نحن غراباا عبد .. عبد

قراء المدونة الكرام ... مرحبا بكم من جديد .. في البداية أود أن أشكر كل من قام بالتعليق علي موضوعاتي بصفة عامة والموضوع السابق بصفة خاصة وموضوع اليوم بصفة أخص - شدة وفتحة علي حرف الخاء - من اللي فاتت ... اليوم أسرد لكم موقفا طريفا حدث لي العام الماضي أضحكني كثيرا وكلما أتذكره يضحكني ... أدام الله ابتساماتكم... يوما ما - مش فاكر امتا الصراحة - في العام الماضي شيء الهي حصل خلاني صحيت بدري الساعة 6.30 صباحا وأحاول أرجع أنام تاني...أبدا .. ايه دا انا كدا هصحي بدري .. التاريخ هيحسبها عليا مش ممكن ... وبما اني خلاص فوقت ... صحيت غسلت وشي لقيت ماما واقفة ليا وبتقولي أزغرط ايه دا تكونش افتكرت ان وراك كلية المفروض تصحالها بدري ... فرديت عليها بكل برود ... يا ماما كل يوم نوم نوم وصحيان متأخر قلت النهاردة بس أصحي بدري كنوع من التغيير بس متزعليش نفسك من بكرة هرجع انام تاني وصحي متأخر المهم بس ترضي عنا يا جميل ... فرأيت في عين أمي نظرة ازبهلالية حادة خفت تزقلني بسلة الزبالة قلت علي ايه انسحب أحسن فقولتلها متزعليش يا ماما انا بهنذر معاكي ايه ما أهنذرش ولا ايه؟؟ ... قالتلي اخفي يالااا عندي السكر مش عايزة يجيلي ضغط كمان قولتلها بعيد الشر عليك يا جميل انشالله اللي يكرهوكي زي كذا وكذا - طبعا كذا وكذا دول اسامي ناس مش بيحبوا ماما ولا ماما بتطيقهم - ... وتركتها وتوضأت أحلي وضوء وصليت أحلي صلاة ولبست هدومي - طبعا بعد ما قلعت هدوم البيت - واتصلت بصديقي من البلد معايا في نفس الكلية العزيزة بنت الكلب اللي أنا فيها اللي هو أســعــد - اتكلمت عنه قبل كدا في الموضوع دا - وقلتلة هعدي عليك علشان نروح الزجازيج سوا قاللي علي بال ما تعدي أكون جهزت نفسي ... وفعلا رحت لأسعد وسبحان الله علي غير عادة أسعد خالص لقيته جاهز ومستنيني وبيقولي انت اتأخرت ليه؟؟ - أسعد دا كل ما أروحله بالطريقة دي ألاقيه لسه نايم أقعد أصحيه وعلي بال ما يلبس ويفطر ودياوله يكون الراوند خلص - المهم ..مشيت مع الأخ أسعد وركبنا الميكروباظ وهووب بقينا في ميت غمر ونزلنا من الميكروباظ وركبنا ميكروباظ تاني رايح الزجازيج - شغلانة ميكروباظات هيا - وقعدنا نرغي في كلام مالوش لزمة (لغو حديث يعني) .. نسيت أقولكم عن أسعد انه شاب بسم الله ماشاء الله ملتحي وخابط حته دين دقن مع انه شعر وجهه وجسمة خفيف.. المهم ... هوووب خلاص نحن علي مشارف مدينة الزجازيج ..المضيفة نادت وقالت : نحن الآن علي مشارف مدينة الزجازيج برجاء ربط أحزمة الدزم والانتظار قليلا. وانتا داخل مدخل الزجازيج بقا زي ماهو باين في الصور كدا تلاقي التمثال اللي هناك دا اللي هو تمثال مين؟؟ تمثال رمسيس يا عمو .. شاطرين ... يادوب ثواني وهننزل ببص لقيت واحد صاحبي بيتصل عالموبايل بقولة انت فين بيقولي لسه واصل الزقازيق قلتله انت فين بالظبط قاللي جنب تمثال رمسيس قلتله ثواني واجيلك احنا هننزل من الميكروباص أهو . فبقول لأسعد دا صاحبنا كذا كذا - مش فاكره وربنا - قاللي هو فين ؟؟ قولتله مستنينا جنب تمثال رمسيس قاللي علي فكره دا صنم بقوله يابني التمثال دهوه وبشاورله علي تمثال رمسيس اللي في الصورة لقيته مصمم انه صنم ... فقلت أشوف ماله دا بقوله صنم ايه يابني قاللي ايوه صنم ... قولتله ليه شايف الناس بتحج حواليه وبتقول نحن غرابا عبد .عبد هههههههههه لقيته ضحك وسكت ... الغريب في الموضوع ان أسعد ياجدعان لحد النهاردة مصمم ان تمثال رمسيس دا صنم ... وكل مره نتكلم في الموضوع دا اقعد أقوله يابني هبل - بضم الهاء - والحاجات دي كانت أصنام عشان كان في ناس بتعبدها النهاردة احنا في القرن الواحد والعشرين مافيش حد بيعبد أصنام ولو في ناس بتعبد أصنام مافيش حد بيعبد تمثال رمسيس - ولو ان اللي اتعمل عشان نقل تمثال رمسيس فـي القاهرة من ميدان رمسيـس للمتحف المصـري يعتبر اكتر من عبــادة والناس يقولوا دا ملـك ولــــه احـترامـه سلاماااات يا ملــك - ... لكن برضو أسعد مصمم انه صنم. طب أقوله ايه ؟؟ بسكت علي طول لأني بتعب من الجدال .. بس برضو أسعد دا عسل هههههههههه .

أتمني يكون البوست عجبكم وانتظروا فالقادم أجمل ان شاء الله.

أدام الله ابتساماتكم

تحياتي ودمتم سالمين.

د. مـحمـد الـجـــــوهـــــري

ملك ميت غمر والسودان والكونغو الدكتاتورية وزيمبابوي وأنجولا وتنزانيا.