ياسر الشوربجي.. من أطرف الشخصيات في حياتي

السلام عليكم ورحمة الله وبركاته

قراء مدونتي الكرام

مرحبا بكم من جديد. معلش بتأخر في البوستات بس والله كان ورايا امتحانات الاسبوع اللي فات والحمد لله عدت علي خير. نتكلم بقا عن بوست النهاردة ... بوست النهاردة يا حبايبي الحلوين -افتكرت أبله فضيلة بتاع الراديو- بتكلم فيه عن شخصية من أطرف الشخصيات التي مرت بحياتي. فكلما أكون متضايقا (مخنوق يعني) أخرج إليه .. وكونه مرحاً فدائما يخرجني من الحالات النفسيه الصعبة. أحكي لكم بعض مواقفه التي أضحكتني كثيرا علها ترسم الابتسامة علي وجوهكم في زمن صارت فيه الإبتسامه أصعب ما يكون. ياسر خريج خدمة اجتماعية متزوج ولديه ابن -محمد- واد زي القمر ربنا يخليه لوالدة ووالدته هتكلم عنه في آخر البوست . ياسر والده لديه محل حلواني شهير في بلدنا وهو من أفظع الحلوانية في البلد أما ياسر فبعد سفر أخيه عاصم حبيب قلبي -خريج تربية رياضية ومسافرا بالسعودية طباخ وسلملي علي الدوله اللي بتقدر التخصص والعلم- حيث كان عاصم يبيع في محل والده الحاج محمد ربنا يديه الصحة لكبر سنه وبعدما سافر عاصم مسك ياسر المحل .. المحل في الحجم صغير تباع فيه حلويات وبعض مواد البقالة وشيبسي ودوريتوس والذي منه ومن الداخل هناك جهازي كومبيوتر للتأجير(سايبر صغير) .يوما ما ذهبت بعد العشاء لياسر فوجدته يحاسب زبونا علي ثمن ما أخذ من حلوي ففتح الدرج وأعطاه باقي الحساب وحينما فتح الدرج دخلت أنا ممثلا دور الحاقد قائلا : يااااه ايه دا كلوا كل دي فلوس هما كانوا شويه عشرات يعملوا مثلا تمانين جنيه دا غير ان فيهم فلوس ثمن البضائع المباعة يعني صافي الربح يعمل مثلا بتاع عشرين تلاتين جنيه .. فرد عليا ياسر بكل هدوء ليطلق قنبله من خفة الظل والكوميديا قائلا: وايش يكونوا دول دولا شغل سااااعه ... دا غير ان ما فيهومش تمن بضاعة ... عايز تشوف الايراد بقا تعالي بالليل ... دانا تحت السرير حاطط فلوس بالهبل لما بعوز بجيب بالمساحة..هههههههههههه .. ثم أكمل قائلا يا دكتور عايز أقصدك في خدمة قولتله أؤمر يا ياسر رد قائلاً : عايزك تشوفلي اتنين أمناء يساعدوني في المول الكبير دا علشان مش قادر عليه لوحدي ههههههههه. دا عن احدي الطرائف ..فاصل ونواصل باقي الطرائف...

لو تشرب شاي العفريت ... تتنطط في البيت طنطيط ... لو تشرب شاي الصرصار هتبقا زي الحمار

عدنا ... أحكي لكم موقفا آخر ذات يوم أجلس مع ياسر...فإذا برجل يدخل المحل قائلا يا ياسر عايز علبة صلصة فرد ياسر قائلا : لا والله ما فيش غير اكياس . فرد الرجل بتناكه فوق الوصف قائلاً : لا يا عم دا الواحد كدا هيعوز 20 كيس.ومشي الرجل فقال لي ياسر بلهجة مفعمة بالدعابة وكأنه يقلد الرجل: 20 كيس يا عم الأكِّيل ... عليا النعمة تلاقيكوا بتوزعوا الطماطم نوايب .هههههههههههههههه فظيع ياسر ... فاصل ونواصل باقي المواقف...

مع شبكة أم نبيل عيش الفرق ... أحسن تغطيه ... الآن وحصريا اشتري خط أم نبيل واحصل علي كوفرته هدية هذا العرض ساري حتي بداية الشتاء ... وفي الشتاء العرض الشتوي لحااااف هدية ... هي دي التغطية ولا بلاش من أم نبيل وبسسس

عدنا ... احدي المرات ذهبت لياسر بعد العصر فوجدته يجلس فأخذت أنكشه قائلا ها هتجيب الهامر امتا.. فرد قائلاً: آخر النهار ألم بس الايراد .. فقال لي يا عمي هو المحل بيجيب حاجة وأخد يشعرني انه يستكردني-تمثيل طبعاً- قائلا خود دوق دي جامدة ولا دي ولا دي وانا اقوله لا .. ثم قال لي خد طايب برطمان من البرطمانات الملونة دي ...

قولتله لا يا عم هعمل بيه ايه ؟؟ إذا به يقول لي دا خلصوا دا ماعدش فاضل إلا 40 ههههههههههههههه علما بأن علبة البرطمانات فيها 50 واحد ههههههههههههههه فأخذت امسك بطني من الضحك . وهو يقول هاااا هتاخد خمسة قبل ما يخلصوا؟؟؟ فاصل آخر ونعود للموقف التالي....

المركز الدولي للخدمات العبيطة .. دكتور خالد أبو برنيطة

تساقط الشعر والصلع مشكله بنت كلب علاجها عندنا تلت برطمانات البرطمان الاول في حبوب المستكة اللي عارفين فوايدها للشعر دي بتتاكل. أما البرطمان الثاني فيه حبوب الـ مش مستكة ودي ما بتتـــــــاكلش دي بتتحط علي فروة الرأس بعد طحنها. أما البرطمان الثالث فدا الموفأجة ... دا بقا فيه خليط من مطحون حبوب الـ مش مستكة بتاع البرطمان التاني والـ زنزعيل بتاع المعيز ودا لا بيتاكل ولا يتحط علي فروة الراس دا بيترمي في الزبالة علي طول ... ودي صور بالفوتوشوب لناس كان عندهم صلع وخفوا حتي لو بأسباب وراثية بالعافية هنطلعلهم الشعر .. مع تحيات المركز الدولي للخدمات العبيطة .. دكتور خالد أبو برنيطة.

عدنا .. ذات يوم يحكي لي ياسر بعضاً من مواقفه المضحكة فيحكي لي قصته مع شيخ مشهور في بلدتنا . كان ياسر عائدنا في المواصلات يوماً من ميت غمر الي بلدتنا وقد اشتري صحيفة المساء ليتصفحها في الطريق فدخل ياسر الميكروباظ وجلس ثم فتح الصحيفة وهم بالتصفح فإذا به يجد من يربت علي كتفه قائلاً: الأستاذ بتاع المسا خلص الجرنان علشان عايز أجراه - الجيم مقصودة مش غلطة - قال له ياسر خود وكان ناقص يديهوله في عينه. أخذه عم الشيخ وأخد يقرأ فيه طوال الطريق حتي كادوا يصلوا لبلدتنا فإذا بالشيخ يعطي له الصحيفة قائلاً: خود يا عم والله الأهلي ماهو نافع غير في الهيافة. كون ياسر أهلاوي صرف وبضغط الموقف صاح ياسر لا ياعم الشيخ خليه لك مش عايزة دا حاجة تخنق يا راجل وكأنه يتكلم عن الأهلي والكلام لكي يا جارة.. وأخذ ياسر يقول لي : عم الشيخ ماسكلي الجرنان يقرا أخبار الرياضة دا حاجة تفقع ألا ما فتح صفحة الشرع ولا الدين ... فاصل ونواصل..

المركز الدولي للخدمات العبيطة ... دكتور خالد أبو برنيطة

مرض الضغط من أمراض العصر ودا بييجي من اللخبطة في الأكل وزيادة الأملاح وهموم الحياة... الآن من المركز الدولي أحدث علاج لمرض الضغط Hatmoto علاج فعَّال وأكيد وسريع المفعول لمرض الضغط من خلاصة النجيلة الطبيعية وخيرات الأرض. قرص واحد يوميا منHatmoto كفيل بعلاجكم إن شاء الله ونوهائيا من مرض الضغط . علاج نوهائي واتكل علي الله يا عم الحج وانتي يا ست الحاجة خلّوا الدنيا تخف إحنا بقينا 80 مليون. مع تحيات وزارة السفه والبتنجان والمركز الدولي للخدمات العبيطة... دكتور خالد أبو برنيطة.

عدنا...نكمل معاً طرائف الحاج ياسر

ذات يوم يأتي محمد الشناوي -ثانوية عامة- ليشتري شيئاً ما فاذا بياسر يقول صورني يا دكتور فصورته هذه الصورة

فإذا به بعد الصورة يقول: هااااااااا أظن باين في الصورة يا دكتور إني قطعته. ههههههههههههه لا فعلا باين يا ياسر .

كفاية فواصل علشان الليلة تخلص. نكمل علي طول.عـ الموقف اللي بعده...


إحدي أيام الجمعة ذهبت لــ ياسر بعد صلاة الجمعة وجلست معه قليلاً فإذا بهذا الولد الصغير يمر من أمام ياسر معانداً له لأن ياسر مشاكس ويحب ملاطفة الصغار. فقال لي ياسر : بص الواد دة رجله رفيعة إزاي؟؟ ونادي علي الولد قائلاً : خود ياااض هات رجلك دي أسلك بيها ما بين أسناني. فتضجر الطفل وأخد يشتم ياسر ويسب له ثم بالنبلة التي بيده أطلقه قذيفة زلطية وكأنه طفل من الإنتفاضة يقاوم جندي اسرائيلي فجن جنون ياسر وأخد يركض خلف الطفل كالمجنون كما في الصورة وما سابووش غير لما عيط


ودلوقتي بقا نحلي بموقف من أطرف مواقف ياسر..

ياسر اتجوز ومراته حملت وبعدين سافر الإمارات وكان طبعاً شيء بديهي إنه يتصل يتطمن علي الأهل . مرة بيتصل فرد أخوه عاصم -ربنا يجيبه بالسلامة- وقاله ازيك يا ياسر .. مراتك ولدت وجابت محمد واد زي القمر .. ودي صور محمد

فكان من ياسر قذيفة كوميدية مثيرة للضحك المتواصل...

رد ياسر قائلا: طب الحمد لله خير أن عايزه يا عاصم علي ما أنزل يقابلني علي باب الشارع يسبلي بالدين . ههههههههههههههه.

طبعا دا هذار بدل ما ناس تدخل تقول أعوذ بالله وبتاع الراجل يقصد هذار مش أكتر.

أدام الله خفة دمك يا ياسر

أدام الله ابتساماتكم جميعاً

أتمني يكون البوست عجبكم.

وفي انتظار تعليقاتكم

دمتم سالمين

د. محمد الجوهري

ملك ميت غمر والسودان والكونغوالدكتاتورية وزيمبابوي وأنجولا وتنزانيا.