تاجين دين عليا ... أجاوبهم من عنيا

قراء المدونة الأعزاء... مرحباً بكم من جديد
قبل ما أفصل النت بفترة حلوة كدا كان جايلي تاجين من د. نهال جمــال (فري كيلر) هنا في البوست دا ، وطبعا وعدتها لما أوصّل النت تاني هبقا أرد عليهم بالمرة يكونوا ناموا واتنسوا أرجع أنا أخليهم يُبعثوا من جديد...
بدون رغي كتير خلينا نشوف التــــاج الأولاني لأني أعتقد البوست هيبقا طويل جداً..
وشكراً يا نهــال هانم عالتديسة النار دي(وش متضايق وزعلان خااالص مااالص).
التـــاج الأول: مكون من سبعة أسئلة:
السؤال الأول: بدأت التدوين إمتى؟؟ ودخلت العالم ده إزاي؟؟
الإجابة: بدأت التدوين في يوليو 2007 كنت قبلها متابع مدونات كتير من ضمنهم مدونة زميل ليا ف الكلية هو أخي الحبيب أدهـــم الشهابي صاحب مدونة من أدهم عن أي شيء... وطبعاً زيي زي معظم الناس من أول ما دخلت عالنت كنت بحلم يبقالي إيميلي وموقع خاص ليا أكتب فيه كل خواطري فشوفت الفكرة مع أدهم وكَون أدهم Web Designer فكنت أعتقد ان المدونة دي محتاجة شغل فرونت بيج ودريم ويفر و HTML وكدا.. لكن في يوم كنا راجعين أنا وأدهم من الكلية وراكبين الميكروباظ بتاع الزجازيج وراجعين نعشق وندوب ونعيش مع بعض إحم إحم عفواً راجعين ميت غمر ففتحنا فـ موضوع المدونة فقلت لأدهم أنا نفسي يكون عندي مدونة زي بتاعتك قاللي ما تعمل قولتله بس أنا معرفش كويس في تصميم صفحات الويب قاللي المدونات مش محتاجة حاجة مجرد ريجيستراشن وشوية مهارات هتعرفها بالتدريج وأنا معاك، طبعاً روّحت جري عالكمبيوتر عملت المدونة وكان أول بوست فيه شكر للجميل أدهم الشهابي لأن من لا يشكرالناس لايشكرالله وبجد كان نفسي يبقا عندي حاجة كدا.
السؤال التاني: إيه كان إنطباعك ف البداية؟؟
الإجابة: حسيت إني في عالم كبير جداً وشيق جداً جداً وبين طبقة محترمة من المثقفين وأصحاب الفكر في مختلف المجالات .. فكان لازم أسايرهم وأخليهم يشوفوا آرائي وأحاول أثبت نفسي فـ وسطهم. وطبعاً كان شعور جميل جداً إني أصبح لي موقعي الخاص واللي من خلاله أقدر أكتب آرائي وأشوف إنتقادات الناس وآرائهم البناءة في تعليقاتهم على موضوعاتي واللي أكيد بتحسن من أسلوبي الأدبي بشكل عام والدليل على كده إن كل بوست بحس إن أسلوبي تطور عن البوست السابق إلى حدٍ ما.
السؤال الثالث: مين أكتر حد بتحب تعليقه عـ البوست الجديد؟؟
الإجابة: بشكل عام أنا بحب التعليقات جداً زي ما وضحت ف السؤال السابق لأني بحس إنها بتطورني وبتدفعني لتطوير أسلوبي وموضوعاتي وكمان التعليقات بتخلق جو تعارف ممتاز مع ناس أصحاب فكر محترم ... لكن كإجابة للسؤال .. والله أنا بحب تعليقات نااااس كتير جداً وممكن أنسى حد ويزعل بس طبعاً في ناس كتير بحس ببهجة وإنبعاج لا شعوري بيؤدي إلي إنقباضات متتالية ف الحجاب الحاجز بتشعرني بالسعادة والناس دي زي أحمد الصباغ، زهرة الجنة، ضي القمر، كيارا، لميس خاطر، سـول وسبر، وطبعاً طبعاً مننساش محاسن باشا صابرالنجمة المشهورة، نهال جمــــال بس حالياً مش طايقها بسبب التدبيسة دي وكنت ممكن أنفض للتاجين بس مبحبش يبقا عليا ديون لحد. وغيرهم كتير والله زي طبعاً والدنا العزيز عم المدونين كوووولهم أبوخالد البورسعيدي، البت أجدع بنوتة برضو، بنت الشمس وعلااااء محموووود يوووووه دووووول كتير ومش عاوز أنسى حد علشان ما يزعلش- واخدين بالكو عملت نفسي نجم ف برنامج فـ ثانية هههههه -
السؤال الرابع: إيه أهــــم حاجة إتعلمتها في عالم التدوين؟؟
الإجابة:
سؤال صعب شوية .. إتعلمت حاجات كتير...

- مثلاً إزاي أعامل اللي قدامي.
- إتعلمت إن الدنيا لسه بخير وزي ما في ناس وحشة في ناس كويسة جداً.
- إتعلمت إني أفهم وجهة نظر اللي قدامي وجايز جداً أكون أنا اللي غلطان.
-قدرت أطوّر جدا من مهاراتي في كتابة الشعر بصفة عامة والشعر العامي خاصةً.
-وغيرها كتيرررر وكتيرررر بجد التدوين فوايده كتير كفاية إنك عالأقل بتقدر تقول اللي بتحس بيه ومتكتموش جواك.
السؤال الخامس: إيه أكتر حاجة كرهتها؟؟
الإجابة: مممممممم
- في الحياة عامةً .. الكذب والبجاحة والغباااااااااء .
- وفي عالم التدوين .. طبعاً قلة الذوق وأصحاب التعليقات الوضيعة والإنينيموس الخبيث -كمــا قال الصباغ أفندي-
لدرجة إن مرة واحد دخل يقولي شوف مدونتك ف اللينك ده ، دخلت عاللينك لقيت واحد معرفوش بيشتم عليا فدخلت أعاتبه بكل إحترام لقيت اللي إشتغل سب فـ الذات الإلهية و فـ الرسول وعبط رسمي من بتاع الجديان دا.. عارفينووو؟؟ ههههههه
يمكن ده أكتر موقف كرهته في عالم التدوين... دا طبعاً غير موضوع البهائي واللي كان السبب في زعلي أنا وصديق ليا - بدون ذنب مني - يمكن لحد دلوقتي.
السؤال السادس: حاسس إن التدوين ليه تأثير؟؟
الإجابة: من أول ما عرفت التدوين وأنا بقول كلمة .. ودايما برددها وإفتكروها: المدونين هما اللي هيغروا شكل مصر...
السؤال السابع: تهدي التاج لمين؟؟
الإجابة: ههديه لناس لو إتبعتلهم قبل كدا ما يجاوبوش عليه لكن لو جديد هنتظر إجاباتهم زي: أجدع بنوتة ، سول وسبر ، علااااااء محمود (وعجبي)، رامي(برنس فوريفر)، د. عمرو فاروق(كلام من القلب) وطبعاااااااا لأي حد يحب يجاوب عليه.
أما عن التـــاج الثاني- وحسبي الله ونعم الوكيل- : فدا مكون من 9 أسئلة:
نجاااااوب التاااااج التااااني... آه ياااااني
السؤال الأول: إذكر ستة أسرار لا يكتشفها من يقابلك لأول مرة؟؟
الإجابة:
واحد- غلباااان من جوايا جداً وأقل كلمة بترضيني بالرغم إن اللي ما يعرفنيش يقول عليا فرعون.
إتنين- غريب الأطوار أو Moody يعني تبع الغزالة ممكن تلاقيني راااايق ولذيذ ومسلي-أحسن من بجنيه لب- وأبقا رخم وفـ ثانية أقلب لو الغزالة إتعكننت.
تلاتة- مبحبش أشيِّل اللي قدامي همي وبحب جداً أشوف الناس فرحانين ومزأططين ومبعرفش أقول لحد قاصد خدمة لأ لوأقدر وبساعده لآخر قدرتي.
أربعة- مـاليش فـ الكورة بس أحب جداً أشوف الماتشات الكبيرة زي الأهلي والزمالك مثلاً وطبعاً أهلاوي بس ما بتعصبش إلا لما بشوف زملكاوي متعصب... وطبعاً بتابع ماتشات المنتخب مع أي فرق برة. وبحب جداً جداً كأس بطولة أفريقيا ... بحس إن الـ 85 مليون مصري بيلعبوا مش بس 11 لاعب.
خمسة- في حاجة غريبة جدا بعملها معرفش ليه!! بجمع كروت الشحن بتاع الموبايل لما بشحنها ف درج عندي ههههههههه بس تقريبا علشان أقعد أقر على فودافون وأقول شوف يا أخي بيكسبوا قد إيه من الهوا ههههههههههه.

ستــة- عندي قوة فراسة إلى حدٍ ما لا تُخطىء... كثيراً ما أحدد شخصية الفرد الذي أتعرف عليه وأفاجأ بعد فترة بالجميع يجمعون على الفكرة التي كونتها عنه منذ فترة.
السؤال الثاني: سبع حاجات نفسك تعملهم؟؟
الإجابة:
واحد- أخلَّص أم الكلية دي إتخنقت منها بجد.
إتنين- أسافر برة لأن البلد دي بالرغم من إني بحبها إلا إني بجد تعبت منها ومن الفساد اللي فيها وطبعاً هسافر فترة وهرجع -مش طول عمري يعني-.
تلاتة- نفسي آخد والدتي ونروح سوا نحج ونزور قبر الرسول -صلى الله عليه وسلم-
أربعة- نفسي أتجــــــــ ودا مهم جداً ـــــــــــوِّز
خمسة- نفسي يكون فـ إيدي القرار وأكوِّن جيش عربي وأهجم عالإسرائيليين ما أخليش منهم واحد عايش.. الخنازير ولاد الكلاب.
ستـــة- نفسي أقعد مع الشيخ محمـــد حســان والشيخ مشاري بن راشد ساعة لوحدنا.
سبعة- نفسي لما أموت .. الناس تترحم عليا ويقولوا ربنا يرحمه.. كان محترم.
السؤال الثالث: سبع حاجات معرفتش تعملهم؟؟
الإجابة: هو إيه البوست السبعاوي دا !!؟
واحد- معرفتش أقول لأول واحدة حبيتها بحبك
إتنين- معرفتش أذاكر السنة اللي فاتت وطبعاً قصرت
تلاتة- معرفتش أكمِّل دايت ورجعت زيدت تاااااني ف الوزن
أربعة- معرفتش أتعلم السباحة، هموووووت وأتعلمها هيا وسواقة السيارات اللي هتعلمها قريب ن شاء الله.
خمسة- مواقف رشوة كتير في تخليص أوراق معرفتش أقول قصادهم لأ وإلا الموضوع مش هيخلص فـ سنينه.
ستــه- شفت خناقة فـ عين شمس إتنين موتوا بعض بالسنج قدام عينيا ومقدرتش أنا ولا أي حد نحوشهم.
سبعة- شوفت واحد واقف على شريط القطر والقطر موِّته وقعدت أزعّق مدة كبيرة وأقولة إرجع يا عم ومقدرتش أمنعه.
السؤال الرابع: سبع حاجات دايماً بتقولهم؟؟
الإجابة: برضوووو سبعة يا خراااااابي
واحد- دايما لما حد يغلط فيا بقول لنفسي خليك الأحسن.
إتنين- دايماً بدعي لوالدي ربنا يرحمه ويُدخله فسيح جناته.
تلاتة- إضحك للدنيا تضحكلك
أربعة- بحب أقول الكلمة دي كتير.. إديها مية تديك طراوة.. هههههه ... عاملة زي من جـــد وجـــد ومن زرع حصـــد.
خمسة- اللهم أنت ربي لا إله إلا أنت .. خلقتني .. وأنا عبدُك.. وأنا على عهدك ووعدك ما استطعت.. أعوذ بك من شر ما صنعت .. أبوء بنعمتك عليّ وأبوء بذنبي .. فاغفرلي ..إنه لا يغفرُ الذنوبَ إلا أنت.
ستــة- كـن كــــالنخيل عن الأحقاد مرتفعاً.. يرمى بصخر فيلقي أطيب الثمر
سبعة- لا تكن كالطير المغرور.. الذي كلما ارتفع... قلّ في عيون الآخرين.
السؤال الخامس: سبع مشكلات في حياتك ممكن تحلهم بالفلوس؟؟؟
الإجابة: برضووووو سبعة أنا خلااااص تعبت وهختصر
- الـ خمس عيون بتوع أي دكتور
ع---> عروسة ع--->عيادة
ع---> عربية ع---> عمارة
ع---> عزبة ههههههههههههههه
- ضيف عليهم زيارة دول كتيرة من العالم زي أسبانيا والنمسا وفيينا وأمريكا وتايلاند والصين ولبنان بخااااصة بيروت.
- أعمل مائدة إفطار للناس الفقراء اللي يستحقوا في رمضان طووول الشهر.
السؤال السادس: سبع أماكن بتحبها؟؟
الإجابة: يوووووه برضو سبعة .. طايب ياسيدي خود عندك
- وسط البلد فـ القاهرة من بعد العشاء.
- كورنيش النيل بعشقه.
- الأنفوشي، المنتزه ، المعمورة فـ إسكندرية حبااااايب قلبي.
-الحسين فـ القاهرة مع ناس أصحابي.
-أقعد قدام البحر في الصيف بس فـ مناطق مش زحمة زي سما العريش مثلاً.
السؤال السابع: أشخاص بتحبهم غير بابا وماما وإخواتي؟؟
الإجابة: وإشمعني دول مش سبعة ههههه هات نوتة ودون ورايا:
- الرسول -صلى الله عليه وسلم- والسلف الصالح -عليهم رضوان الله.
- بحب جداً جداً ولاد إخواتي: حنين العسل (سنتين)، سيف المعلم الكبير أوي أوي(9 شهور).
- أصدقاء الجامعة المقربين لقلبي جداً جداً محمد خِضر، أحمد عصام الزُرقاني.
- مدونين .. ودول بقا كتير جداااااا وأشهرهم طبعاً وأحبهم لقلبي اللي في الليست بتاعة مدونات حبايبنا عالسايدبار بتاع مدونتي.
- الراحل العظيم صلاح جاهين بعشق كلماته العذبة واتعلمت وبتعلم منه الكثير ربنا يرحمه ياااااااااارب.
- الشيخ الشعراوي و محمد حسان ومشاري بن راشد حفظهم الله
- الزعيم الراحل جمال عبدالناصر كان في عهده لمصر كرامتها اللي مش ممكن حد يقدر يدوس عليها.
- في عالم السينيما عادل إمام بحب دماااااااغة وخفة دمه زماااااان.
- محاورين بحب عمرو أديب ومحمود سعد بحب ذكاؤة(نمس).
- دكاترة ف الكلية عندنا... د. محمـــود شعلان -رحمه الله- ، د.إبراهيم العزوني ، د.عصام نور الدين ، د. أحمد جابر الحاج (دكتور قلّما تلاقي حد في الزمن ده بإحترامة وبشهادة الجميع عليه). و فـ الكلية كمان بحب عم صابر في حرس الجامعة راجل محترم جدا وكل الناس بتحبه.
- في ناااااااااس كتيررررر كويس ان السؤال ما حددش سبعة.
السؤال الثامن: مدونين بتحب تقرالهم؟؟
الإجابة: اللي في مدونات حبايبنا عالسايدبار بتاع مدونتي.
السؤال التاسع: تمرر الواجب لمين؟؟
الإجابة:

طالما التاااج ده سبعاااوي يبقا همرره لسبعة:
مصطفى مغربي (غني يا بهية)، آبي هانم بتنجاني(كوب آبي وخرفانها)، سوسو غريب (المفقوعة مرارتها) دا لو عندها وقت، princess، زهرة الجنة ، لميس خاطر(زوايا السحاب)، واحد من الناس.

كفاية كدا لأني هنجت
دمتم سالمين