النهاردة الثورة يا رجااااااااااااااالة

السلام عليكم ورحمة الله وبركاتة

زوار المدونة الأعزاء ... مرحبا بكم من جديد ... أعتذر عن انقطاعي الفترة السابقة عن المدونة وعن زيارة مدونات الزملاء المدونين وهذا بسبب الإمتحانات المباغتة اللي بتنزل علي الواحد زي الرعد ... تخيلوا الواحد كدا يبقا ماشي في أمن الله يلاقي زوووو إمتحان في وشة يخلص منه يفاجأ بإمتحان تااااني يوم وتاااالت يوم ، و رابع يوم دا حدوته لوحده هههههههههه كان ورايا إمتحانين في يوم واحد تخيلوا !!!!!!!!! ههههههههههههههههه جوز إمتحانات في يوم واحد تقولش جوز جزم ومش أي جزم جزم بنص كمان -مش برباط يعني- لدرجة إني دخلت عالدكتور بتاع الإمتحان الأولاني الشفوي بتاع الأنف وأذن فبقولة يا دكتور والله ورايا حالاً إمتحان روماتولوجي باطنة - دي المادة التانية إمتحان عملي بنشخص حالة وبنتسئل عليها - رد عليا قائلاً مالي وأنا مالي وأنا مالي بالأحزان وأنا مالي وقاااام نافخني في الأسئلة آه والله نفخ نفخ يعني مش أي كلام وأنا خارج كنت بغني في سري- رداً علي مالي وأنا مالي وأنا مالي بالأحزان وأنا مالي- قائلاً مع السلامة مع السلامة يابو عمة مايلة... طبعا أخدت تاكسي -لأن الراجل المستبد بتاع الأنف وأذن عرف إني متأخر ومستجل فقعد يأخرني مزاج عنده كده زي ما يكون غاوي يغلس وخلاص - وطرت علي الامتحان التاني لقيت المعيد بينادي فين محمد أسامة الجوهري يا جدعااااااااااااان طبعاً في آخر ثانية وانا بنهج وجايب بنزين مش عرق وبقوله نعم قاللي كنت فين يا بيه قولتله بنفس طريقة كلامه حضرتك شايفني بنهج وجايب بنزين أهو يبقا لسه جي ولو دققت شوية هتلاقي معني اني بنهج يبقا كنت بجري ياباشا قاللي طب يلا يا لماضة الدكتورة خلصت كل زمايلك وما فاضلش إلا انت ومستنياك علي نااار-علي أساس إنها بتحلق ليهم ولا ايه مش فاهم أنا ولا بتخلص عليهم - طبعاً أخدت نفس عميق ودخلت عالدكتورة سلامو عليكم لقيت اللي وشها قلب ألوان الطيف وقالتلي كنت فين؟؟ أنا قاعدة مستنياك مخصوص وعاوزة أروح وانت اللي ناقص -تلاقيها كانت عاوزة تطبخ ولا حاجة معزورة الست برضو- حكيتلها الموقف قالتلي طايب وقامت خبطاني سؤال مباغت وقّف شعر راسي فقولتلها ليه القسوة دي؟؟ مع ابتسامة بسيطة لتلطيف الجو قامت ضحكت وقالتلي إنت لسه فيك نفس تضحك دانتا فظيييييييييييييع - عرفت منين دي إني فظيع ألا هي فظيع دي شتيمة ولا إيه؟؟ - هههههههههه افتكرت مقولة واحد صاحبي وكنت هموت وأقولها الله يحظّك يا فندم خ خ خ خ خييييييه بس لو كنت قولتها كدة كنت هطرد رسمي فهمي نظمي وهاخد زيرو في الامتحان منعاً للزيرو وحقناً للدماء كتمت الكلمة في نفسي وجاوبتلها عالسؤال انفرجت اساريرها نياهاهاهااااااا - ايه أساريرها دي؟؟ ولازم تنفرج ؟؟ ما ينفعش تعمل زاوية قائمة حتي؟؟- وانشكحت آخر إنشكاح وقالتلي شكلك شاطر بصيت لها بازبهلال لا إرادي وقولت في نفسي دي عبيطة دي ولاإيه ؟؟ استني يا حاجة تلات ثواني وهتطرديني ماهو لو تبطلي النبر بتاعك دا هنمشي كويس ههههههههههه . قامت قالتلي شخصلي الحالة اللي قدامك مسكت الست ست عجوزة عندها حبة حلوين كدا ييجوا 80-85-90 سنة طبعاً الحالة واضح انها شلل في العصب المخي السابع . بس طبعا التشخيص لازم أقول كل حاجة فلازم أسأل الست وأقولها تعمل حاجات قعدت اقولها ارفعي حواجبك تفتحلي بؤها - أقوم أنا لاطم علي طول وقايلها ركزي يا حاجة معايا تقولي لاموأخشة يابني أشلي مش شامعاك أقولها ولا يهمك وفي نفسي خلينا نخلص في اليوم الطين ده ،طبعاً من ملامح الزهق اللي كانت علي وشي بسبب حرارة الجو وصعوبة التعامل مع الست الدكتورة تعاطفت معايا وفي النهاية شخصت الحالة صح وجاوبت علي أسئلتها فابتهجت وانشكحت وانفرجت اساريرها تاااااني-مع انها كانت لميتهم بس رجعوا انفرجوا تاااني- وانبسطت مني وقامت رزعااااني سؤال لوحني ما حطيتش منطق أول مرة اسمع عن حاجة كدا بتقولي دا آخر سؤال تجاوب عليه تاخد الفول مارك وتمشي -هتديهالي في كيسة ولا ايه مش عارف أنا - فابتسمت ابتسامة عريضة تتسع لما بين ميت غمر والزقازيق وقولتلها طب ولو ما جاوبتوش قالتلي لا هتجاوبوا قولتلها ورحمة سيدي المنصوري ما أعرفه هو أنا لو عارفه هعز عن حضرتك حاجة يا دكتورة ماتت علي نفسها من الضحك قولنلها ما جاتش عليه بقا ضحكت وقالتلي انتا دانتا مصيبة هتبقا دكتور نصاااب نياهاهاهاهااااااا وقامت مدياني الورقة بتاعة الدرجات وقالتلي حط درجتك هههههههههههههه أول مرة آخد فول مارك في امتحان شفوي من يوم ما دخلت الكلية دي ههههههههههه قالتلي يلا عاوز حاجة تاني قولتلها دا القعدة مع حضرتك ما يتشبعش منها ماتت علي نفسها من الضحك وقالتلي امشي يااااض امشي بدل ما أنقصلك الدرجة قولتلها وعلي ايه الأرزاق علي الله سلامو عليكم من كتر الضحك ما قدرتش ترد السلام . رجعت البيت وطبعا بذاكر لامتحان يوم الخميس ورحت الامتحان وامتحنت واتشخرمت- نفس معني اتنفخت بس في رواية أخري- وأخدت باقي الخميس أجازة ورجعت زاكرت الجمعة لامتحان السبت ورحت الامتحان وطبعا يوم السبت أجازة مافيش مواصلات ولا نيلة بعد غلبة وصلت لقيت دكتور التروبيكال بيقول : ما فيش امتحان،أجلته للأحد الأسبوع القادم طبعا الدم طلع في نافوخي ورديت: طب ما تقولوا من الاول يعني نتنفخ وفي الاخر ما نمتحنش قاللي مزاجي ما امتحنكوش قمت ماشي وطبعا بضرب أخماس في أسداس . يوم الأحد نزلت القاهرة بخلص شوية حاجات في شقة جوز أختي رجعت اتناااااشر ونص بالليل . بعد كده قضيتها نوووم . النهاردة 23 يوليو يوم الثورة أنا سعيد جدا سعيد خالص سعيد بغبااااء سعيد بدرجة تغيظ . أخيراً جالي يوم أنتخة أأنتخلي يومين علشان الأسبوع الجي عندي امتحانات مباغته برضوووو . النهاردة فعلا ثورة ،ثورة علي الامتحانات المباغته هأنتخ لولولولولي وهتفرج علي رد قلبي هتفرج على علي وإنجي وتحيا الثورة

بجد ما بيحسش بطعم الراحة الا اللي كان تعبان وما بيحش بطعم الأنتخة الا اللي كان منفوخ نياهاهاهاهااااااااااا

طبعا بعد الامتحانات السابقة جالي حالة جفاف فكري فظيع حاولت أعالجة ما عرفتش مش نافع معاه محلول الجفاف نوهائي نوهائي فكان لازم أكسر الجفاف دا بأي بوست علشان العملية تطري وتاخد وتدي في الحيلاوة مع بعضيها.

أعتذر للمرة الثانية عن انقطاعي الفترة السابقة لكن ان شاء الله لن يكون هناك انقطاع نوهائي نوهائي.

تحياتي للجميع

دمتم سالمين

د. محمد الجوهري

ملك ميت غمر والسودان والكونغو الدكتاتورية وزيمبابوي وأنجولا وتنزانيا