زواج الصــالــونــات

طبعاً زي ما وضحت لميس صاحبة المدونة دي في الموضوع دا إننا عاملين Local Tag يعني بنتكلم عن موضوع واحد من وجهة نظرها - إناث - ووجهة نظري - رجال - والموضوع اللي إختارناه زواج الصالونات:

في البداية أحب أوضح إن مش معني إني بعبر عن رأيي يبقا دا رأي كل الرجال لأ طبعاً رأيي خطأ يحتمل الصواب ورأيك صواب يحتمل الخطأ ولا بد من مناقشة لذا أتمني أن أري تعليقات علي هذا الموضوع الأول من نوعه ...

أنا همشي نظام الحوار أسئلة وإجابات ...

*يعني إيه زواج الصالونات؟؟

يعني ان الراجل مايكونش يعرف حاجة عن اللي بيتقدم ليها علشان يخطبها وحد من أهله أو معارفه بيتوسط فبيروح يقابل أهلها ويقابلها لأول مرة وهناك بيتم التعارف ولو حصل نصيب اتفاق وجواز .

*لميس تقصد ايه بجواز الصالونات؟؟

لميس تقصد الزواج عن طريق الخاطبة ودا اللي قالت عليه زواج عصر الحرملك أو عصر سي السيد وأمينه

*ايه الفرق بين الرأيين؟؟؟

الخاطبة بتنقي علي مزاجها ... يعني فعلا عندك حق يا لميس لما قولتي هيضمن بالطريقة دي إنه ما يشتريش بضاعة حمضانة وفعلاً في هذا الزمن لم يعد ينفع هذا الأسلوب.

زواج الصالونات عندي يبقا عادي امتا ؟؟ لو الأهل والأقارب رشحوا واحدة انتا عارفها وتسمع عن سمعتها إنها كويسة أو متأكد منها كويس وعلي الأقل كلمتها ولو مرة . لكن عمرك ما شفتها!!! صعب جدا.

*مش فاهمين انتا بتؤيد زواج الصالونات ولا لأ؟؟

بمبدأ الخاطبة لأ طبعاً... لكن بالمبدأ الثاني ممكم . ليه؟؟ لأن العريس اللي غالباً ناوي يتجوز بيبقا سنه كبر مبدئياً 25 سنه علي الأقل بيكون ما فيش إحتكاك مع بنات في سن الجواز إيه الحل؟؟؟ ترشيح عروسة هو عارفها مش عمره ما شافها ...

*في كلام لميس أنتا شايف ان عندها حق؟؟؟

لميس بتقول زواج الصالونات (اللي هو زواج الخاطبة في نظرها) ماعادش ينفع الزمن دا لأن الحريم مترمية في الشوارع. عندك حق يا لميس لكن مش أي بنت مرمية في الشارع ينفع نتجوزها... لميس قالت لازم تعرفها عن طريق شغل أو تعارف. في وجهة نظري - وأعتقد أن ما يختلفش معايا ناس كتير - البنت السافرة -أو بمعني آخر الغير محترمة سوري في اللفظ - هي أكثر البنات إقناعاً إنها مؤدبة لأنها بتعرف نفسيات الرجال من كتر ما عرفت منهم لذلك فمن السهل عليها تمثيل دور البنت المحترمة وإقناع أفندينا إنها لأول مرة تتعرف علي شاب .... وأخينا يقع في المصيدة ويشيل البضاعة (الحمضانة) ... بتفكرني الحكاية دي بالأغنية الوقحة بتاعة تامر حسني بتاعة إعتذري للي هييجي بعدي.

*إيه الحل من وجهة نظرك الجواز يبقا إزاي؟؟

قال رسول الله -صلى الله عليه وسلم-" إذا جاءكم من ترضون دينه وخلقه فزوجوة ، إن لم تفعلوا تكن فتنة في الأرض وفساد كبير" صدق رسول الله - صلي الله عليه وسلم-.

يعني أنت كأب : لازم اللي يتقدم لبنتك يكون باين عليه الصلاح ، مشهود له بالإحترام بين الناس، حسن الخلق، كلامة طيب ، ولدية ولو علي الأقل قدر يسير من خفة الظل ليضفي في البيت إحساساً بالسعادة . إذاً ليس المال هو الشرط الوحيد كما في هذه الأيام.

أما أنتِ كبنت: كل الرجال واحد ونفسهم واحدة وعيونهم واحدة فقولي لنفسك لو أسعدته في بيتي وملأت عينيه فماذا يجعله يبحث بالخارج؟؟ ولكن إذا ملأت طريق حياتنا بالعواثير والمشكلات فسيمقتني ويكره البيت ويكرهني بالطبع سيخرج ويبحث بالخارج عما يسعده. أما قبل الزواج فلا تحاولي التعارف علي أشخاص بل اتركي القدر والظروف وانتظري نصيبك فالله تعالي لا ينسي أحداً وسيختار لك من يناسبك واعلمي أن الطيبون للطيبات والخبيثون للخبيثات لذا قوِّ صلتك بربك وسيكون نصيبك في شخص قوي الصلة بالله .

أما أنت أيها الرجل: فاعلم أن كل النساء واحداً فإذا أعجبتك امرأة فلا تحاول الإقتراب منها والتعرف عليها بل اذهب إلي زوجتك وباشرها وستنال بمعاملتك الحسنة لها رضا ربك وقناعة نفسك .

أما قبل الزواج فأنصحك أن تقوِّ صلتك بربك لأنه كما قلت آنفاً: الطيبون للطيبات والخبيثون للخبيثات فأيهما تختار أن تكون لك ؟؟ وبناء عليه فلتكن أنت.

*خلاصة الكلام انتا مع زواج الصالونات ولا لأ؟؟

أنا أؤيد زواج الصالونات بس بمفهومي مش بالمفهوم الشائع في المجتمع -إنه رايح يشتري معزة أو مفهوم الخاطبة اللي عند لميس- زواج الصالونات اللي أقصده هو زواج يتم بالتعارف ليس بالضرورة للمرة الأولي ولكن يكون أمام الأهل فتكون العلاقة في النور بدلا من الظلام . ويباركها الله تعالي.

وفي النهاية أتمني لجميع المتزوجين التوفيق في حيواتهم

وأتمني لمن لم يتزوجوا -وأنا معاهم طبعاً- برضو التوفيق في حيواتهم وأن يجدوا ما يفرحهم.

تحياتي للجميع وفي انتظار تعليقاتكم

دمتم سالمين

د. محمد الجوهري