا جالي قدر أ..أاا قصدي تاااج
وطبعاَ التاج مقلب من صديقي العزيز دكتور شادي صاحب مدونة واحد من الناس.. نردهولووو عن قريب .. قولوا ان شاااالله.
والآن مع التاج
اسمك؟؟
يا خبر يا شادي!! انت نسيتني ياااض ولا ايه؟؟ يخربيت الطب اللي بيعمل كدا ف الناس.. نص الدفعة جالو أل زهايمر وربعهم جالو حول والباقي نصهم جالوا حالات نفسية والباقي عيال معندهاش دم خااااالص ..
اسمى يا سيدي: محمد أسامة عبده الجوهري
وعلى فكرة جدي اسمه عبدالفتاح بس كان مسافر لما والدي اتولد وكان جدي شهرته عبده فلما والدي اتولد خاله راح سجله بإسم الشهرة ..هههههههههههههههه
وليا اسم دلـع كدا في البيت والأقارب المقربين جدا في العيلة اسمى: عمـــــرو لكن المعروف بيه في أي مكان محمد الجوهري.
اسمك المشهور بيه وسط اصحابك
مممم والله يا ذوووق هو كتير بس طبعا أشهرهم جوهري وفي ناس بيقولولي يا جو joo وفي ناس بيقولولي يا جوجو gogo وفي ناس بيقولولي يا جوجا gogga ههههههههههههه أيهم أقرب!!!
سنك؟؟
ممممم في يوم 12 شهر 7 الجاي هتم 23 بالتمام والكمال.
مجال الدراسة؟؟
يخربيتك منتا معايا يااااض .. هنكون فيييييين؟؟؟؟ فـ معهد فني سباكة قسم مواسير مثلاً !!! .. ولا في زراعة قسم فول حراتى؟؟ ولا طب بيطري قسم كتاكيت؟!! ..في طب بشري يا بوصص .. طب الزجازيج .. يعني مجال الدراسة الـطـــــــب .
اسم مدونتك؟؟
كــل يوم في جديد.. ذكريات وأحلام.. محمد الجوهري.
صورتك الرمزية بتعبر عن ايه؟؟
مممممم عن وجهي..ههههههههههه واحتفظوا بيها لأنها قدام هتنزل عالميتين جنيه هههههههههههههه.
فكرت تقفل المدونة؟
نهائياً .. لااااااااااااااااء ..
لكن مؤقتاً.. أحياناً قفلتها لأنك عارف ظروف الدراسة وكدا..
مدونتي استحاااالة أقفلها نهائياً لأني بحب التدوين بجد بعتبره جزء كبير من حياتي.
ايه رد فعلك لو حد قل أدبه عليك في تعليق؟؟
دا حصل فعلا .. وبسبب كدا عملت اشراف عالتعليقات
أفندي دخل عندي بغير معرف وكاتبلي تعليق بيقوللي فيه بطل تكتب وترد على نفسك لأن كان في ناس غير معرفه(إنينيمس) يعني دخلت وعلقت قبل منه فهو فاكر اني بكتب وبرد على نفسي ومفكرش ان هو كمان غير معرف ومش بعيد حد يدخل يقول برضو علي تعليقه اني كاتبه لنفسي.هههههههههههههههههههه وهكذا فمش هنخلص..
مبسمحش بنشر أي تعليق الا لو كان محترم ولشخص محترم بيحترم نفسه قبل ما يحترمني.
الشخص دا كان داخل بـ انى نيمس يعني غير معرف وقعد يشتم ليه بقا؟؟ الله أعلم قمت مسحت تعليقاته وعملت اشراف عالتعليقات... دا عن رد فعلي
أما عن إحساسي .. فأنا متأكد ان الشخص دا مريض نفسياً أو حقود لأنه لو عارف انه أحسن مني أكيد مش هييجي يهاجمني بوقاحة كدا ولإنه عارف انه حقير واني أحسن منه في حاجات كتير-لله الحمد طبعاً- فبيحاول يستثير غضبي وخلاص لكن مشكلته ان أُفقه محدود وميعرفش اني عارف تفكيره كويس.
أسوء مدونة؟؟
كانت مدونة واحد مثلى شاذ بيدعو لانتشار الشذوذ وبيطالب ان المجتمع يعاملهم أحسن من كدا وينظر ليهم بمنطق أكبر.. ودا طبعا تخلف وااااااضح جداً .. دي كانت أسوء مدونة زُرتها ومش هحط اللينك منعاً لانتشارها لأن كوني أحط اللينك دا من إحدى وسائل الدعاية ليها وأنا مش ممكن أعمل دعاية لشيء مقزز ومخالف للشرع زي كدا.
هيحصل ايه لإيميلك بعد ما تموت؟؟
هذا في علم الغيب والغيب لا يعلمه الا الله.
لكن لو سؤالك .. تعتقد هيحصل إيه لإيميلك بعد ما تموت؟؟
ممكن ردي يكون ممممم ان السيرفر هيمسحه بعد فترة لعدم دخولي عليه.. أو إن حد حبيبي هيعمل هاك عليه ويفتحه ويبعت منه أوف لاين للناس اللي عندي يطلب منهم انهم يدعولي بالرحمة.
إديت الباسورد لحد قبل كدا؟؟
لا إطلاقا إيميلاتي ومدونتي الباسورد بتاعتهم حاجة من ضمن خصوصياتي ومحبش حد يتدخل فيها.
السفر بالنسبة لك؟؟
ممممم تقدر تقول حياتي سفر.. وإن شاء الله هخلص دراستي وأسافر وهسافر وهسافر.. لأن السفر بيعلم كتير.
المود بتاعك؟؟
بني وبرباط هههههههههههه
مود ايه بس!! المود دا حالة نفسية يعني في ثواني ممكن يتغير.. بس ممكن تقول بحب الهذار والضحك جداً مع ان الظروف متنيلة بس إحنا كدا المصريين .. بنموووت وبنضحك واحنا بنموت.
طبعاً في أوقات لازم فيها جد .. مممممممم ودي مش كتير ههههههههههههههه.
بتعمل ايه في أوقات فراغك؟؟
غالباً بدخل نت أو بشتغل عالكمبيوتر أو بكتب شعر أو بخرج مع أصحابي.
الأكلة المفضلة؟؟
ممممممم الملوخية من إيد ماما حبيبتي.. أحياناً الكوشري..وبحب برضو صينية البطاطس والفراخ المحمرة في الفرن وفي حاجات تانية مش فاكرها وكفاية كداااااا علشان جُعت ههههههههههه.
الصفات اللي أخدتها من والدك؟؟
والدي -الله يرحمه- كان معروف بالطيبة الشديدة لدرجة انه كان ممكن يسيب حقه وكمان كان دايما صاحب ابتسامة مشرقة.. أنا أخدت منه الطيبة -دا بشهادة الأقارب والمعارف- بس مش لدرجة اني أسيب حقي .. أما عن الابتسامة بحاول تبقى ملازماني لكن بجد الظروف ساعات بتبقى أصعب.
الصفات اللي أخدتها من والدتك؟؟
والدتي بتاخد حقها كويس .. ودا اتعلمته منها.. و ليها احترامها ومكانتها وسط زمايلها ودا برضو أخدته منها.. بشهادة معظم الأصدقاء. والدتي لما تكون زعلانه من حد ما تعرفش تبص في وشه.. أنا كذلك ورثت دا منها يعني لو حد سألك محمد الجوهري زعلان مني؟؟ قول له : لما بيقابلك بيبص في وشك لو قال آه قوله يبقا مش زعلان منك ولو قال لأ قول له يبقا مش طايقك.وبرضو أخدت من والدتى إن لو حد قصدنى في خدمة وأنا أقدر متأخرش .. لدرجة إن في واحد صاحبي أيام ثانوي طلب مني كتاب رحت وديتهولو الساعة 2.30 بالليل ف الشتا.
أكتر ست حاجات بتكرههم؟
الكذب- الخيانة - النفاق- الغبااااء-الغرور-الغدر.
أكتر ست حاجات بتحبهم؟
الدين الإسلامي.. وبحمد ربنا أنى ولدت لأب وأم مسلمين.
أسرتي..(والدي الله يرحمه ووالدتي واخواتي وولادهم).
الأصدقاء اللي بيحبوني.. ودول كتير.. أقواهم على الاطلاق خالد أمين،محمد خضر،أحمد عصام الزرقاني، وانت وربنا يا شادي ههههههه.. وناس تانية كتيرررر
جدي لأمي.. بحب فيه قوته بالرغم من انه مقصر في حقنا.
صلاح جاهين، الشيخ محمد حسان ، مشاري بن راشد العفاسي.. الناس دي بعشقها بجد وصلاح جاهين دا أستاذي اللي اتعلمت من كلماته كتيررررررررررررر ربنا يرحمه.
بحب صفات كتير..( الحب ، الخير ، العدل، الأمانة، الحزم، الصدق، الذكاء والتاواضع وغيرها).
شخصيتك نوعها ايه؟
قول انتا بأاااااااااا ههههههههههههه دا حسب تقديرك. بحترم مقولة سمعتها بتقول الغبي هو أكثر الناس اقتناعا أنه أذكى الناس.. في رأيي الناس هيا اللي بتحكم .. إنت ايه رأيك في شخصيتي يا شادي؟؟
لماذا دخلت التدوين من الأساس؟
لو فتحت أول بوست ليا هتلاقيني كاتب اني من يوم ما عرفت كمبيوتر وأنا كنت بتمنى يكون ليا موقع أكتب عليه خواطري وأشعاري وكدا..وفجأتن.. آه وربنا لقيت أدهم الشهابي بيقوللى على بلوجر فعملت مدونة على الفور لأني بصراحة مكنتش بحب جو المنتديات المليء بالشغب. ومع ذلك كنت من الناس اللي عملت منتدى لبلدتنا بالرغم اني مبحبش أصلا المنتديات وتأكد لي أن المنتديات حقاً ليست مكاني بغض النظر عن الأسباب.. دخلت التدوين بحب لأني بجد كان نفسي في العالم دا والحمد لله وصلتله واتعرفت على ناس جميلة حبيتهم وحبوني.. واتعلمت كتير واستفدت كتير.التدوين دا حاجة مهمة جدا جدا جدا بالنسبالي.. جزء من روحي بجد.
أهمية التعليقات بالنسبة لك؟؟
التعليقات على الموضوع هي روحه هيا اللي بتخلي للموضوع طعم. هيا اللي بتحسس الكاتب ان عمله مثمر.. هيا اللي بتشجعة انه يكتب تااااني وتاااالت وعاشر. أنا بحب التعليقات جدااا (التعليقات البناءة طبعاً).
أحلى بوست كتبته؟؟ ضع اللينك واذكر السبب
البوست:
-مضحك ابتسامة صباحية بس مش صباحية قوي ، الجوهري.. ومغامرااااات ميكروباظية لو حد متضايق يقراهم وأكيد هيفك.. بخاصة موضوع الميكروباظ أنا عندي طرائف كتير في الميكروباظااات هبقا أحاول أكتب عنها إن شاء الله.
-موضوع أدبي حوار القلب والقلم ودا ارتحت كتيررر لما كتبته.
-شعر عامي حكـــــــــايـة إنســــــــان بســــــــــيط بعد ما خلصتها مصدقتش اني كتبتها. والقصيدة عن خروف العيد في البوست دا الكابتن جوهري..عاد إليكم من جديد .
أفضل مدونة قرأتها؟؟
مدونات كتير.. حاجات من عند الصباغ.. ومن أجدع بنوته.. و من سول وسبر .. و من زهرة الجنة .. و من كيارا .. ومنك يا شادي بخااااصة بوست خالتك اللي بجد بكيت بسببه.. ومن عمرو فاروق كلام من القلب.. ومن ابن بهية مصطفى مغربي ..وناس كتيرررر مش عاوز أنسى حد بس المدونين بجد فيهم ناس جبابرة ههههههههههههههه. بس ممكن تقول أكتر ناس عجبتنى الناس اللي عندي في السايدبار.
أفضل بوست قرأته؟؟
البوست: خالــــــتي بتاعك يا شادى عجبني جدا وبكيت بسببه.
الشغل بالنسبة لك؟؟
طموووووح وأمل كبيررررر يااارب يتحقق بيه أحلامي.
الانترنت بالنسبة لك؟
متنفس. أعتقد اني لا أطيق الحياة أسبوع بدونه.لو فاصل عندي بدخل من الموبايل.
تمرر التاج لمين؟
ممممممممم اصبر يا شادي مسيري هيجيلي تاج وهحدفهولك
أمرره لمين؟؟ مين؟؟ مين؟؟؟!!
مممممم لـ خالد أمين ، سحر غريب ، الصبــاغ ، سول وسبر ، علاء محمود ، نهال جمال(فري كيلر) ، أجدع بنوتة ، مصطفى مغربي و أي حد يحب ياخده ويجاوبه بالصحة هههههههههه
تحياتي للجميع
دمتم سالمين،
د. محمد الجوهري
ملك ميت غمر والسودان والكونغوالدكتاتورية وزيمبابوي وأنجولا وتنزانيا.
٢٧/٠٥/٢٠٠٩
حلـــم اتحقق ف ثــانية
أعتذر عن انقطاعى عن المدونة الفترة الماضية وأتمنى ألا تكونوا نسيتموني.. وسأحاول متابعة التدوين وعدم الانقطاع لفترة طويلة إن شاء الله وربنا يستر..
موضوع اليوم قصيدة عامية كنت قد كتبتها منذ فترة
سأعرضها عليكم وأتمنى أن تنال إعجابكم
أصلى لســــــة بحبها .. وهيــــــا كـــــل ما ليا
نمـــت .. وحلمـــــت بيها .. قصــــــــــاد عنيا
حلمت اننا قاعدين عالشط ف اسكــــــــــــندرية
ومع ان الجـــــــــو نار كان كلامها نسمة معدية
كــــــــانت عيني ف عينها و إيديــــــها فـ ايديا
فجـــأة .. لقيتني بغنيلها حتــــــــــــــة أغنية!!
بكلم حبيبتي قولتلها: حلوة الدنيا؟؟ زي السكر؟؟
ردت وقالت:حلوة وزي السكر علشان انت فيها
قولتلها دانتي السكـــــــــــر اللي محليــــــــــها
بحبــــــــــك بحبــــــــــك .. يا منـــــــــــــــايا
بحبــــــــــك يا روحــــــــــــــي يا هـــــــــوايا
وطـــــــــــــول عمـــــــــــــري بعيش واتمنـى
تبقــــــي انتي ليا حبيبتي ونسكـــــن أحلى جنة
ونعيـــــــــــش ســـــــــــــــــوا نتهنـــــــــــى
أديكــــــــــي دايمـــــــــاً مـــــــن حنـــــــــاني
وأفضـــــــــــل أحبـــــــــك يا مجننــــــــــــاني
يا كــــــــــــــــل الحنـــــان .. يا كل الأمــــاني
..........
قلــــــت خسارة الحلم يخــلص مـــــــن عيوني
وفجـــــــــأة فـــوقـــــــــــت .. دي رنتــــــها
معقــــــــــول الحلــــــم يتحقق فــــــي لحظتها
فتحــــــت الخــــــــــط .. وقلـــــــت ألـــــــــو
لقيتـــــــــــها بتـــــــــــــــــــرد علــــــــــــيا
بلهــــــــــــفة .. بشـــــــــوق .. بحــــــــنية
قولتلها أيـــــــوا حبيبتي يا هـــنا أيامي الجاية
بحبــــــــــك بحبــــــــــك .. يا منـــــــــــــــايا
وعــــــــــــــدتهـــــا .. ووعــــــــــــــدتنــــي
هكـــــــــــــــــــــــــــــــــــون لهـــــــــــــــــا
هتكــــــــــــــــــــــون أميـــــــــــــــــــــــرتي
وانتظروا جديدنا
٢٤/٠٤/٢٠٠٩
مدونة الجوهري.. غير متاحة حاليا رجاء أعد الزيارة لاحقاً .. تيييت تيييت تيييت
زوار المدونة الأعزاء
آسف جدا
مش هقدر أتابع المدونة اليومين دول
بس إن شاء الله هحاول أرجع على قد ما أقدر
أتمنى ما تنسونيش
ومحدش يزعل مني
٠٣/٠٤/٢٠٠٩
يتمسكنوا.. لحد ما يتمكنوا
معلش إتأخرت شوية في كتابة البوست بس رجاءً إلتمسوا لي العذر..
أتحدث اليوم عن نصف المجتمع .. واللي بتولد النص التاني ..
أتحدث اليوم عن المرأة .. بوضوح وبصراحة ومن غير لف ولا دوران..
طبعاً مقولة المرأة نصف المجتمع وتلد النصف الآخر بتحسسك إن الرجالة إييييه مالهمش أي فــايدة..
أنا هدخل في التفاصيل علطوووول..
طبعاً زماااااان - أيام الجاهلية - كان الرجل عندما يُقال له رُزقت بأنثى ، يسود وجهه ويجيب الفاس آه وربنا ويحفر حفرة ويدفنها صاحية وهو ما يُسمى بـ وأد الإناث..
وطبعاً جاء الإسلام وحرم ذلك تحريماً تاماً لا جدال فيه وأوضح أن من قتل نفساً بغير ذنب مثله كمثل من قتل الناس جميعاً ومن أحياها كمن أحيا الناس جميعاً..
وطبعاً نالت النساء أبسط حقوقهن وهي الحياة.. بل وكُرّمت النساء في عهد الرسول -صلى الله عليه وسلم- فكن يعملن في مجالات تضميد الجرحى في المعارك .. ولكن كان دوماً دورهم الأساسي هو البيت. وكان لهن الحق في طلب العلم ففي السنة طلب العلم فريضة على كل مسلم ومسلمة..
وكان دوماً للرجل السيادة في بيته.. ويبدو ذلك جلياً في عصر سي السيد -الله يرحمه- هههههههههه كان حمش مكانتش أمينة ولا ولادها يستجروا يقولوا له نص كلمه -ليس هذا موضوعنا- وكانت النساء للمنزل وفقط..
ومع ظهور قاسم أمين ظهر تحرير المرأة.. آه مش كفاية بقا إنها تبقى في بيتها.. لا يا عمي تخرج وتشتغل وتشارك .. المرأة نصف المجتمع.. وبتولد النص التاني.. لازم تخرج و تشتغل..
وتحررت المرأة وبقت بسم الله ماشاء الله تخرج وتشتغل وتتفسح وتركب عربيات-فين أيااااام الوأد؟؟ هههههههههههههه-
وتقلدت المرأة مناصب عديدة.. فصارت مدرِّسة ومهندِّسة وطبيبة وصحفية ومحامية ومش بس كدا إزاي يا عمنا !! مزيداً من الحرية للمرأة.. فعملت بالوظائف التالية:
قاضــية (لا هيا ضربة قاضية):
رغم أن المرأة سُمح لها بتولي العديد من المناصب منذ عشرات السنين إلا أنه كان محظور عليها تولي مناصب قضائية، وذلك لأنهن يحكمن بالهوى ومن الصعب أن تجد إمرأه تحكم العقل قبل العاطفة بنسبة مئة بالمئة.. إلى أن جاء عام 2003 ، وتم تعيين المحامية تهاني الجبالي كأول إمرأة تعمل بالقضاء في مصر.. وطبعاً ماسورة قاضيات ضربت .. وتبعها عشرات القاضيات .. وعمار يا مصر.
ودي صورة مدام تهاني الجبالي أول قاضية بالصلاةُ على النبي
شايف يابني التمكن.. قاعدة زي الوحش بالصلاةُ على النبي
نالت المرأه حقها في أن ترشح نفسها بالدوائر الإنتخابية.. وتصبح عضوة بمجلس الشعب.. عاااادي يعني.. آه البلد دي ما فيهاش رجالة بس..
ومش بس محلياً لا والله دا عالمياً كمان.. إذ قامت السيدة فريال المصري السعودية الجنسية بترشيح نفسها في الإنتخابات الأمريكية التشريعية ممثلةً عن الحزن- عفواً الحزب- الديمقراطي لشغل مقعد-كرسي يعني- في المجلس التشريعي لولاية فنتورا... واللي بتقصر تنورة.. بتشاغلها عيون الشااااب هيييييييييه تبقا بحالة مغرورة -عفواً الكي بورد عندي بتهيس- ومش بس ولاية فنتورا بل وجزء من ولاية لوس أنجلوس -حتة زوغننة مش كبيرة- ويقال أنها أول سيدة من أصل عربي تشغل ذاك المنصب آه وربنا.
وآآآآدي صورتها-يختشششي عثل-ســــــفيرة:
أعلن البيت الأبيض تسمية الرئيس الأمريكي جورج بوش "مارجريت سكوبى" لتكون سفيرًا للولايات المتحدة بالقاهرة، وهي بذلك تكون أول سيدة تشغل هذا المنصب في مصر، منذ أن استؤنفت العلاقات بين واشنطن والقاهرة في مارس 1974 بعد عدة سنوات من القطيعة التي بدأت مع حرب يونيو1967 وياريتها داااامت.
وآدي صورة لـ مارجريت سكوبي هانم بس مش عثل زي فريال
وزيــــــــــــــرة:
كانت أول إمرأة في العالم العربي تتقلد منصب وزيرة هي العراقية .. نزيهة الدليمي وطبعاً ازاي مصر ما يبقاش فيها وزيرة هيا كمان قامت تقلدت حكمت أبوزيد منصب أول وزيرة مصرية وثاني وزيرة بالعالم العربي بعد نزيهة هانم.. وطبعاً كالعادة ماسورة وزيرات ضربت في مصر .. الجدير بالذكر أنه تم تعيين السيدة حكمت أبو زيد منصب وزيرة الدولة للشئون الإجتماعية في عهد الراحل العظيم: جمـــال عبدالناصر وكان وراء تعيينها الصحفي مصطفى أمين والذي يحكي عن ذلك قصة طريفة سأسردها على لسانه بإختصار:
ذات مرة كنت أجلس مع الرئيس جمـال عبدالناصر، فأخبرته بإقتراحي بتعيين وزيرة في الحكومة المصرية، وناقشني في الفكرة واقتنع بها تماماً - ليه بس كدا يا جمال تزعلني منك؟؟ - وفجأة دخل عبدالحكيم عامر فطلب عبدالناصر مني أن أشرح له إقتراحي، وحينما أخبرته باقتراحي قفز فجأة من فوق مقعده-الكرسي بتاعه يعني- قائلاً "عليا الطلاق بالتلاتة... لو دخلت الوزارة واحدة ست لـ هقدم استقالتي" - وربنا راااجل يا عبدالحكيم .. الله يرحمك -. ومرت مدة ولم أرَ صداً لإقتراحي حتى جاء عام 1960 واتصل عبدالناصر بي وذكّرني بالموقف واعتراض عبدالحكيم عامر وذكر لي أن هناك تعديلاً وزارياً وأن عبدالحكيم عامر سيخرج من الوزارة وطلب مني أن أبحث في أرشيف أخبار اليوم عن أنشط وأهم عشر سيدات ليختار من بينهن أول وزيرة في تاريخ مصر المعاصر-معاصر القصب!! ليييه بس كدا يا عبدالناصر!! دانا بحبك ههههههه- واهتممت بالموضوع وبحثت في الأرشيف وقدمت له قائمة بعشرة سيدات أتذكر منهن أمينة السعيد وكريمة السعيد ومفيدة عبد الرحمن وحكمت أبو زيد.. وكانت رقم عشرة في القائمة. وأمام كل إسم ملخص عنه وصورة صاحبته. وقد كان عبدالناصر يعرف نشاط السيدة حكمت أبوزيد. ولم يحدثني عبدالناصر عن ذلك وفوجئت بعدها بفترة بتعديل وزاري وتعيين السيدة حكمت أبوزيد كأول وزيرة مصرية.
أنا كل الحوار دا مش عاجبني إلا عبد الحكيم عامر- الله يرحمه- وربنا باشا ههههههههه وطبعاً الستات هيقولوا انتحر بسبب غضبنا عليه هقولهم لااااء حالة نفسية أله.
وطبعاً عالمياً ماسورة الوزيرات اتفتحت فنجد كونداليزا رايس الغنية عن التعريف .. تتقلد منصب مستشارة الأمن القومي للرئيس المضروب بالجزم بوش وبذلك تكون أول وليه تتولى منصب وزيرة الدفاع- شوف يا أخي وليه ومدوخة العالم - هيا أي نعم مش ولية أوي بس ربنا يخلي لينا أحمد عيد أخد حقنا في فيلم ليلة سقوط بغداد وأكد إن مصر لسه فيها رجالة-وهو دا اللي فالحين فيه-.
وآدي صورة كونداليزا رايس ومش بس وزيرة لأ المزيد من الحرية .. في أيسلند تولت السيدة جوانا سيجورداردوتير-يرحمكم الله- منصب رئيسة الوزراء.. الحمد لله عندنا الطووووول مغطي عالمنصب دا.
وآدي صورتها-يا وليه روحي موتي ولا تموت ليه جت عليها ما اللي بالي بالك قافش فيها- طايب يا جماعة خلينا نقول المناصب اللي فوق عادي ممكن .. الستات دول في المدن بقا والتقدم وكدا .. خلينا نشوف القرى..
رئيسة وحدة محلية:
إختار محافظ قنا اللواء مجدي أيوب السيدة "فاطمة مصطفى مدني" رئيساً للوحدة المحلية بقرية " توماس وعافية "- ههههههه دا حتى اسم القرية حلو ههههه بالشفا - بمركز إسنا التابع للمحافظة ( 700كيلو متر جنوب القاهرة ) لتصبح بذلك أول سيدة تشغل هذا المنصب بمحافظات جنوب الصعيد - حتى الصعيد خلااااص يانهار أبياااااااااض فين أيام ما كانت الولية لو خرجت من البيت تنطخ بالبوندجه؟؟ الله يرحمك يا خط الصعيد-.
واللذيذ بقا..
أول عمدة ست -عمداية يعني ..يا حلاوة يا ولاااد-:
إيفا هابيل كيرلس... أول عمدة ست في الصعيد ومش في الصعيد بس دا في الشرق الأوسط كله .. آه وربنا.
وآدي صورة مدام إيفا بالصبّار والأفندي رايح يبصم إنه موافق.
اللذيذ إن إيفا كانت في برنامج والبرنامج عمل استطلاع سريع لآراء الناس فجابوا ست وسألوها إيه رأيك في تعيين السيدة إيفا عمدة؟؟ ردت وقالت والله أنا مبسوطة جداً وبجد تستحقها وجديرة بيها وأنا نفسي أبقا زيها ولو حتى أتعين غفير جنبها.. وعلى الله ما أصحاش ألاقيهم عينوا واحدة ست عمداية عندنا في البلد وربنا تبقا كارثة.
وآخر واحدة بقا دي اللي حدوتة هيا من الشرقية من مركز القنايات وفي بلد واحد صاحبي اسمه د.خالد الشحات قريت الخبر لما نزل في الأخبار ولقيت أخينا بيبص في الأرض فبقوله إرفع رأسك فأنت من القنايات...ههههههه وربنا ما هحضر كتب كتابك ليييييه؟؟
علشان المأذونة واحدة ست.. تخيلوا
طبعاً الموضوع معروف من فترة بس أنا كنت عارفة من أول ما انتشر ولكن موضوع التدوينة ما جاش في دماغي الا دلوقتي...
ودي صورة أول مأذونة بمصر والشرق الأوسط-وعمار يا شرقية وعمار يا مصر-
بس بأمانة شلها متمكنة في كتابة عقود الزواج
وطبعاً بقت نجمة في ثواني هههههههههههههههه
بصراحة ما عادش ناقص الا ان الرجالة تولد وترضّع آه وربنا هههههههههههههه
في رأيي الست مالهاش غير بيتها.. تتعلم آه بس علشان تكون أم متعلمة .. دا رأيي وأنا حر فيه..
آسف على طول الموضوع بس والله لو في مجال ممكن أطول قد كدا 10 مرات.
دمتم سالمين،
د.محمــد الجـــوهري
٢١/٠٣/٢٠٠٩
الســت دي..أمــــي
يقول الله تعالى : أعوذ بالله من الشيطان الرجيم
أتكلم اليوم عن أمي ..
يقول أمير الشعراء:
الأم مدرسة إذا أعددتها ... أعددت شعباً طيب الأعراق
أكتب هذا الموضوع وأنا في قمة سعادتي .. فقد كُرِّمت أمي من قبل مركز شباب بلدتنا كأماً مثالية لهذا العام 2009 .
نعم إنها أمي .. بكل فخر أقول .. الست دي أمي..
منذ نعومة أظافرنا قامت بتربيتنا علي الأخلاق والقيم .. أذكر من المواقف العديد.. كم كانت تربيتها رائعة..
منذ نعومة أظافرنا .. أعدتنا لنكون متفوقين دراسياً .. فكان لها بنتاً طبيبة .. و بنتاً خريجة كلية الألسن .. وإبناً طبيب .. وبنتاً متفوقة بالإبتدائية.
مرت بسنوات كفاح عديدة لا يعرفها إلا أولادها .. حيث كان أبي أغلب الوقت مسافراً لتوفير الحياة الكريمة لنا .. فإغترب عن زوجته وأولاده لسنين عديدة .. سافر فيها بالخارج وعاد في مراحل الثانوية العامة ليكمل الطريق مع أولادة ويعدهم لكليات القمة .. ومات الأب الكريم -رحمه الله- وترك ذكرى طيبة لأولاده فما من أحد يعرفه إلا ويذكر طيبته وبشاشته وحسن خلقه.. رحمه الله وأدخله واسع جناته.
مات الأب ولم يفرح بزواج أحد من أولاده إلا خطبة إبنته خريجة الألسن .. مات بعد خطبتها بأسبوعين .. مات ولم يشهد تخرج وزواج ابنته الطبيبة.. ليمنعه الموت من الفرحة بثمار عمره التي قضي حياته يشقى من أجلها .. ولكن ذاك قضاء الله .. ونحتسب له الأجر عند ربه .. فاللهم إجزه عنّا خير الجزاء ..
ولم يحطمنا موت الأب بالرغم من صعوبته وتخاذل الأهل إلا أن أمي كانت قوية.. وزوجنا أختي وزوجنا الأخرى الطبيبة .. وكرمهم الله بأزواج أفاضل متدينين وعلى خلق .. وأنجبن أحفاداً لأبي وأكملت أمي رسالة أبي التي عاش يحلم بها .. فكانت حقاً تستحق التكريم..
لم نقدم أوراق أو أي شيء .. ولكن فوجئنا بتكريم مركز الشباب ببلدتنا لأمي بالأم المثالية لهذا العام على مستوى بلدتنا..
أبارك لكِ أمي .. وأقول لك .. أن تستحقين أكثر من ذلك..
كرّموكـــي.. وما يعرفوش إن انتي تكــريمنا
قال إيــــــــه ولادك.. تعليمهم القمــــــــــــــة
وما يعرفوش .. إن لولاكي يا أمي .. ما كـنّا
وإن دا فضلك .. وياما يا غـــــــالية دعيتيلنا
ويـاما أخدتي من راحتك .. وتعبتي علـشانّـا
***************
والنهــــــاردة .. جــينا نحتفـــــل بيكـــــــي
لما قالولنا دا حفل تكــريمك ..جينا و بهمة
لأننا عــــــــارفين الجنة... تحــت رجليكي
وساعة التكـــــريم كانت الدموع في عنيكي
ربنا يا أمي مايحـرمنا .. من لمتنا حواليكي
***************
والنهــــاردة يا حبيبتي ... في يـــــوم عيدك
جــــايين نقــــــــول بصـــــــــــراحة وبذمة
خــــلينا زي مـــــــــــــا دعــيتيلنا ندعـــيلك
مــن حــــــب النـــاس والخير ربنا يزيــدك
سامحيني يا أمـــي .. وخليني أبـــوس إيدك
١٦/٠٣/٢٠٠٩
وافتــــــــرقنــــــــــــا
بعــــــــــــد مــــــــا كــــــــان قلبي ليكـــــي أسيــــــــــر
ودلــــوقتـــــي لمـــــــــــــا حبـــــــــــــك ضـــــــــــــاع
بفتكـــــــــــــــــــــــرك أنــــــــــــا بالخيـــــــــــــــــــــــر
بدعيلك بالسعــــــــــــــــــادة .. مهما إيـــــــــــــه بيصير
*****************
كـنتـــــــــــــــــــي قــاســـــــــــــية عــليــــــــــــــــــــــا
كـــنت بمــــــــــوووووت مــــن هجـــــــــــــــرك ليــــا
وليــــــــــــالي كتيـــــــر قـتـلنـــــــي صــــــــــــــــــداع
مـــــــن كُــــــــــتر دمـــــــــــــــــــــــــــــــــــوع عـنيــا
واكتشفت .. إن كله كلام .. وعمرك...... ما حسيتي بيا
*****************
كــــــــــــنت فاكـــــــــــــــــــــــــــــــــرك إنتـــــــــــــي
هتـــضــــيعيـــــــلـــي حيـــــــــــــــــــــــــرتــــــــــــــي
حــــــــــــرام بقــــــــــا .. وكفـــــــــــاية خـــــــــــــداع
دانتـــي .. علــــــــــــــــــــــــــــى حـقـيقـتـــك بيـــنتــي
وأكتــــــر قلـــــــب حبــــــك .. بيعتيه وخـــــــــــــونتي
*****************
صــحـيـــــــــح بعــــــــــــــــــــــــــــدّتي عـــــــــــــــني
بعـــــــــــــــد مــــــــــــا كنتــــــــــي حـــــــــتة مــــــني
ودلـــوقتي بعــــــــــد مـــــــــا قلبـــــــــــــك بــــــــــاااع
بقــــــــــــــــــــــــــــــــــــولك ... اســـــــــــــــــــــــتني
خــــــــودي كــــــل حاجة ليكي .. خسـارة خـــاااب ظني
*****************
خـــــــــــــودي مــــــــن روحـــــــــــــــي سيــــــــــرتك
خـــــــــــــودي مــــــــــن عقلـــــــــي إسمــــــــــــــــــك
وكفـــــــــــــــــــــــــــــاية... وقــــــــــــــــوليلي ودااااع
وخــــــــــــــــــــودي مــــــــــن قلبي صــــــــــــــــورتك
ولمـــــــــا هتــــوحشيني... متخـافيش... هعتبرني زُرتك
*****************
أتمنى تكون القصيدة عجبتكم وفي انتظار تعليقاتكم.
ملحوظة: حقوق النشر والطبع والإقتباس محفوظة للمدونة وللناشر ..
تحياتي للجميع،
د. محمد الجوهري.
٠٤/٠٣/٢٠٠٩
الجوهري.. ومغامرااااات ميكروباظية
مرحباً بكم من جديد
بما إننا بقالنا فترة ما هزرناش سوا .. فحبيت أكتب بوست شوية كوميدي.. أتمنى يعجبكم
خلينا نقول .. إن الشعب المصري بطبعة خفيف الظل .. برغم كووووووول المتاعب وكووووووول الأزمات اللي بيعانيها سواء من الداخل أو من الخارج بس برضوا المصريين تلاقيهم أخف دم وألذ ناس..
هتكلم النهاردة عن فئة السواقين بصفة عامة .. والشعارات اللي بيكتبوها على عربياتهم ( الميكروباظااات يعني ) ..
وطبعاً للناس اللي ما يعرفوش الميكروباظ .. اللي هما ولاد الذوات .. اللي بلغه سواقين الميكروباظ بيشربوا مية بالمعلقة .. دي صورة الكائن اللي اسمه ميكروباظ .. علشان لو شافوه في الشارع ما يتخضوش
وطبعاً دي صورة ميكروباظ محترم موديل حديث جداً وستاير وحركااات ..
فإن كنت عاوز تشوف موديل قديم
تفضل سيدي .. تفضلي سيدتي .. وتعالوا اركبوا ميت غمر الزجازيج .. هتلاقوا من الميكروباظات أشكال وألوان.. في منها الكويس.. وفي منها الهلكااان ... هتلاقي فيها اللي تانكوووو فاضي .. وفيها اللي بالسولااااار مليااان .. هتلاقي اللي سواقها صاحي .. واللي تملى سرحااان .. هتلاقي منهم اللي ولا غلطة بيعمل .. وهتلاقي اللي بيلوش وعامل دماااغ بتنجااان ... ما علينا .. وعليكوو إنتو كمااان
خلينا في موضوعنا .. أستهل موضوعي بالحديث عن سائق من ذوي الأدمغة العالية .. ركبت معه منذ فترة وأنا رايح الزقازيق...
ركبنا .. وفي منتصف الطريق وتحديداً قرب قرية تفهنا الأشراف .. لقيت سواق زميل لقائد السيارة بتاعتنا .. بيقرب وبيقوله صباح الفل يا حموووو ... وبيزنق عليه .. قام السواق بتاعنا .. قالووو صباح الفل يا هيماا ... وقام كاسر ومعديه .. وبعد ما عداه .. بيقول عليه .. شغل عيال صغيرين ... واد شكل البومة الدكر .. دانا بقالي 28 سنة عالدركسيون ما..... وطبعاً لسه هيكمل ما اديتلوووش فرصة.. قمت قلتله ياااه دا زمان الدركسيون نــمِّل .. هههههههه .. قام بصلي وضحك .. وقاللي مساء الفل يا أستاذ .. شوية وست طخينة معدية الطريق .. بس مش أي تخن .. لا دي طخينة بهبل .. المهم السواق وقف ومستنيها تعدي .. وطبعاً بتاخد وقت على ما تعدي .. فقام طالع من الشباك وقال لها : عدي يا أم جلمبوووو .. أنا بصيت للست وسمعت أم جلمبووو وعينك ما تشوووف الا النووور ضحك بقاا لحددد ما قعدت أخبط في سقف العربية .. شوية ولقيت السواق ماشي بالراحة جدا .. فبقول له يا ريس بسرعة شوية بعد إذنك علشان ورايا إمتحان والله ومش عاوز أتأخر .. لقيت اللي بيتكلم بلهجة عادية ولكن يبدوا عليه الضيق ونطق بكلمات غير مفهومة ولكنها أهلكتني من الضحك .. قال: معلش يا أستاذ أصل والله التيل بياكل في الطمبورة والعربية ما بتسحبش معايا .. ههههههههههههه .. أنا بقا عمال أتخيل في التيل اللي بياكل في الطمبورة ومييييييييييت من الضحك .. تيل بياكل في طمبورة .. الله .. الله على مصطلحات السواقين .. حاجة أوريجينااال خااالص .. يا شماتة أبلة طازة فياااا ... أنا يتقالي تيل وطمبورة .. هههههههه ..
وذات مرة كنت أركب مع سائق آخر برضووو على نفس الطريق المنحوووس .. وبرضو كالعادة الميكروبااااظ باااظ( وهذا هو سبب تسميتي للميكروبااااظ بذلك الإسم .. بالظااااد -الظاء يعني- وليس بالصااد ) فبقوله خير يا ريس .. فقال لي: معلش يا أستااااذ أصل البيضة وقعت من الحُق .. هههههههههههههه .. فبقوله بيضة ايه يا عم؟؟ .. وحُق إيه؟؟ .. قاللي البيضة وبيعمل بصوابعة شكل بيضة .. من الطبيعي أن تتخيلوا حالتي الإزبهلالية .. فقد حدث لي حالة إزبهلاااال فووق الفظيعة مصاحبة بغباااء لا شعوري .. وربنا سترها الحمد لله .. والبيضة ما فقستش وطلع منها كتكوووت يقرفنا .. هههههههه ( البيضة بتاع الحق طبعاً ) انتوا سرحتوو ولا ايييييييه؟؟
***********************
خلينا ندخل في موضوع آخر يهلك من الضحك
طبعا كووولنا بنشوف ميكروباظات في الشوارع .. وعليها شعارات عجيبة ..
أنا هنقلكم بعض اللي شوفته .. من خبراتي الميكروباظية ..
عندك مثلا تلاقي واحد سايق ميكروبااظ زي فردة الجزمة البانص- اللي من غير رباط يعني- ولا مؤاخذة وكاتب عليها
الحلوة مرتاحة للسفر والسياحة
ومحسسني إنه سااايق ليموزين.. وأنا أقووول إيييه اللي ضرب السيااااحة!! .. هو دااا نادوا شرطة السياحة.
وواحد تاني كاتب جملة مشهووورة جداً يمكن كووولنا شوفناها
عضة أسد ولا نظرة حسد
ههههههههههههههه
بس الأسد ما بيعضش يا هندزة
الأسد بيلهط على طوووول على رأي عااادل إمام هيقعد يعض بقا ويتفتف بزر ويقرفنا .. الأسد -الزعيم يعني- .. بيلهط على طووووووووول
خليك في السليم يا عمي الحسد حلو يا أخى
دا حتى موجود في القرآن
هههههههههههههههههههه
وطبعاً
أشهر عبارة على التريلاااات والعربيات النقل العملاقة
يقيني بالله يقيني
وأنا زوغير ما كنتش فاهمها .. كنت بحسبها إسم صاحب الشركة اللي العربيات دي تابعة ليها زي
سعد محمد سعد أو عثمان أحمد عثمان
تخيلوا!!
ههههههههههههه
ودا واحد لذيذ معلق
كنت عصفور أكلوني... عملت أسد صاحبوني
يا وااااد يا جااااامد
ههههههههههههههههههه
و مرة لقيت واحد كاتب
إلهي ربنا يوعدك بعسكري غلس ياللي تعاكسني عالطريق
ههههههههههههههه
طاب ماتقول إلهي العربية تتقلب بيك على ضهرها زي الصورصااار أحسن
ههههههههههههههه
وشوفت وأنا رايح إسكندرية واحد كاتب
خرمت ودني بكلاكس أمك
كويس كان ناوي يقل أدبه بس ربنا سترهههههههههههههههه
وواحد كان كاتب
ياااض بطل استعباط ... والله عليها أقساط
وواحد تاني كاتب
متبصليش بعين رضية .. الأقساط مطلعة عنيا
ودا طبعاً التطور الطبيعي لـ من العين يارب سلم
و لـ ياناس يا شر كفاية قر
ولـ متبصليش بعين رضية .. شوف اللي اتدفع فيا
هههههههههههههههههههههه
أما اللذيذ بقاااا .. واحد كان كاتب
عربيتي سمباتيك .. وسطها قلاوووظ... وبدوب في عنيها الجوز
هههههههههههههههههههههههه
تقريبا كانت اللي بتصمم الملصق بتاع العربية واحدة مزززة .. فراح مبلِّم وقال لها الكلمتين دوول .. فقالتله نعم؟؟ .. قال لها: عاوز أطبعهم.
ههههههههههههههههه
وطبعاً في من السواقين اللي بيتخانقوا مع بعض علشان الركاب
وبيتفننوا في ارضاء الزبون لحد ما يركب
ودا واحد منهم كان معلق
تركب أسليك .... تنزل ..هولع فيك
يا سااااتر هركب يا عم .. إنت دلعك وحش كدا ليه يا هيما؟؟ هههههههههه
ودا بيحسسك إن السواق قاعدلك بالأكسي أسيتيلين على باب الميكروبااااااااظ
ههههههههههههههههههه
وطبعا معروف المثل القائل
الدنيا دوارة ... تارة لك وتارة عليك
يعني يا حبوب متزعلش هيا الدنيا كدا يوم ليك ويوم عليك
تم تحريف المثل إلى
الطارة دوارة... والغلطة بخساااارة
أي.. الدركسيون بيلف .. والغلطة فيها خسارة ممكن رفرف أو فانوس أو إكصدام أو الله لايقدر يموت سواق الميكروباظ في تمانين داهية
طبعاً .. البوست طويل جداً .. أنا عارف.. بس بصراحة المعلومات اللي فيه مقدرتش أختصرها عن كدا
كان معكم مراسلكم الصحفي لقناة المتبهدلون في الأرض:
د. محمد الجوهري
ملك ميت غمر والسودان والكونغو الدكتاتورية وزيمبابوي وأنجولا وتنزانيا.
من قلب الحدث .. موقف 100 غمر .. الزجاااااازيج.
عذرا للإطالة
ودمتم سالمين.
٢٥/٠٢/٢٠٠٩
دعوة عاااامة .. رجاءً إنشروها
الحبيب المصطفي صلي الله عليه وسلم
تقدم جمعية نهر الحياة
الندوة الدينية
مع الحبيب
يقدمها الداعية / محمود القلعاوي
الجمعة 6 مارس 2009 م / الموافق 9 ربيع الاول 1430هـ
بقاعة التليفزيون بالنادي الاجتماعي من الساعة 4 : 7 مساءا
الدخول مجاناً والدعوة عامة
يرجى الحجز مسبقا العدد محدود اتصل علي 015363606
٢٠/٠٢/٢٠٠٩
شوية إهداءات
أعزائي المشاهدين والمشاهدااات
د. خالد أمين زارع
إفتتاح باكورة إنتاج أفكار صاروخية من العيار الثقيل
تخيلوا معي... هذه الدمااااغ عندما تُبدع...آآآآه والله.. لما تُبدع أكيد هتعمل أعلى شغل...
بجد وبصدق خالد دا دماغه جبارة.. عاوزكم تتابعوا دماغة على مدونته.. دمــــاغي وأنا حر فيهـــا
******************************
أما عن الإهداء الآخر
فدا لمدونة جديدةهنتكلم فيها عن حال مواطن تحت خط الفقر
هيكون معاكو رسام الكاريكاتير-الكاريكاتيرجي- إسلام ديــو صاحب مدونة إصحي يا مصر والباشا الكبير خالد أمين بدماغه اللي هو حر فيها و أنا كمان هبقا معاهم في مدونة
مــــواطـــــــــن تحت خط الفقـــــــــــر
فانتظروا جديدنا .. وتابعونا .. وربنا يستر
هستناكم هناك
أتمنى لكووووول الأصدقاء التوفيق
وفي انتظار الإبداعات
دمتم سالمين
د. محمد الجــوهري
ملك ميت غمر والسودان والكونغوالدكتاتورية وزيمبابوي وأنجولا وتنزانيا.
٠٩/٠٢/٢٠٠٩
تسمحيلي.....؟؟؟
٢١/٠١/٢٠٠٩
أسئلة غريبة مالهاااااش إجابة
خلينا نشوف السؤال نمبر تو
- ليه لما بنتخض بننادي على شخص مش موجود؟؟؟ ... طبعاً واحد لذيذ وطِعِم هيقولي مين دا يا عم جوهري اللي لما بنتخض بننادي عليه وهو مش موجود... هرد طبعاً وأقوله الأخ لهوي ... علطول بنقول يا لهووووووي!!! مين بقااااا لهوي دا؟؟ نفسي أشوفه لو حد عارفه ياريت يصورهولي ويجيبلي الصورة ههههههههههههههههههه.
والآن مع السؤال نمبر ثري
- إيه اللي فـ الصورة دي؟؟؟
برافوووووو عليكم شاطرين يا ولاااااد دي فانلة حمالات ... صح عشرة على عشرة ونجمة بتضحك كمان
ليه بقا بنلبسها تحت اللبس؟؟ أتحدى لو حد عارف ليها لازمة!!! أنا عن نفسي بلبسها بقااااااااالي 22 سنة بس لحد النهاردة مش لاقي ليها أي لازمة أو فايدة... اللي يقولي علشان تدفيك ههههههههه هيا دي يعني اللي هتدفي ههههههه واللي يقولي علشان تشرب العرق يااااااااع هههههههه حاجات مش مقتنع بيها بصراحة.... السؤال دا مجنني جداااااا.
والآن مع السؤال نمبر فووور
- ليه لما بنلاقي مكتوب عالحيطة " إحذر الطلاء لم يجف بعد " بنلمس الدهان بأطراف أصابعنا؟؟؟؟... يعني هو الراجل اللي كتب الكلام دا لازم يكتب يمين طلاق بالتلاته إن الدهان منشفش؟؟؟ ههههههههههه .
السؤال نمبر فايف
- ليه دايماً موظف الخزينة فـ أي مكاااااان شخص رخم ودمه تقيل وبطيء جداااااا جداااااا ؟؟؟؟ هما تقريباً بيختاروهم بعد عمل إختبار سماجة والشخص الفائز بهذه المهنة هو الشخص الأكثر سماجة ورخامة وتناحة وبواخة وغتاتة ولامبالاة.
السؤال نمبر سيكس
- ليه الستات وهيا بتطبخ الملـــــــوخــــــية وأثناء مـرحلــــة التقلــية"Ta2leia Process" بتشهق؟؟؟ نفسي أعرف ليه؟؟؟ أنا بحب الملوخية بس بسبب السؤال دا ممكن أكرهها.
السؤال نمبر سيفن آب
- ليه الكوبايات لما بتقع مننا وتنكسر ليه بنقول خير أو "خدت الشر وراحت" ؟؟ وبالذااااات لو فيها قهوة ... ولما فنجان القهوة يندلق أو يقع ينكسر بنقول " دلق القهوة خير " ... أنا مع المثل اللي بيقول " دلقوا القهوة من عماهم وقالوا الخير جاهم " .. وإلا فكان زمان أصحاب الكافي شوبات والقهوجية وأي واد بلية شغال فـ قهوة عنده خير بقااااااااا أو من أثرياء القوم ههههههههه.
السؤال نمبر إيت - تمانية يعني -
- ليه وإحنا فـ الإمتحان زي كدا وفـ آخر ثانية من الوقت بنتخانق مع الملاحظ ونقعد نشد فـ الورقة لحد ما توشك إنها تتقطع علشان نكتب كلمة واحدة؟؟؟؟ مع إن الورقة معانا بقالها 3 ساعات وممكن نكون آخر نص ساعة دي ما بصيناش ليها أساساً ... ليه آخر ثانية بتحلى ورقة الإجابة؟؟؟ ههههههههه يكونش الإلهام بينزل فـ آخر ثانية هههههههههههه.
السؤال نمبر ناين - تسعة يعني -
- المعروف إن الطيارين بيلبسوا السماعات بتاع الضغط حفاظاً ودانهم زي كدا
أتمنى يكون البوست جننكم زي ما الأسئلة دي خاوتاني، وأي حد عنده إجابة لسؤال منهم يزقلهالي فـي تعليق.
وأتمني أكون بالأسئلة دي رسمت ولو بسمة صغيرة كدا علي شفاهكم.
دمتم سالمين سيداتي، آنساتي وسادتي