ابتسامة صباحية بس مش صباحية قوي

زوار مدونتي الكرام السلام عليكم ورحمة الله وبركاته ، أتناول اليوم موقفا مضحكا حدث اليوم . كما أشرت في البوست السابق أن الجو بارد اليومين دولا ومطر غزير وبتاع بيتهيألي ملاحظين الحكاية دي واللي مش واخد باله........ ربنا يتولاه بقا هنعملوا ايه المهم امبارح الدنيا شتيت أكتر من المرة اللي فاتت لدرجة اني كنت ناوي أنزل الزقازيق وكسلت صراحة بسبب الوحلة اللي في الشوارع فقلت أأجز . كانت بتشتي بالليل فنمت بقا في البرد ده ويا سلاااااام علي النوم في البرد نمت بقا وقعدت أغني والناس في عز البرد بتجري تستخبي وانا كنت بجري واخبي نفسي تحت البطانية وأخدت أغط في سبات عميق .. عميق عميق يعني مش أي كلام ، فجأه وأنا نايم لقيت ميكروفون الصبح كده -بس مش الصبح قوي يعني الصبح الساعه اتنـــ2ــــين الضهر كده- راجل ورانا اسمه عم الشوربجي دا كل اللي اعرفه عنه معلق ميكروفــون مــزعج فوق السطوح بتاعتهم لما حد بيحتاج ينادي علي عيل تايه ولا فــرخـة ضـايعه ولابتاع بيروحوله ، لقيته الصبح فتح المايك وشغااااال وده نص- بفتح النون وليس بضمها - اللي قاله بس كان نفسـي في ام بي ثري ساعتها علشان أسجله وتشوفوا اللي بعانيه كل لما فـرخـة ولا عيل صغير ولا أي هباب يضيع ، الراجـل زعلان ان الميه قاطعة والدنيا شاتيه كتير فأخذ المايك وأخد يصيح قائلا " ياناااااس ايه القرف ده دا عيشه تجنن وتقرف بقا تبقا الدنيا شاتية بالطريقه دي والناس غرقانة في المية والمية قاطعة ياناس ارحمونا والله ما عندكو دم مش عارف صراحه أقولكم ايه" وقال طبعا كلام تاني وكله شتيمة نفسي أعرف كان بيكلم مين طبعا انا كنت نايم أغط في سبات عميق زي ما قلتلكم -حلوة أغط دي- بس طبعا اللحن الممتع بتاع عم الشوربجي صحاني فابتسمت ابتسامة بلهاء تتسع لما بين ميت غمر والزقازيق وأخذت أبرطم برطمة- دا مفعول مطلق من فعل برطم، يبرطم - ونزلت لماما لسه هقولها ايه رأيك لقيت اللي بتقولي ايه دا هو الشوربجي صحاك بركه يا جامع خلاص لما أعوز أصحيك هروح للشوربجي أقوله عندي فرخة ضايعة وأخليه ينادي بدل ما بتوجع قلبي علي ما تصحي طبعا مت علي نفسي من الضحك ... وانتهي المشهد أشكركم علي صبركم علي قراءة الموضوع .

والآن أترككم مع هذه الصور وأتمني أن تحوز علي اعجابكم.

حتي الحمير ياربي مش عاجبها البني آدمين

حمام .. حمام يعني مش أي كلام

تحياتي للجميع،

دمتم بسلام ودامت ابتساماتكم.

د.محمــد الجـــــــــوهـــــــــري

ملك ميت غمر والسودان والكونغو الدكتاتورية وزيمبابوي وأنجولا وقريبا تنزانيا .