يلا نبيع .. يلا نلم فلوس كتير .. بلا شهداء بلا بطيخ

عاطف بيه عبيد رئيس الوزراء السابق

قراء مدونتي الكرام مرحبا بكم من جديد .آسف يا جماعة علي التأخير واني ما بقيتش أعمل بوستات كتير زي زمان بس والله انقطاع النت هو السبب . وبأكد اني والله ما نسيت المدونة وعامل الموضوع دا من سايبر مخصوص علشان بس الناس ما تنسانيش . والآن مع الموضوع. أول امبارح اللي هو تحديدا يوم الاثنين 30/3وبالظبط الساعه 3 صباحا كنت قاعد قدام التليفزيون فمسكت الريموت كنترول-عادي يعني- بقلب وبتاع لقيت برنامج علي قناة دريم 2 ما اعرفش ليه جذب انتباهي البرنامج اسمه الطبعة الأولي البرنامج زي نشرة اخبار كده ومقدم البرنامج ما اعرفش اسمه . المهم هو بيقدم تخاطيف كده لقيته قال خبر جذب انتباهي قوي ...قام السيد خالد الذكري /عاطف عبيد رئيس الوزراء الاسبق بالموافقة علي بيع قطعة أرض من سيناء الغالية بجوار طابا - وحط مليون شرطه تحت طابا- بعد احالة الموضوع للسيد/ ممدوح البلتاجي وزير السياحة سابقا بعد التحري تبين أن المستثمرين معظمهم اسرائيليين ومنهم من يعمل في الجيش الاسرائيلي ومنهم من يحملون جنسية قطرية وهم من اختبأوا خلف عباءتهم لخداع حكومتنا .أكد السيد ممدوح البلتاجي ان المستثمرين كما يدعون اسرائيليين ولكن السيد/ عاطف عبيد خالد الذكري وافق علي بيع الارض وقام بالتأشير علي ذلك ... الآن اذا رفضنا البيع هناك شرط جزائي 300 مليون دولار أي ما يعادل 1600 مليون جنيه مصري أو نبيع الأرض ونبيع معها دم كل شهيد ونبيع الاستقلال وسمعني سلام أحلف بسماها وبترابها وربنا يخلد ذكراك يا عاطف يا عبيد .... تصدقوا اني اتفقعت يا جماعة لما سمعت الخبر دا شوفوا الـ 1600 مليون جنيه دولا كانوا ممكن يساهموا في بناء كام مدرسة ولا مستشفي .... لا ازاي شاطرين يقعدوا يلموا عشان مستشفي سرطان الاطفال 57357 كاااام سنه ويقولو عشان مستقبل ولادنا فين مستقبل ولادنا دا ولا ممكن يبنوا كام مصنع يشتغل فيه كام ألف شاب بدل ماهم مش لاقيين ياكلوا .... بجرة قلم عاطف افندي عبيد باع لليهود أراضينا أو خسرنا 1600 مليون جنيه وسمعني سلام لو سألتك انت مصري تقولي ايه؟؟ مين اللي يقف للفساد دا ؟؟؟ مين اللي يقف لعاطف عبيد وغيره واللي بعتبر كل واحد منهم خاين وعميل ؟؟ المفروض دولا يتسألوا أمام القانون ليه وافقت وأشرت قبل وزارة الخارجية ما توافق وبكده مكنتهم من انهم يرفعوا قضية ضد الحكومة المصرية ويكسبوها ؟؟ أنا عايز واحد يقوللي نحارب الفساد ..أهو الفساد أهو ...فين اللي هيقوموا ليه ؟؟ للأسف مصر بقت دبيحة وكل واحد بيلحق ياخدله حته ويجري وربنا يستر علي الأيام الجاية

دمتم بسلام

د.محمد الجوهري

ملحوظه هامة جدا ووددت التنويه عنها ومساندتها:

يوم اليتيم العربي دا اللي خصصوله أول جمعة من شهر ابريل اللي هيا الجمعة الجاية يا جماعة أنا طبعا مع الاهتمام باليتيم زي ما رسولنا الكريم - صلى الله عليه وسلم- قال: أنا وكافل اليتيم كهاتين في الجنة وأشار باصبعيه السبابة والوسطى .... ولكن الاهتمام باليتيم ما يبقاش أول جمعة من أبريل المفروض كل يوم وكل شهر وعلي طول يعني ما نخليش اليتيم زي عيد تحرير سينا ولا عيد شم الفسيخ .. تحياتي
يارب يكون البوست عجبكم